Kwa Aroma
5 Pakuti manje tinkuwonewa kuti ndise wolungama ndawa yakukhala na chikhulupiriro, tingakwanise kukhala pantendere na Mulungu kupitira mwa Ambuya wathu Yesu Khrisitu. 2 Kukhulupirira Yesu kutithandiza kuti timbakwanise kufika kwa Mulungu komasoti timbakhale wokondwa na kukoma ntima kwake kukulu. Ndipo tingakwanise kukondwa ndawa tiri na chidikhiro chotambira ulemerero wa Mulungu. 3 Nimwevolini vokha, koma tingakwanise pomwe kukondwa tikagumana na mabvuto ndawa tinkudziwa kuti mabvuto yathu yatichitisa kuti tipirire. 4 Kupirira kutichitisa kuti tikhale wobvumizika kwa Mulungu ndipo kukhala mobvumizika kwa Mulungu kutichitisa kuti tikhale na chidikhiro. 5 Chidikhiro mwicho chitikalipisalini ndawa Mulungu awonesa kuti atikonda pakuphatisa basa mzimu uchena womwe atipasa.
6 Pomwe tenze tilibiretu pophata, Khrisitu adafera wanthu osatumikira Mulungu panthawe yomwe adakonzeratu. 7 Ndawa ni voshupa kuti munthu munango afere munthu wolungama. Koma panango munthu angalimbe ntima kufera munthu wabwino. 8 Koma Mulungu akutiwonesa chikondi chake, ndawa petenze wochimwa, Khrisitu adatifera. 9 Komasoti adzachite voposha pamwapo potipulumusa ku ukali wake pakuphatisa basa Khrisitu, pakuti tinkuwonewa wolungama ndawa ya magazi ya Khrisitu muyo. 10 Peno tidabveranisiwa na Mulungu pakuphatisa basa impfa ya mwana wake panthawe yomwe tenze azondi, ndiye kuti tidzapulumusiwe na moyo wake, pakuti manjeuno tabveranisiwa. 11 Ndipo nivimwevolini vokha, koma tikondwa pomwe ndawa ya ushamwali wathu na Mulungu kupitira mwa Ambuya wathu Yesu Khrisitu, yemwe tabveranisiwa na Mulungu pakuphatisira basa iye.
12 Uchimo udangena mudziko kupitira mwa munthu m’bodzi ndipo uchimo muyo udabweresa impfa. Ndipomwapa impfa mwiyo idafalikira kwa wanthu wose ndawa wose adachimwa . . . 13 Chilamulo chikalibe kubwera, uchimo wenzemo kale mu dziko, koma munthu angagumaniwelini kuti anamulandu wakuti wachita chimo peno palibe lamulo. 14 Olo kuti viri teno, impfa idalamulira ninge mpfumu kuyambira nthawe ya Adamu mpakana nthawe ya Mose, komasoti kwa wanthu womwe alibe kuchimwa ninge momwe adachimwira Adamu, yemwe ni wolingana na yemwe ambabwera.
15 Koma momwe viriri na mphaso mweyi, ndimolini mwevenzere na uchimo muyo. Wanthu azinji adafa ndawa ya uchimo wa munthu m’bodzi. Koma kukoma ntima kukulu kwa Mulungu komasoti mphaso yake ya fovolo yomwe adaipereka mokoma ntima pophatisira basa munthu m’bodzi, Yesu Khrisitu, ni vapadzulu maninge. Pakuphatisira basa mphaso mweyi, Mulungu adzapereke madaliso yazinji kwa wanthu azinji. 16 Pali kusiyana pomwe pakati pa mphaso ya fovolo na momwe vinthu vidachitikira pakuphatisira basa munthu m’bodzi yemwe adachimwa. Chiweruzo cha chimo ibodzi ire chidabweresa uchimo kwa wose, koma mphaso yomwe idaperekewa ndawa ya machimo yazinji, idachitisa kuti wanthu ambawonewe kuti ni wolungama. 17 Impfa idalamulira ninge mpfumu ndawa ya uchimo wa munthu m’bodzi muyo. Koma wanthu womwe atambira kukoma ntima kukulu kwa Mulungu na mphaso yake ya fovolo yachilungamo, adzakhale na moyo kuti alamulire ninge mpfumu kupitira mwa munthu m’bodzi moyu, Yesu Khrisitu.
18 Ndipomwapa, ninge momwe vidakhalira kuti uchimo ubodzi udachitisa kuti wanthu wosiyanasiyana aweruziwe kuti ni wochimwa, kuchita chinthu chibodzi cholungama kwachitisa pomwe kuti wanthu wosiyanasiyana awonewe kuti ni wolungama kuti akhale na moyo. 19 Pakuti kuleka kubvera kwa munthu m’bodzi muyo kudachitisa kuti azinji akhale wochimwa, kubvera kwa munthu m’bodzi moyu kudzachitise pomwe kuti wanthu azinji akhale wolungama. 20 Chilamulo chidaperekewa kuti kuchimwa kwa wanthu kuwonekere. Koma pomwe uchimo udawonekera, kukoma ntima kukulu kwa Mulungu kudaingizirika maninge. 21 Ndawa chani? Ndawa ninge momwe uchimo na impfa vidatongera ninge mpfumu, nchibodzibodzi na kukoma ntima kukulu kwa Mulungu, kutongembo ninge mpfumu mwakutsogolerewa na chilungamo. Ndipo vimwevi vidzachitise kuti wanthu agumane moyo wosapera kupitira mwa Yesu Khrisitu Ambuya wathu.