Genezesi
15 Vimwevi pavidachitika, Yahova adayankhula na Abulamu kuti: “Ayi kugopa Abulamu. Inepano ndine chovikira chako chokuteteza. Malipiro yako yadzakhale yakulu maninge.” 2 Abulamu adadawira kuti: “Yahova Ambuya Nkulu Maninge, mudzanipase chani inepano? Onani niribe mwana ndipo Eliezere wa ku Damasiko ndiye wati adzatenge katundu wangu wose ninge chuma chake.” 3 Abulamu adanena pomwe kuti: Mulibe kunipasa mwana* ndipo ntumiki wangu ndiye wati adzatenge katundu wangu wose ninge chuma chake.” 4 Koma Yahova adamudawira kuti: “Munthu muyu adzatengelini katundu wako ninge chuma chake, koma mwana wako ndiye wati adzatenge kuti chikhale chuma chake.”
5 Patsogolo pake Mulungu adauza Abulamu kuti abule panja nkumuuza kuti: “Kwiza maso yako kudzulu, uwerenge nyenyezi mwizo peno ungakwanise kuziwerenga.” Adamuuza pomwe kuti: “M’badwa* zako zidzakhalembo tene.” 6 Abulamu adakhulupirira vomwe Yahova adamuuza, ndipo Mulungu muyo adamuona kuti ni wolungama. 7 Adamuuza pomwe kuti: “Inepano ndine Yahova, yemwe nidakuchosa ku Uri, muthaundi ya Akasidi, kuti nidzakupase dziko mwiyi kuti ikhale yako.” 8 Ndipo iye adadawira kuti: “Yahova Ambuya Nkulu Maninge, nitsimikizire tani kuti dziko mwiyi nidzaitengedi kukhala yangu?” 9 Iye adauza Abulamu kuti: “Utenge ng’ombe yamagole yatatu yomwe ikanati yabalako, mbuzi ikazi yamagole yatatu, nkhosa imuna ya magole yatatu, na njiwa ing’ono na mwana wa nkhangaiwa.” 10 Pamwapo iye adatenga vose mwivo nkuvigwata pakati ndipo adaikha mbali iriyose monyang’anana na inzake, koma mbalani mwizo alibe kuzigwata. 11 Pamwapo mbalani zakudya nyama zidayamba kutera* panyama zophewa zire. Koma Abulamu ambazithamangisa.
12 Dzuwa paidakhala pang’ono kuchoma, Abulamu adagona tulo twakufanato. Patsogolo pake mdima wa m’badaba na wopasa mantha udafika pa iye. 13 Manje Mulungu adauza Abulamu kuti: “Ukhale uchidziwa kuti m’badwa* zako zidzakhale alendo mudziko ya anikachiro ndipo wanthu adzazisanduse akapolo na kuzidzudza kwa magole 400. 14 Koma mtundu yemwe adzautumikire uyo nidzauweruze. Patsogolo pake, iwo adzachokeko na vinthu vizinji. 15 Koma iwepo, udzafe mwantendere* patsogolo pakuti wakhala na moyo wabwino na utali ndipo udzaikhiwe m’manda. 16 Koma m’badwo wachinayi wa mbadwa zako ndiye wati udzabwerere kuno, ndawa nthawe yakuti Aamori alangiwe ikalibe kukwana.”*
17 Dzuwa pidachoma na pomwe mdima udayamba, uvuni wochoka utsi udaonekera ndipo moto wogaka udapita pakati pa nyama zimwizo. 18 Pantsiku mwiyi Yahova adachita pangano na Abulamu kuti: “Dziko mwiyi nidzaipereke kwa mbadwa* zako, kuyambira kukamadzi ka ku Iguputo mpakana kukamadzi kakulu, ka Firate. 19 Nidzapereke kwa mbadwa zako dziko ya Akeni, Akenizi, Akadimoni, 20 Ahiti, Aperezi, Arefai, 21 Aamori, Akanani, Agirigasi na ya Ayebusi.”