Kwa Aroma
12 Ndipomwapa abale, ninkukudandaulirani na chifundo chikulu cha Mulungu kuti mupereke mathupi yanu ninge ntsembe yamoyo, yochena komasoti yobvumizika kwa Mulungu, yomwe ni utumiki wopatulika pakuphatisira basa buya ya kuganiza. 2 Ayi kumbatengera nzeru za nthawe ino,* koma khalani munthu m’nyowani pa kuchinja maninge maganizo yanu kuti muzindikire chifuniro cha Mulungu, chabwino, chobvumizika na changwiro.
3 Ndawa ya kukoma ntima kukulu komwe Mulungu adaniwonesa, ninkuuza aliyese wa imwepo kumuko kuti ayi kumbadziganizira kuposha momwe mufunika kumbadziganizirira. Koma aliyese ambaganize mwanzeru nkumbadziweruza mobverana na chikhulupiriro chomwe Mulungu wamupasa. 4 Thupi ikhala na vidzo vizinji, koma vidzo vimwivo viphatalini basa yolingana. 5 N’chibodzibodzimbo isepano, olo kuti tilipo azinji, ndise thupi ibodzi mwa Khrisitu ndipo ndise vidzo volumatidzana. 6 Tinamphaso zosiyanasiyana mobverana na kukoma ntima kukulu komwe tidawonesewa. Ndipomwapa peno tinamphaso yonena vakutsogolo, naboni tivinene mobverana na chikhulupiriro chathu. 7 Peno tiri na mphaso ya utumiki, naboni tichite utumiki uyo. Yemwe apfunzisa, apitirize kupfunzisa. 8 Yemwe alimbikisa, apitirize kulimbikisa. Wogawa, ambagawe mosaumira. Wotsogolera, ambatsogolere mwakhama. Ndipo wowonesa chifundo, ambachite vimwevo mokondwa.
9 Chikondi chanu ayi kuti chikhale chabodza. Mumbanyantsiwe na voipa nkumbayesesa kuchita vabwino. 10 Pakukonda abale, mumbakhale na chikondi chaicho. Pankhani yowonesana ulemu, mumbayambe ndimwepo. 11 Khalani wakhama osati waulesi. Gakani na mzimu. Tumikirani Yahova* ninge akapolo. 12 Kondwani ndawa ya chidikhiro. Mumbapirire mabvuto. Mumbalimbikire kupemphera. 13 Gawanani na wochena mobverana na vomwe ankusowa. Khalani na ntima wotambira alendo. 14 Pitirizani kudalisa wanthu womwe ankukudzudzani. Mumbadalise, osati kutemberera. 15 Mumbakondwe na wanthu womwe ankukondwa ndipo mumbalire na wanthu womwe ankulira. 16 Mumbawone anango ninge momwe imwepo mudziwonera. Ayi kumbaganiza modzikuza, koma khalani na ntima wodzichepesa. Ayi kumbadziwona ninge anzeru.
17 Ayi kumbabwezera choipa pa choipa. Mumbaganizire vomwe wanthu wose aviwona kuti ni vabwino. 18 Peno ni vokwanisika, yesesani momwe mungakwanisire kuti mumbakhale mwantendere na wanthu wose. 19 Abale wapamoyo, ayi kumbabwezera voipa, koma siyirani mpata ukali wa Mulungu. Ndawa Malemba yanena kuti: “‘Kubwezera ni kwangu, nidzawabwezere ndinepano,’ wanena teno Yahova.”* 20 Koma peno mzondi wako ananjala, mupase chakudya. Peno ananyota, mupase chakumwa. Ndawa ukachita teno udzamuunjikire masimbe ya moto pa msolo pake.”* 21 Ayi kubvuma kuti choipa chikuwineni, koma pitirizani kuwina choipa pakuchita chabwino.