Oweruza
16 Nthawe inango, Samisoni adayenda ku Gaza, kumuko adawona hule ndipo adangena m’nyumba mwa hule mweyo. 2 Wanthu wa ku Gaza adauziwa kuti: “Samisoni wabwera kuno.” Pamwapo adazungulira malo mwayo nkumubishalira usiku wose pa nsuwo wa thaundi mweyo. Iwo adakhala zii usiku wose nkumbaganiza kuti: “Kukandochena timuphe.”
3 Koma Samisoni adapitiriza kugona mpakana pakati pa usiku. Patsogolo pake, adamuka pakati pa usiku nkuphata misuwo ya mpanda, nkuzula mafelemu yake pabodzi na chokhiyira chake. Padateno, adavinyamula paphewa pake kuyenda navo padzulu pa phiri yomwe yenze nyang’anane na Heburoni.
4 Patsogolo pake, Samisoni adayamba kukonda nkazi munango wa kuchigwa cha Soreki, dzina yake Delila. 5 Pavidateno, olamulira wa Afilisiti adayenda kwa nkazi muyo nkumuuza kuti: “Umunyengerere kuti udziwe chomwe chimuchitisa kuti akhale na mphanvu zizinji komasoti vomwe tingachite kuti timumalise mphanvu, timumange na kumuwina. Ukakwanisa kuchita vimwevi, aliyese wa isepano adzakupase kobiri za siliva zokwana 1100.”
6 Patsogolo pake, Delila adauza Samisoni kuti: “Niuze, ko nchani chikuchitisa kuti ukhale na mphanvu zizinji, ndipo angakumange na chani kuti akuwine?” 7 Samisoni adamudawira kuti: “Achiti animanga na vingwe 7 vinyowani viwisi* ningafoke nkukhala ninge munthu aliyese.” 8 Pamwapo olamulira wa Afilisiti adamubweresera vingwe 7 vinyowani viwisi. Patsogolo pake Delila adamumanga Samisoni na vingwe vimwevo. 9 Pamwapo nkuti wanthu amubishalira Samisoni mu chipinda chinango. Nkazi muyo adamuuza kuti: “Samisoni Afilisiti wale abwera!” Padabva vimwevo, Samisoni adagwata vingwe vire ninge momwe usalu* ugwatikira ukaphata moto. Chintsintsi cha mphanvu zake chiribe kudziwika.
10 Patsogolo pake Delila adauza Samisoni kuti: “Iwepo wanipusisa pakuniuza bodza. Pulizi niuze vomwe angakumange navo.” 11 Samisoni adamudawira kuti: “Achiti animanga na vingwe vinyowani vomwe vikalibe vaphatisiwa basa, ningafoke nkukhala ninge munthu aliyese.” 12 Manje Delila adatenga vingwe vinyowani nkumumanga navo manja ndipo adamuuza kuti: “Samisoni, Afilisiti wale abwera!” (Panthawe mweyi nkuti wanthu amubishalira mu chipinda chinango.) Samisoni padabva vimwevi adagwata vingwe vomwe enze adamumanga navo vire ninge ankugwata usalu.
13 Patsogolo pake Delila adauza Samisoni kuti: “Undokhalira kuninamiza ntsiku zose. Niuze vomwe angakumange navo.” Samisoni adadawira kuti: “Unimange mandoto 7 mu msolo mwangu na usalu wosonera muntalintali mwa nguwo.” 14 Iye adamumangadi mandoto nkuyaphinilira. Patsogolo pake adamuuza kuti: “Samisoni, Afilisiti wale abwera!” Samisoni padabva vimwevi, adamuka ndipo adachosa chophinira chire komasoti adachosa usalu ule.
15 Manje Delila adauza Samisoni kuti: “Ndawa chani unena kuti, ‘unikonda,’ pomwe ntima wako ulilini pa inepano? Wakhala unkuninamiza katatu ndipo ulibe kuniuza chomwe chikuchitisa kuti ukhale na mphanvu zizinji.” 16 Ndawa yakuti Delila ambamungingimira Samisoni ntsiku iriyose kuti amuuze, Samisoni adafika poneta navo maninge mwakuti alibe kukwanisa kupirira. 17 Pomalizira pake, Samisoni adamuululira vose. Adamuuza kuti: “Mu nsolo mwangu mukanati mwapitako leza. Ndawa yakuti ndine Mnaziri wa Mulungu kuchokera ntsiku yomwe nidabadwa.* Achiti anigera, mphanvu zangu zingamale, ningafoke nkukhala ninge wanthu wose.”
18 Delila padaona kuti Samisoni wamuululira vose, nthawe mwiyoletu adatumiza mawu kwa olamulira wa Afilisiti, yakuti: “Bwerani manje, ndawa waniululira vose.” Pamwapo olamulira wa Afilisiti wale adabweresa kobiri zire kwa Delila. 19 Patsogolo pake Delila adachitisa kuti Samisoni agone tulo paminyendo yake ndipo adachemera munthu munango kuti amugere mandoto 7 mu nsolo mwake. Pavidateno Samisoni wenze alibe pomwe mphanvu kwa Delila, ndawa mphanvu zake zenze zidamuchokera. 20 Pamwapo Delila adati: “Samisoni, Afilisiti wale abwera!” Samisoni padabva vimwevi adamuka nkunena kuti: “Niwawine ninge momwe nimbachitira nthawe zose ndipo nipulumuke.” Koma alibe kudziwa kuti Yahova wenze adamusiya. 21 Pamwapo Afilisiti adamuphata ndipo adamubowola maso. Patsogolo pake adayenda naye ku Gaza nkumumanga na matcheni yawiri ya kobre* ndipo iye ambafambisa mwala wa mphero mudjeri. 22 Koma tsitsi yake ire idayamba pomwe kukula.
23 Olamulira wa Afilisiti adasonkhana kuti apereke ntsembe kwa Dagoni mulungu wawo komasoti kuti achite chikondwerero, pakuti ambanena kuti: “Mulungu wathu watipasa mzondi wathu Samisoni!” 24 Wanthu padaona Samisoni, adayamba kutamanda mulungu wawo. Iwo ambanena kuti: “Mulungu wathu watipasa mzondi wathu, munthu yemwe wadzonga dziko yathu komasoti wapha wanthu azinji wa ntundu wathu.”
25 Ndawa yakuti adakondwa maninge, adayamba kunena kuti: “Kamutengeni Samisoni kuti adzatikondwerese.” Pamwapo adayenda kukamutenga kudjeri kuti adzawakondwerese ndipo adamuikha pakati pa vipilala. 26 Patsogolo pake Samisoni adauza mulumbwana yemwe wenze adamuphata djanja kuti: “Nithandize kuti niphate vipilala vomwe valimbisa nyumba iyi kuti nivitsamire.” 27 (Panthawe mweyi nkuti m’nyumba mumo muli dzale na amuna na akazi. Olamulira wose wa Afilisiti enzembo mumo. Padzulu pa nyumba mweyi, penze amuna na akazi wothamangira 3000 omwe ambanyang’anira Samisoni ankuwakondweresa.)
28 Pamwapo Samisoni adagwigwirira Yahova kuti: “Yahova Ambuya Nkulu Maninge, pulizi, nikumbukireni mwa kunipasa mphanvu kabodzi kokha. Imwepo Mulungu, nibvumeni niwabwezere Afilisiti mwawa ndawa ya ibodzi mwa maso yangu aya.”
29 Patsogolo pake Samisoni adaphata mwamphanvu vipilala viwiri vapakati vomwe vidalimbisa nyumba mweyo. Iye adatsamirisa djanja yake yamakulu ku chipilala chibodzi ndipo yamadzere ku chipilala chinango. 30 Pamwapo Samisoni adakuwa kuti: “Nife nawo pabodzi Afilisiti mwawa!” Patsogolo pake adagwinya vipilala vimwevo na mphanvu zake zose ndipo nyumba mweyo idagwera olamulira wa Afilisiti na wanthu wose omwe enze mumo. Pamwapo wanthu omwe Samisoni adawapha panthawe ya impfa yake enze azinji maninge kuposha omwe adawapha panthawe yomwe wenze na moyo.
31 Patsogolo pake, azibale wake na wanthu wose wa kubanja ya ababa wake, adayenda kukantenga maliro ya Samisoni, nkudzaikha m’manda ya ababa wake Manowa, pakati pa Zora na Esitaoli. Samisoni wenze adaweruza Aizirayeli kwa magole 20.