Wonembewa na Mateyu
20 Ufumu wakudzulu uli ninge munthu yemwe wenze na munda wa uva, yemwe adabesera maninge kukafaga wanthu waganyu kuti akaphate basa m’munda wake wa uva. 2 Waganyu mwawa padabverana nawo kuti ambawapase kobiri ya dinari* ibodzi pantsiku, adawatumiza kumunda wake wa uva. 3 Cha m’ma 9 ora* adayenda kukafagafaga wanthu anango ndipo adawona anango andoimambo m’mphepete mwa nsewu alibe chochita. 4 Amwawa adawauza pomwe kuti: ‘Yendanimbo mukaphate basa m’munda wa uva. Nikupaseni malipiro yabwino.’ 5 Pamwapo iwo adayenda. Cha m’ma 12* na m’ma 15 ora, munikachiro wa munda ule adayenda pomwe kukachita chibodzibodzi. 6 Pamapeto pake, cha m’ma 17 ora adayenda pomwe ndipo adakagumana anango andoimambo. Iye adawabvunza kuti: ‘Ndawa chani mwandoima pano ntsiku yose osaphata basa?’ 7 Iwo adamudawira kuti: ‘Ndawa palibe yemwe watipasa ganyu.’ Iye adawauza kuti: ‘Imwepo yendanimbo kumunda wangu wa uva.’
8 “Maulo mwayo, munikachiro wa munda wa uva ule adauza wonyang’anira basa kuti: ‘Chemera waganyu wose uwapase malipiro yawo, kuyambira womalizira, nkumalizira na woyambirira wale.’ 9 Wanthu womwe adayamba kuphata basa 17 ora wale padafika, aliyese adatambira dinari* ibodzi. 10 Woyambirira wale padafika, adaganiza kuti atambire zizinji, koma nawombo malipiro yomwe adatambira yenze dinari* ibodzi. 11 Padatambira adayamba kudandaulira munikachiro wa munda wa uva ule 12 kuti: ‘Omalizira awa andophata basa ora ibodzi basi, koma mwawapasa malipiro yolingana na yamwapasa ise womwe tafondoka na basa ntsiku yose pa dzuwa!’ 13 Koma podawira m’bodzi wa iwo, munikachiro wa munda ule adati: ‘Nakuphonyera chani? Tapangana malipiro ya dinari* ibodzi, ntenolini? 14 Ndotambira kobiri yako umbayende. Ninkufuna kupasa womalizira uyu malipiro yolingana na yanapasa iwepo. 15 Ko niribe ufulu wosalula vochita na vinthu vangu? Panango diso yako inkuchita njiru ndawa yakuti ndine wabwino?’ 16 Ndipomwapa womalizira adzakhale woyambirira ndipo woyambirira adzakhale womalizira.”
17 Ali munjira kuyenda ku Yerusalemu, Yesu adawatengera pambali wopfunzira wake 12 wale nkuwauza kuti: 18 “Manje tinkuyenda ku Yerusalemu ndipo Mwana wa munthu akaperekewe kwa antsembe akulu na alembi. Iwo akamuweruze kuti aphewe 19 ndipo akamupereke kwa wanthu wa makhaindi yanango kuti amuchitire voipa, kumukwapula na kumumanika pamuti ndipo pa ntsiku yachitatu adzamukisiwe.”
20 Patsogolo pake nkazi wa Zebedayo adafika kwa Yesu na wana wake amuna ndipo adamugwadira* nkumukumbira kanthu kanango. 21 Iye adabvunza mayi ule kuti: “Munkufuna chani?” Mayi ule adadawira kuti: “Polomisani kuti wana wangu amuna awiri awa, m’bodzi adzakhale ku djanja yanu yamakulu ndipo munango adzakhale kudjanja yanu yamadzere mu Ufumu wanu.” 22 Yesu adadawira kuti: “Munkudziwalini chomwe munkukumbira. Ko mungamwe chomwe inepano nakhala pang’ono kumwa?” Iwo adadawira kuti: ‘Inde tingamwe.” 23 Iye adawauza kuti: “Inde mudzamwedi vomwe inepano nakhala pang’ono kumwa. Koma ine niribe udindo wosalula yemwe adzakhale kudjanja yangu yamakulu panango yamadzere. Ababa wangu adzapereke mwayi muyo kwa womwe adawakonzera.”
24 Opfunzira 10 anango wale padabva vimwevi, adakalipa maninge ndawa ya vomwe amuna awiri wale wa pachibale adachita. 25 Koma Yesu adawachemera nkuwauza kuti: “Imwepo munkudziwa kuti wolamulira wa wanthu wa khaindi inango apondereza wanthu wawo ndipo akuluakulu awonesa mphanvu zawo pa iwo. 26 Vimwevi vifunikalini kukhala teno pagulu yanu. Koma aliyese yemwe ankufuna kuti akhale nkulu pa gulu yanu, afunika kukhala ntumiki wanu 27 ndipo yemwe ankufuna kuti akhale woyambirira pa gulu yanu, afunika kukhala kapolo wanu. 28 Vimwevi vinkulingana na vomwe Mwana wa munthu adachita. Iye alibe kubwera padziko kudzatumikiriwa, koma kudzatumikira na kudzapereka moyo wake kuti ukhale malipiro* yowombola wanthu azinji.”
29 Pangabula mu Yeriko, gulu ikulu ya wanthu idamulondola. 30 Manje amuna awiri womwe enze na bvuto yosawona, adakhala pasi m’mphepete mwa nsewu ndipo padabva kuti Yesu ankugwata adakuwa kuti: “Ambuya, Mwana wa Davide, tichitireni chifundo!” 31 Pamwapo gulu ya wanthu ire idawakalipira nkuwauza kuti akhale chete. Koma iwo alibe kuwabvera ndipo adapitiriza kukuwa maninge kuti: “Ambuya, Mwana wa Davide, tichitireni chifundo!” 32 Pamwapo Yesu adaimirira ndipo adawachemera nkuwabvunza kuti: “Munkufuna kuti nikuchitireni chani?” 33 Iwo adamudawira kuti: “Ambuya, tithandizeni kuti tiyambe kuwona.” 34 Padawabvera ntsisi, Yesu adaphata maso yawo. Nthawe mwiyoletu wanthu womwe enze na bvuto yosawona wale adayamba kuwona ndipo adamutewera.