Kalata yoyamba yoyenda kwa Atesalonika

5 Koma manje va nthawe abale, munkufunikalini kuti tikunembereni chirichose. 2 Ndawa imwepo mukudziwa bwinobwino kuti ntsiku ya Yahova* idzabwere ndendende ninge mbava usiku. 3 Akadzandonena kuti: “Ntendere na chitetezo!” nthawe mwiyoletu adzadzongewe. Tsoka mweyi idzawabwerere modzidzimusa ninge ululu womwe nkazi wamimba akubva akakhala pang’ono kubereka ndipo adzapulumukelini. 4 Koma imwepo abale mulilini mumdima kuti ntsiku mwiyo idzakudzidzimuseni ninge momwe mbava zidzidzimukira zikachenedwa. 5 Ndawa mose imwepo ndimwe wana wa kugwerewera komasoti wana wa masikati. Ndiselini wa usiku panango wa mdima.

6 Ndipomwapa osati tipitirize kugona ninge momwe anango wose ankuchitira, koma tipitirize kukhala maso ndipo tipitirize kukhala oganiza bwino. 7 Ndawa omwe akugona agona usiku ndipo omwe aledzera, aledzera usiku. 8 Koma isepano omwe ndise wa masikati, tipitirize kukhala oganiza bwino ndipo tivale chodzitetezera pachifuwa cha chikhulupiriro na chikondi. Tivale pomwe chidikhiro cha chipulumuso ninge chisote, 9 ndawa Mulungu alibe kutisankhula kuti adzatilange, koma adatisankhula kuti tidzapulumuke ndawa ya vomwe Ambuya wathu Yesu Khrisitu adachita. 10 Iye adatifera, kuti peno tikhale maso panango tigone,* tikhale na moyo pabodzi na iye. 11 Ndipomwapa pitirizani kunyamalisana na kulimbikisana ninge momwe munkuchitira.

12 Manje tinkukukumbirani abale, kuti mumbalemekeze wanthu omwe ankuphata basa mwakhama pa gulu yanu, omwe akutsogolerani mwa Ambuya komasoti kukulangizani. 13 Mumbawawonese chikondi komasoti ulemu ukulu ndawa ya basa yawo. Mumbakhale mwantendere pa gulu yanu. 14 Komasoti tikukulimbikisani abale, kuti mumbachenjeze wanthu wochita vinthu vosalongosoka, mumbayankhule molimbikisa kwa wanthu omwe anankhawa,* mumbathandize ofoka, mumbakhale odekha kwa wose. 15 Wonesesani kuti ayi kuti pagumanike wobwezera choipa pa choipa kwa aliyese, koma nthawe zose mumbayesese kuchita vabwino kwa atumiki wa Mulungu anzanu na kwa anango wose.

16 Mumbakhale okondwa nthawe zose. 17 Mumbapemphere nthawe zose. 18 Mumbatembeje pa chirichose. Mulungu akufuna kuti mumbachite vimwevi ndawa ndimwe ateweri wa Yesu Khrisitu. 19 Ayi kuthimwa moto wa mzimu. 20 Ayi kumbanyoza mawu yoneneratu vakutsogolo. 21 Mumbafagefage vinthu vose nkutsimikizira kuti vabwino ni viponi ndipo phatisisani mwamphanvu vabwino ivo. 22 Mumbapewe voipa vakhaindi iliyose.

23 Mulungu yemwe ni wantendere akupatuleni kuti muchite utumiki wake. Ndipo pa mbali zose abale, moyo wanu komasoti thupi yanu, vikhale vosapunduka na vosaphonyeka pa chirichose, pa nthawe ya kukhalapo kwa Ambuya wathu Yesu Khrisitu. 24 Yemwe ankukuchemerani ni wokhulupirika ndipo adzachitedi vimwevi.

25 Abale, pitirizani kutipempherera.

26 Mupereke moni kwa abale wose ndipo mupasane bejo na ntima wochena.

27 Ninkukukumbirani mwa Ambuya kuti kalata mweyi iwerengewe kwa abale wose.

28 Kukoma ntima kukulu kwa Ambuya wathu Yesu Khrisitu kukhale namwe.