Malaki
3 “Onani! Ine nikutumiza nthumi yangu ndipo idzanikonzere njira. Ambuya chaiye, yemwe wanthu imwe mukumufagafaga, adzabwere mukachisi mwake modzidzimusa. Komasoti nthumi ya pangano yomwe mukumudikhirira mokondwa idzabwere. Inde iyo idzabweredi,” wanena teno Yahova wa magulu yankhondo yakudzulu.
2 “Ni mbani yemwe adzapirire pantsiku yomwe idzabwere? Ndipo ni mbani adzaimirire iyo ikadzawonekera? Iyo idzakhale ninge moto wa wosungunula visimbi komasoti ninge sabawu* ya wowatcha vovala. 3 Iye adzakhale pasi ninge wosungunula visimbi komasoti ninge wochenesa siliva. Adzachenese wana wa Levi ndipo adzawachenese ninge golide na siliva. Akambadzapereka ntsembe zawo ninge mphaso, Yahova adzawone kuti ntsembe zawo mwizo akuzipereka mwachilungamo. 4 Ntsembe zomwe Yuda na Yerusalemu adzapereke ninge mphaso, zidzakondwerese Yahova, ninge momwe venzere kalekale.
5 Nidzakufenderereni kuti nikuweruzeni. Nidzachebwelini kupereka umboni wotsutsa wamatsenga, wachigololo, olumbira monama komasoti omwe akuchitira vinthu viribe chilungamo munthu waganyu, nkazi wamasiye na mwana wamasiye* komasoti yemwe alamba kuthandiza alendo. Wanthu mwawa ankunigopalini,” wanena teno Yahova wa magulu yankhondo yakudzulu.
6 “Inepano ndine Yahova ndipo nichinjalini.* Imwepo ndimwe wana wa Yakobo ndipo mulibe kumaliratu. 7 Kuyambira muntsiku za azibereki wanu mubveralini malamulo yangu ndipo mukuyatewedzalini. Bwererani kwa ine ndipo inembo nidzabwerere kwa imwepo,” wanena teno Yahova wa magulu yankhondo yakudzulu.
Koma imwepo mukunena kuti: “Tingabwerere tani?”
8 “Ko munthu angabere Mulungu? Koma imwepo munkunibera.”
Imwepo mukunena kuti: “Takuberani tani?”
“Munkunibera pankhani ya chakhumi na vopereka. 9 Ndimwe wotembererewa* ndawa mukunibera. Ntundu wanu muyu ukuchita vimwevi. 10 Bweresani gawo ibodzi pa magawo 10 yaliyose* ya vinthu vanu nkuviikha mosungiramo vinthu vangu, kuti m’nyumba mwangu mukhale chakudya. Pulizi niyeseni pankhani mweyi, kuti muwone peno nidzakufungulirenilini misuwo yakudzulu nkukukhuthulirani madaliso mpakana mudzasowelini chinthu,” wanena teno Yahova wa magulu yankhondo yakudzulu.
11 “Ine nidzabvumelini kuti dzombe* zimbadzadzonge mbewu za m’munda mwanu. Miti ya uva ya m’munda mwanu yambadzabereke nthawe zose,” wanena teno Yahova wa magulu yankhondo yakudzulu.
12 “Makhaindi yose ya wanthu yadzanene kuti ndimwe wokondwa, ndawa mudzakhale mudziko yokomedza,” wanena teno Yahova wa magulu yankhondo yakudzulu.
13 “Imwepo mwaniyankhulira mawu yonyoza,”* wanena teno Yahova.
Ndipo mukunena kuti: “Isepano takuyankhulirani tani mawu yonyoza?”
14 “Imwepo mwanena kuti: ‘Kutumikira Mulungu kulibe phindu. Ko taphindula chani ndawa ya kumutumikira komasoti ndawa yofamba tiri okwinyirira pamaso pa Yahova wa magulu yankhondo yakudzulu? 15 Manjeuno tinkuwona kuti wanthu odzikwiza ankukondwa. Komasoti wanthu ochita voipa, vinthu vinkuwafambira bwino. Iwo ayesa Mulungu koma ankulangiwalini.’”
16 Panthawe mwiyo wanthu ogopa Yahova ambayankhulana, aliyese na munzake ndipo Yahova adakhala tcheru nkumbabvesera. Bukhu ya chikumbuso, yonena va wanthu ogopa Yahova na wanthu omwe ambaganizira* va dzina yake, idayamba kunembewa pamaso pake.
17 “Iwo adzakhale wanthu wangu, pantsiku yomwe nidzawachitise kukhala chuma chapadera,” wanena teno Yahova wa magulu yankhondo yakudzulu. “Nidzawachitire chifundo ninge momwe munthu achitira chifundo mwana wake yemwe amutumikira. 18 Ndipo mudzawone pomwe kusiyana pakati pa munthu wolungama na woipa komasoti pakati pa munthu yemwe akutumikira Mulungu na yemwe akumutumikiralini.”