Ekisodo

39 Manje adakonza vovala volukiwa bwino vakuti ambavale pakutumikira pamalo yochena. Vovala mwivo adavikonza pakuphatisa basa usalu wagirini, ukuse wa nkhosa wapsupsupsu na usalu ufuwira maninge. Adakonza vovala vopatulika va Aroni mobverana na vomwe Yahova adalamula Mose.

2 Adakonza efodi woluka pabodzi na golide, usalu wagirini, ukuse wa nkhosa wapsupsupsu, usalu ufuwira maninge na usalu woposa wabwino maninge. 3 Adapfula* golide nkukhala wothasalala maninge, ndipo adamulenzalenza nkukhala ninge tuvingwe kuti alukire pabodzi na usalu wagirini, ukuse wa nkhosa wapsupsupsu, usalu ufuwira maninge na usalu wabwino maninge. 4 Adakonza pomwe nguwo ziwiri za m’mapikiti nkuziphatanidza ku efodi muyo. Adaziphatanidza kutsogolo na kumbuyo kwake. 5 Bande* yoluka yomangira efodi yomwe adailumatidza ku efodi muyo yenze yokonzewa na nguwo ya efodi muyo. Yenze ya golide, usalu wagirini, ukuse wa nkhosa wapsupsupsu, usalu ufuwira maninge na usalu woposa wabwino maninge, mobverana na vomwe Yahova adalamula Mose.

6 Manje adaikha minyala ya onekisi mu voikhamo vagolide. Paminyala mwayo adanembapo madzina ya wana wa Izirayeli mochita kugoba ninge momwe agobera chidindo. 7 Ndipo minyala mwayo adayangenesa pa nguwo za m’mapikiti ya efodi kuti yakhale minyala yachikumbuso kwa wana wa Izirayeli, mobverana na vomwe Yahova adalamula Mose. 8 Patsogolo pake adakonza chovala cha pachifuwa ndipo adachikonza mwaluso ninge momwe adakonzera efodi. Adachikonza na golide, usalu wagirini, ukuse wa nkhosa wapsupsupsu, usalu ufuwira maninge na usalu woposa wabwino maninge. 9 Akachipeta pakati chimbalingana mbali zose 4. Chovala pachifuwa mwicho adachikonza kuti akachipeta pakati, mtalimtali mwake chimbakhale 22 sentimetro ndipo mfupimfupi mwake chimbakhale 22* sentimetro. 10 Ndipo pa chovala pachifuwa mwicho adaikhapo mizera 4 ya minyala. Mzera woyamba wenze na minyala ya rube, topazi na emarodi. 11 Mzera wachiwiri wenze na minyala ya nofeki, safiro na yasipi. 12 Mzera wachitatu wenze na minyala ya lesemu,* agate na ametusito. 13 Ndipo mzera wachi 4 wenze na minyala ya kulusolito, onekisi na yade. Adayaikha mu voikhamo vake vagolide. 14 Minyala mwayo adayaikha mobverana na madzina ya wana 12 wa Izirayeli. Pamwala uliwose adanembapo mochita kugoba ninge momwe agobera chidindo ndipo mwala uliwose wenze na dzina ibodzi pa madzina ya madzinza 12.

15 Ndipo pa chovala pachifuwa adakonzapo matcheni ya golide wosefeka bwino, wokhala ninge vingwe voposa. 16 Adakonza pomwe voikhamo minyala viwiri vagolide na vizerenga viwiri vagolide, ndipo adaikha vizerenga mwivo m’makhona yawiri ya chovala pachifuwa mwicho. 17 Patsogolo pake adangenesa vingwe viwiri vagolide vire mu vizerenga viwiri va m’makhona ya chovala pachifuwa. 18 Ndipo adangenesa vingwe viwiri mwivo pa voikhamo minyala viwiri. Patsogolo pake adaikha voikhamo minyala viwiri mwivo pa nguwo za m’mapikiti za efodi chakutsogolo. 19 Padateno, adakonza vizerenga viwiri vagolide nkuviikha m’makhona yawiri ya chovala pachifuwa kumbali ya nkati yogumirirana na efodi. 20 Manje adakonza vizerenga viwiri nkuviikha kutsogolo kwa efodi, m’nyantsi mwa nguwo ziwiri za m’mapikiti, pafupi na polumatidzira, padzulu pa malo yomwe bande* yochita kuluka yalumatidzirana na efodi. 21 Padateno adamanga chovala pachifuwa mwicho na chingwe chagirini. Chingwe mwicho chidangena mu vizerenga va chovala pachifuwa komasoti mu vizerenga va efodi. Vimwevi vimbathandiza kuti chovala pachifuwa mwicho osati chimbachokechoke koma chimbakhale padzulu pa bande* yochita kuluka ya efodi, mobverana na vomwe Yahova adalamula Mose.

22 Manje adakonza malaya yakambulamanja yovala nkati mwa efodi. Yadakonzewa na okonza nguwo ndipo adayakonza na usalu wagirini wokhaokha. 23 Malaya ya kambulamanja mwayo yenze yofungula padzulu pake, pakatikati. Yenze yofungula ninge chovala cha kunkhondo cha mamba yasimbi. Pofungula mwapo penze popenderera m’mphepete mwake kuti osati pang’ambike. 24 Patsogolo pake, mu mpendero wa m’nyantsi mwa malaya mwayo yakambulamanja adakonzamo vinthu vowoneka ninge makangaza* va usalu wagirini, ukuse wa nkhosa wapsupsupsu na usalu ufuwira maninge woposa pabodzi. 25 Adakonza mabero ya golide wosefeka bwino nkuyaikha pakati pa makangaza kuzungulira mpendero wa m’nyantsi mwa malaya yakambulamanja mwayo. 26 Adaikha bero patsogolo pake khangaza,* bero patsogolo pake khangaza, mpakana kuzungulira mpendero wa m’nyantsi mwa malaya yakambulamanja. Malaya mwayo ambayavala pakutumikira, mobverana na vomwe Yahova adalamula Mose.

27 Patsogolo pake adakonza nguwo ya usalu yabwino maninge nkukonzera mikanjo Aroni na wana wake. 28 Adakonza pomwe duku ya nguwo yabwino maninge, tunguwo tokhuza tokulunga kunsolo tokonzewa na nguwo zabwino maninge na makabudula ya nguwo* za usalu woposa wabwino maninge. 29 Adakonza pomwe bande yomanga pamimba na usalu woposa wabwino maninge, usalu wagirini, ukuse wa nkhosa wapsupsupsu na usalu ufuwira maninge, mobverana na vomwe Yahova adalamula Mose.

30 Padateno adakonza kasimbi koyetima ka golide wosefeka bwino, chizindikiro chopatulika cha kudzipereka. Adanembapo mawu yakuti: “Yahova ni Wochena.” Mawu mwaya adayanemba mochita kugoba ninge momwe agobera chidindo. 31 Adangenesa chingwe chokonzewa na usalu wagirini mu kasimbi mwako kuti akamangirire paduku mwiyo, mobverana na vomwe Yahova adalamula Mose.

32 Manje basa yose ya pachihema, panango kuti chihema chogumanako, idamala ndipo Aizirayeli adachita vose vomwe Yahova adalamula Mose. Adachitadi vimwevo.

33 Patsogolo pake adabweresa kwa Mose chihema na vombo vake vose, nguwo yake yofunikirira padzulu, ngoloweko zake, maferemu yake, tumiti twake tonyamulira, vipilala vake na visimbi vake voikha pasi. 34 Adabweresa pomwe chofunikirira chihema mwicho cha vikumba va nkhosa vovuwika mu tinta ifuwira, chofunikirira chinango chapadzulu pake cha chikumba cha akatumbu, nguwo yogwatisira pakati, 35 likasa ya Umboni, tumiti twake tonyamulira, chofunikirira chake, 36 meza, vombo vake vose na nkate wachiwonesero. 37 Adabweresa pomwe choikhapo kandyero cha golide wosefeka bwino, makandyero yake yondandalikiwa bwino, vombo vose va choikhapo kandyero mwicho, mafuta ya kandyero, 38 guwa yantsembe yagolide, mafuta yodzodzera, vofukiza vonunkhira, nguwo yofungira pansuwo wa chihema mwicho, 39 guwa yantsembe ya kobre, sefa yake ya visimbi va kobre, tumiti twake tonyamulira, vombo vake vose vophatisa basa paguwa mwiyo, basiya yosambira na choikhapo chake. 40 Adabweresa pomwe nguwo zobisira malo, vipilala na visimbi vokhazikapo vipilala mwivo, nguwo yobisa pansuwo wa malo, nkhokho za malo na vingwe vake, vombo vose vophatisa basa pa utumiki wa pachihema, panango kuti chihema chogumanako, 41 vovala volukiwa bwino vakuti ambavale pakutumikira pamalo yopatulika, vovala vopatulika va Aroni wantsembe na vovala va wana wake vakuti ambavale pakutumikira ninge antsembe.

42 Aizirayeli adaphata basa yose motewedza vose vomwe Yahova adalamula Mose. 43 Mose padayendeza basa yose, adaona kuti achita vose mobverana na vomwe Yahova adalamula, ndipo Mose adawadalisa.