Wonembewa na Yohani

1 Pakuyamba penze munango yemwe ambadziwika kuti Mawu, ndipo Mawu muyo wenze na Mulungu, komasoti Mawu muyo wenze mulungu. 2 Moyu wenze na Mulungu kundoyambira pakuyambirira. 3 Vinthu vose vidakhalako mwakuphatisira basa iye ndipo palibe chinthu olo chibodzi chomwe chidakhalako palibe iye.

4 Moyo udakhalapo mwakuphatisira basa iye ndipo moyo muyo wenze kugwerewera kovunikira wanthu. 5 Kugwerewera muko kunkuvunika mumdima koma mdima muyo ungagonjeselini kugwerewera muko.

6 Kudabwera munthu munango yemwe adatumiwa ninge nthumi ya Mulungu. Dzina yake wenze Yohani. 7 Munthu moyu adabwera ninge mboni, kuti adzachitire umboni va kugwerewera, na chakulinga chakuti wanthu wosiyanasiyana akhulupirire pakuphatisira basa iye. 8 Sikuti iye wenze kugwerewera muko, koma adandobwera kudzachitira umboni va kugwerewera muko.

9 Kugwerewera chaiko komwe kuvunikira wanthu wosiyanasiyana kwenze kudasala pang’ono kubwera mudziko. 10 Iye wenze mudziko ndipo dziko idakhalako mwakuphatisira basa iye, koma dziko mwiyo iribe kumudziwa. 11 Adabwera mu dziko yawo, koma wanthu wa kwawo chaiwo alibe kumutambira. 12 Koma wose womwe adamutambira, adawapasa mphanvu kuti akhale wana wa Mulungu, ndawa yakuti angakhulupirira dzina yake. 13 Wanthu mwawa alibe kubadwa kuchokera mwa wanthu panango ndawa ya kufuna kwa wanthu panango soti ndawa ya kufuna kwa munthu, koma adabadwa kuchokera kwa Mulungu.

14 Ndipomwapa Mawu muyo adakhala na thupi ya nyama ndipo angakhala pakati pathu. Ise tidawona ulemerero wake, ulemerero wolingana na womwe mwana wobadwa yekha atambira kuchokera kwa ababa wake. Mulungu angamukomera ntima maninge komasoti angapfunzisa chonadi. 15 (Yohani ambachitira umboni va iye, mwakuti ambachita kukuwa kuti: “Uyu ndiye yemwe nimbanena ule kuti: ‘Yemwe ankubwera m’mbuyo mwangu umu ni nkulu kuposha inepano, ndawa adakhalako inepano nikalibe kubadwa.’”) 16 Ndawa yakuti wenze na kukoma ntima kukulu, nthawe zose timbatambira kukoma ntima kukulu kodzala maninge. 17 Pakuti chilamulo chidaperekewa pakuphatisira basa Mose, kukoma ntima kukulu na chonadi vidakhalako pakuphatisira basa Yesu Khrisitu. 18 Palibe munthu yemwe adaonako kale Mulungu kundochokera kalekale, mulungu wobadwa yekha yemwe ali kusaidi ya Ababa ndiye yemwe adafotokoza va Mulungu.

19 Yohani adapereka umboni pomwe Ayuda adatumiza antsembe na Alevi kuchokera ku Yerusalemu kukamubvunza kuti: “Ko iwepo ndiwe mbani?” 20 Iye adabvuma ndipo alibe kulamba. Adanena kuti: “Ine ndinelini Khrisitu.” 21 Iwo adamubvunza kuti: “Manje ndiwe mbani? Ndiwe Eliya panango?” Iye adadawira kuti: “Neye.” “Panango ndiwe Mneneri?” Iye adadawira kuti: “Neye!” 22 Pamwapo iwo adamubvunza kuti: “Manje ndiwe mbani? Tiuze kuti tikwanise kupereka mdawiro kwa omwe atituma. Iwepo munikachiro iwe udzinena kuti ndiwe mbani?” 23 Iye adati: “Ndine mawu ya munango yemwe ankukuwa mu chipululu kuti: ‘Thamulani njira ya Yahova,’* ninge momwe mneneri Yesaya adanenera.” 24 Wanthu mwawo adatumiwa na Afalisi. 25 Pamwapo adamubvunza kuti: “Manje ndawa chani ubatiza wanthu peno iwepo ndiwelini Khrisitu, Eliya panango Mneneri?” 26 Yohani adawadawira kuti: “Ine nibatiza m’madzi. Pakati panu paimirira munango yemwe imwepo munkumudziwalini. 27 Iye ndiye ankubwera m’mbuyo mwangu umu ndipo ine ndinelini woyenerera kumasula nthambo za ntsapato zake.” 28 Vinthu vimwevi vidachitikira ku Betaniya, kutsidya ya Yorodano, komwe Yohani angabatiza wanthu.

29 Mangwana yake adaona Yesu ankubwera kwa iye, ndipo adati: “Onani Mwana wankhosa wa Mulungu yemwe ankuchosa uchimo wa dziko! 30 Uyu ni yemwe ninganena ule kuti: ‘Yemwe ankubwera m’mbuyo mwangu umu ni nkulu kuposha ine, ndawa adakhalako ine nikanati kubadwa.’ 31 Inembo nimbamudziwalini, koma chomwe nikubatizira wanthu m’madzi ni chakuti iye awonekere kwa Izirayeli.” 32 Yohani adachitirambo umboni kuti: “Nidawona mzimu unkubuluka ninge nkhangaiwa kuchokera kudzulu ndipo udapitiriza kukhala pa iye. 33 Inembo nimbamudziwalini, koma Mulungu yemwe adanituma kudzabatiza m’madzi adaniuza kuti: ‘Ukadzawona mzimu unkubuluka nkukhazikika pa munthu munango, muyo ni yemwe abatiza na mzimu uchena.’ 34 Ine nidawonadi vimwevo ndipo nidachitira umboni kuti iye ni Mwana wa Mulungu.”

35 Mangwana yake Yohani wenze adaimirira pomwe na opfunzira wake awiri, 36 ndipo padaona Yesu ankufamba, adanena kuti: “Onani Mwana wa nkhosa wa Mulungu!” 37 Opfunzira awiri mwawo padamubva ankunena vimwevi, adalondola Yesu. 38 Patsogolo pake Yesu adacheuka, ndipo padawaona akumulondola, adawabvunza kuti: “Ko munkufagafaga chani?” Iwo adati: “Rabi, (dzina mweyi akaitsumbudzulira itanthauza, Mpfunzisi”) ko mukhala kuponi?” 39 Iye adawauza kuti: “Naboni mukakuwone.” Pamwapo adayenda kukawona komwe angakhala, ndipo adakhala naye ntsiku mwiyo. Apa nkuti nthawe iri cha m’ma 16 ora. 40 Andireya mbale wake wa Simoni Petulo, wenze m’bodzi mwa awiri mwawo omwe adabva vomwe Yohani adanena nkulondola Yesu. 41 Pakuyamba, iye adagumana na m’bale wake Simoni ndipo adamuuza kuti: “Ise tagumana Mesiya” (dzina mweyi akaitsumbudzulira itanthauza, “Khrisitu”), 42 ndipo adayenda naye kwa Yesu. Yesu padamunyang’ana adati: “Iwepo ndiwe Simoni mwana wa Yohani, dzina yako ikhale Kefa” (yomwe kutsumbudzulira kwake ni “Petulo”).

43 Mangwana yake, Yesu adaganiza vakuti ayende ku Galileya. Pamwapo adagumana na Filipo nkumuuza kuti: “Ukhale wotewera wangu.” 44 Filipo wenze waku Betsaida, thaundi yomwe kudachokera Andireya na Petulo. 45 Patsogolo pake Filipo adagumana na Natanayeli nkumuuza kuti: “Ise tagumana Yesu, mwana wa Yosefe, waku Nazareti. Chilamulo cha Mose komasoti na vomwe aneneri adanemba vifotokoza va iye.” 46 Koma Natanayeli adamubvunza kuti: “Ko mu Nazareti mungachoke munthu aliyese wabwino?” Filipo adamuuza kuti: “Nabo ukaone.” 47 Yesu padaona kuti Natanayeli ankubwera kwenze iye, adanena kuti: “Onani munthu waku Izirayeli shuwa, yemwe mwa iye mulibe chinyengo.” 48 Natanayeli adamubvunza kuti: “Mwanidziwa tani?” Yesu adamudawira kuti: “Filipo akanati kukuchemera, ine nakuona uli m’nyantsi mwa muti wa nkuyu ule.” 49 Natanayeli adamudawira kuti: “Mpfunzisi,* ndimwe Mwana wa Mulungu, ndimwe Mpfumu ya Izirayeli.” 50 Yesu adamudawira kuti: “Ko wakhulupirira ndawa nakuuza kuti nakuona uli m’nyantsi mwa muti wa nkuyu? Udzawone vinthu vikulu kuposha vimwevi.” 51 Patsogolo pake adamuuza kuti: “Shuwa ninkukuuzani wanthu imwe, mudzawone kudzulu kuli funguke, angelo wa Mulungu akukwera na kubuluka kuyenda komwe kuli Mwana wa munthu.”