Vomwe atumi adachita
4 Pomwe Petulo na Yohani angayankhula na wanthu mwawo, antsembe, wonyang’anira kachisi na Asaduki adafika. 2 Iwo adakalipa ndawa wanthu mwawo angapfunzisa wanthu na kulalikira mosapita m’mbali vakuti Yesu adamukisiwa. 3 Pamwapo adawaphata* nkuwafungira mudjeri mpakana mangwana yake, ndawa kwenze kudadoka kale. 4 Koma wanthu azinji omwe adabvesera mawu yawo adakhulupirira, ndipo chiwerengero cha amuna chidathamangira 5000.
5 Mangwana yake, wolamulira, akulu komasoti alembi adasonkhana ku Yerusalemu. 6 Penze pomwe Anasi wantsembe nkulu, Kayafa, Yohani, Alekizanda na wanthu wose womwe enze azibale wa wantsembe nkulu muyo. 7 Pamwapo adaimilirisa Petulo na Yohani pakati pawo nkuwabvunza kuti: “Ko mphanvu zochitira vimwevi mwazitenga kuponi, panango mwachita vimwevi mudzina ya mbani?” 8 Petulo, padadzadziwa na mzimu uchena, adawadawira kuti:
“Imwepo wolamulira komasoti akulu, 9 peno lero tinkubvunziwa pa vinthu vabwino vomwe tachitira munthu wopunduka moyu ndipo mukufuna kudziwa kuti wamupolesa nimbani, 10 dziwani Aizirayeli mose imwe, kuti mu dzina ya Yesu Khrisitu waku Nazareti ule, yemwe imwepo mudamuphera pamuti, koma yemwe Mulungu adamumukisa, pakuphatisa basa iye munthu moyu waima patsogolo panu ali bwinobwino. 11 Yesu muyu ni ‘mwala womwe imwepo womanga nyumba mudauwona ninge ulibe na basa, yemwe manje wakhala mwala wapakhona wofunika maninge.’ 12 Komasoti palibe munthu aliyese yemwe angatipulumuse, ndawa palibe dzina inango padziko yapasi yomwe yaperekewa kwa wanthu yomwe ingatipulumuse.”
13 Padawona kuti Petulo na Yohani ankuyankhula molimba ntima komasoti padakumbukira kuti enze wosapfunzira koma ni wanthumbo basi, adadabwa maninge. Ndipo adazindikira kuti ambafamba na Yesu. 14 Manje pakuti munthu wopolesewa ule wenze adaimambo pamwapo, iwo adasowa chonena. 15 Pamwapo adawalamula kuti abule munyumba ya Tiribunali Ikulu ya Ayuda, ndipo adayamba kukambirana 16 kuti: “Tichite nawo chani wanthu mwawa? Iwo achita chizindikiro chikulu mwakuti wanthu wose wa ku Yerusalemu awona. Ndipo isepano tingatsutselini vimwevi. 17 Manje kuti nkhani mweyi osati ipitirize kufalikira kwa wanthu anango, naboni tiwagopsye kuti osati adzayankhule pomwe mu dzina mweyi kwa munthu munango aliyese.”
18 Padateno adawachemera nkuwalamula kuti osati ayankhule pomwe panango kupfunzisa mu dzina ya Yesu. 19 Koma Petulo na Yohani adawadawira kuti: “Weruzani mwekha, peno viribwino pamaso pa Mulungu kubvera imwepo m’malo mobvera Mulungu. 20 Koma isepano tingasiyelini kuyankhula va vinthu vomwe tidaviona na kuvibva.” 21 Pamwapo padawagopsya pomwe, adawamasula, ndawa alibe kuwagumana na mulandu uliwose kuti awapase chilango. Komasoti ambagopa wanthu, mwakuti wanthu wose ambatamanda Mulungu ndawa ya* vomwe vidachitika. 22 Ndawa munthu moyu yemwe adapolesewa modabwisa wenze na magole yoposha 40.
23 Padawamasula adayenda kwa okhulupirira anzawo, ndipo adawafotokozera vose vomwe antsembe akulu na akulu adawauza. 24 Padabva vimwevi, wose adakuwa kwa Mulungu kuti:
“Ambuya Nkulu maninge, imwepo ndimwe mudakonza kudzulu na dziko yapasi, nyanja na vose vomwe vikhala mumo. 25 Pophatisa basa mzimu uchena, imwepo mudanena pophatisa basa pakamwa pa m’bereki wathu Davide ntumiki wanu kuti: “Ndawa chani wanthu wa makhaindi yanango ankuchita chipiringu ndipo ndawa chani makhaindi ya wanthu yankuganizira vinthu viribe basa? 26 Mafumu ya dziko yapasi yadaima pamalo pawo, ndipo wolamulira adasonkhana mobverana kuti alimbane na Yahova* komasoti wodzodzewa wake.’ 27 Vimwevi vidachitikadi pomwe Herode, Pontiyo Pilato, wanthu wa khaindi inango komasoti wanthu wa mu Izirayeli, adasonkhana mu thaundi mweyi nkudzudza Yesu, ntumiki wanu wochena, yemwe imwepo mudamudzodza. 28 Adasonkhana kuti achite vomwe imwepo mudaneneratu. Vimwevi vidachitika ndawa imwepo munamphanvu komasoti ndawa venze vobverana na vofuna vanu. 29 Koma manje Yahova,* bvani momwe ankutigopsyera ndipo tithandizeni ise akapolo wanu kuti tipitirize kuyankhula mawu yanu molimba ntima. 30 Pitirizani kupolesa wanthu na djanja yanu komasoti kuthandiza kuti vodabwisa vipitirize kuchitika mu dzina ya Yesu ntumiki wanu wochena.”
31 Padamaliza kupemphera mogwigwirira, malo yomwe adasonkhana mwayo yadagunduzika. Patsogolo pake wose adadzadziwa na mzimu uchena ndipo adayamba kuyankhula mawu ya Mulungu molimba ntima.
32 Komasoti, wose womwe adakhulupirira enze na maganizo yolingana. Palibe aliyese yemwe ambanena kuti vinthu vomwe wenze navo venze vake yekha. Vose vomwe enze navo venze va wose. 33 Komasoti, atumi mwawo adapitiriza kuchitira umboni mwamphanvu maninge va kumuka kwa Ambuya Yesu. Ndipo Mulungu angawawonesa wose mwawo kukoma ntima kukulu. 34 Ndipo palibe aliyese yemwe angasowa kanthu. Wose omwe enze na minda panango nyumba, ambagulisa nkubweresa kobiri mwizo. 35 Ndipo ambazipereka kwa atumi. Kobiri mwizo ambazipereka kwa aliyese mobverana na vomwe ambafunikira. 36 Manje Yosefe, yemwe adamupasa dzina yakuti Baranaba, kutanthauza kuti: “Mwana wonyamalisa,” yemwe wenze pomwe Mulevi wobadwira ku Kupuro, 37 wenze na munda. Iye adagulisa munda muyo nkubweresa kobiri mwizo kudzazipereka kwa atumi.