Kwa Aefeso
6 Wanamwe, mumbabvere azibereki wanu mobverana na vomwe Ambuya afuna, ndawa kuchita vimwevi ni kwabwino. 2 “Mumbalemekeze ababa wanu na amayi wanu.” Imwiyi ni lamulo yoyamba yokhala na polomisi. Polomisi yake ni yakuti: 3 “Kuti vinthu vikufambireni bwino, komasoti kuti mukhale na moyo utali padziko yapasi.” 4 Imwepo ababa, ayi kumbakalipisa wana wanu, koma pitirizani kuwalera pakuwapasa malangizo na kuwapfunzisa mobverana na vomwe Yahova* anena.
5 Imwepo akapolo, mumbabvere wanthu omwe ni mabwana yanu. Mumbawagope na kuwalemekeza na moyo wose, ninge momwe muchitira na Khrisitu. 6 Ayi kumbachita vimwevi ndawa yakuti wanthu ankukuonani pakundofuna kuwakondweresa, koma ninge akapolo wa Khrisitu omwe ankuchita chifuniro cha Mulungu na moyo wose. 7 Mumbatumikire mabwana yanu modzipereka ninge munkutumikira Yahova,* osati wanthu, 8 ndawa munkudziwa kuti pa chabwino chirichose chomwe munthu angachite, Yahova* adzamupase malipiro, peno munthu muyo ni kapolo panango ni kapololini. 9 Imwembo mabwana, mumbachitirembo akapolo wanu chibodzibodzi. Ayi kumbawagopsya ndawa munkudziwa kuti bwana wa imwepo na wa akapolo wanu ali kudzulu ndipo alibe tsankho.
10 Pakumalizira ninkunena kuti, pitirizani kugumana mphanvu kuchokera kwa Ambuya ndawa mphanvu zake ni zikulu. 11 Valani vitsulo vose vankhondo vochokera kwa Mulungu kuti osati mugonje polimbana na vochita voipa va Ndyerekezi, 12 ndawa tinkulimbanalini na wanthu wa thupi ya magazi na nyama, koma tinkulimbana na viwanda vomwe viri kudzulu, vomwe ni maboma komasoti maulamuliro yomwe yankutonga dziko mwiyi yomwe iri mumdima. 13 Ndipomwapa, takulani vitsulo vose vankhondo vochokera kwa Mulungu kuti pantsiku yoipa osati mudzagonje komasoti kuti mukadzachita vose bwinobwino, mudzakwanise kulimba.
14 Manje khalani olimba, uku muli mange maninge chonadi nchiuno mwanu ninge bande, nkuvala chodzitetezera pachifuwa chachilungamo, 15 komasoti muli vale ntsapato kumapazi yanu pokonzekera kulengeza ntontholo wabwino wa ntendere. 16 Kuposha vose vimwevi, takulani chovikira chikulu chachikhulupiriro chomwe mudzakwanise kudzimwisira nacho vinthu vose vogaka moto vomwe woipa ankukuthusirani. 17 Komasoti valani chisote cha chipulumuso ndipo takulani chibemba cha mzimu chomwe ni mawu ya Mulungu. 18 Pomwe munkuchita vimwivi, mumbapemphere pa chochitika chirichose mu mzimu pakuphatisa basa pemphero na kugwigwirira kwa khaindi iriyose. Kuti muchite vimwevi, khalani tcheru ndipo nthawe zose mumbapemphere mogwigwirira m’malo mwa ochena wose. 19 Mumbanipemphererembo inepano kuti nikayamba kuyankhula nimbagumane mawu yabwino na cholinga chakuti nimbakwanise kuyankhula molimba ntima nikambalalikira va chintsintsi chopatulika cha ntontholo wabwino, 20 womwe ndine mkhalapakati wake womangiwa na matcheni komasoti kuti niyankhule va ntontholo moyu molimba ntima ninge momwe nifunika kuchitira.
21 Manje, kuti mudziwe pomwe momwe vinthu vinkufambira pamoyo wangu na momwe niliri, Tukiko, m’bale wapamoyo komasoti ntumiki wokhulupirika wa Ambuya, adzakufotokozereni vinthu vose. 22 Namutumiza kwa imwepo na cholinga chimwichi kuti mudziwe va moyo wathu nakuti akunyamaliseni.
23 Ntendere na chikondi komasoti chikhulupiriro vochokera kwa Mulungu Ababa na kwa Ambuya Yesu Khrisitu, vikhale pa imwepo abale. 24 Kukoma ntima kukulu kukhale pa wose omwe awakondadi chaivo Ambuya wathu Yesu Khrisitu.