Wonembewa na Yohani
10 “Shuwa ninkukuuzani, wongena m’khola ya nkhosa mochita kukwera pa malo yanango osati kungena na pansuwo, muyo ni wakuba komasoti wotengera wanthu vinthu. 2 Koma yemwe angena na pansuwo ni nyakabusa wa nkhosa mwizo. 3 Gwarda wa pansuwo amufungulira ndipo nkhosa zibvera mawu yake. Nkhosa zake izo azitomola madzina nkuzitsogolera nkubula nazo. 4 Akabulisa nkhosa zake zose kunja, azitsogolera ndipo nkhosa izo zimulondola, ndawa zidziwa mawu yake. 5 Zidzalondolelini mulendo koma zidzamuthawe, ndawa zidziwalini mawu ya alendo.” 6 Yesu adanena chitsanzo chimwechi kwa iwo, koma iwo alibe kubvesa tanthauzo ya vomwe angawauza.
7 Pamwapo Yesu adawauza pomwe kuti: “Shuwa ninkukuuzani, inepano ndine nsuwo womwe nkhosa zingenerapo. 8 Wose womwe abwera nkumbanama kuti ni anyakabusa chaiwo, ni wakuba komasoti wotengera vinthu wanthu anango ndipo nkhosa zilibe kuwabvera. 9 Inepano ndine nsuwo. Aliyese wongena kupitira mwa ine adzapulumuke ndipo ambadzangene na kubula kukagumana nsipu. 10 Wakuba abwera na cholinga chofuna kudzaba, kudzapha na kudzadzonga. Koma ine nabwera kuti nkhosa zikhale na moyo nakuti zikhale nawo wokhalisa. 11 Inepano ndine nyakabusa wabwino. Nyakabusa wabwino apereka moyo wake ndawa ya nkhosa. 12 Munthu waganyu yemwe ni nyakabusalini ndipo nkhosa mwizo ni zakelini, akawona mphumphi ikubwera asiya nkhosa mwizo nkuthawa. Pamwapo mphumphi mwiyo iziphata ndipo zimwazikana. 13 Achita vimwevi ndawa iye ni waganyu ndipo asamaliralini nkhosa mwizo. 14 Inepano ndine nyakabusa wabwino. Nkhosa zangu nizidziwa ndipo nazombo zinidziwa, 15 ninge mwaviliri kuti Ababa anidziwa ndipo inembo niwadziwa. Ndipomwapa ninkupereka moyo wangu ndawa ya nkhosa mwizo.
16 Ninankhosa zinango zomwe ni zamukholalini mweyi. Zimwezo ninkufunika kuzibweresa pomwe ndipo zidzabve mawu yangu. Zidzakhale gulu ibodzi ndipo nyakabusa wawo adzakhale m’bodzi. 17 Ababa anikonda ndawa yakuti ninkupereka moyo wangu kuti nikautambire pomwe. 18 Palibe munthu yemwe ankuchosa moyo wangu, koma ninkuupereka mwa kufuna kwangu. Ninamphanvu za kuupereka komasoti ninamphanvu zoutambira pomwe. Ababa wangu ndiwo womwe adanilamula kuti nichite vimwevi.”
19 Pamwapa pomwe Ayuda alibe kubvesesana ndawa ya mawu mwaya. 20 Azinji ambanena kuti: “Moyu anachiwanda ndipo ni wofuntha. Ndawa chani munkumubvesera?” 21 Anango adanena kuti: “Yamwaya ni mawulini ya munthu wophatiwa na chiwanda neye. Ko chiwanda chingafungule maso ya wanthu wosawona?”
22 Panthawe mwiyo mu Yerusalemu mudachitika Chikondwerero chopereka kachisi kwa Mulungu. Yenze nthawe yozizira maninge 23 ndipo Yesu angafamba mu kachisi mumo, mu khonde ya Solomo yomwe yenze na vipilala. 24 Pamwapo Ayuda adamuzinga nkuyamba kumuuza kuti: “Ko iwepo utisokoneze maganizo mpakana lini? Peno ndiwedi Khrisitu, ndotiuza mosabisa.” 25 Yesu adawadawira kuti: “Nakuuzani kale, koma imwepo munkunikhulupiriralini. Basa zomwe ninkuzichita mudzina ya Ababa wangu zikunichitira umboni. 26 Koma imwepo munkunikhulupiriralini ndawa ndimwelini nkhosa zangu. 27 Nkhosa zangu zikubva mawu yangu. Ine nizidziwa ndipo nkhosa mwizo zinilondola. 28 Nidzazipase moyo wosapera ndipo zidzadzongekelini, komasoti palibe yemwe adzazidjomphole mu djanja yangu. 29 Nkhosa zomwe Ababa wangu adanipasa ni zofunika kuposha vinthu vinango vose ndipo palibe yemwe angazidjomphole mu djanja ya Ababa. 30 Ine na Ababa ndise abodzi.”*
31 Pamwapa pomwe Ayuda mwawo adalokota minyala kuti amubome.* 32 Yesu adawauza kuti: “Nakuwonesani basa zizinji zabwino zochokera kwa Ababa. Manje munkufuna kuniboma ndawa ya basa iponi pa basa zimwezi?” 33 Ayuda mwawo adamudawira kuti: “Tinkufunalini kukuboma ndawa ya basa yabwino, koma ndawa yonyoza Mulungu. Iwepo ndiwe munthumbo basi, koma unkudziyesa mulungu.” 34 Yesu adawabvunza kuti: “Ko mu Chilamulo chanu alibe kunembamo kuti: ‘Ine nanena kuti: “Imwepo ndimwe milungu”’?* 35 Peno wanthu womwe adatsutsiwa na mawu ya Mulungu yomwe yamalalini mphanvu, adawachemera kuti ‘milungu,’ 36 ko imwepo munkuniuza inepano yemwe Ababa adanichenesa nkunitumiza mudziko kuti: ‘Unkunyoza Mulungu,’ ndawa nanena kuti: ‘Ndine Mwana wa Mulungu’? 37 Peno nichitalini basa za Ababa wangu, ayi kunikhulupirira. 38 Koma peno ninkuzichita, podiya kuti munkunikhulupiriralini, khulupirirani basa izo, kuti mudziwe na kupitiriza kudziwa kuti Ababa na ine ndise wobverana.” 39 Pamwapa ambafuna pomwe kumuphata koma adawathawa.
40 Iye adayambuka pomwe Yorodano nkuyenda komwe Yohani ambabatizira poyamba ndipo adakhala kumuko. 41 Wanthu azinji adabwera kwa iye nkuyamba kunena kuti: “Yohani alibe kuchita chizindikiro chilichose, koma vose vomwe Yohani adanena pankhani ya munthu moyu venze vazedi.” 42 Pamwapo wanthu azinji kumuko adamukhulupirira.