Vomwe atumi adachita
18 Patsogolo pake Paulo adachoka ku Atene nkuyenda ku Korinto. 2 Kumuko adagumana Muyuda munango dzina yake Akula, waku Ponto. Iye pabodzi na nkazi wake Purisila, enze adandofika manjemanje kuchokera ku Itália ndawa Kalaudiyo wenze adalamula Ayuda wose kuti achoke ku Roma. Pamwapo Paulo adayenda kunyumba kwawo. 3 Pakuti basa yawo yenze ibodzi, adakhala kunyumba kwawo kumuko. Iwo ambaphatira basa pabodzi, ndawa wose enze okonza matenti. 4 Paulo ambakamba nkhani musunagoge ntsiku ya satade iriyose ndipo Ayuda na Agiriki ambakhulupirira.
5 Sila na Timoteyo padafika kuchokera ku Makedoniya, Paulo adatangwanika maninge na basa yolalikira mawu ya Mulungu. Iye ambachitira umboni kwa Ayuda na kuwatsimikizira kuti Yesu ndiyedi Khrisitu. 6 Koma iwo padapitiriza kumutsutsa na kumunyoza, iye adakutumula vovala vake nkuwauza kuti: “Magazi yanu yakhale pamsolo panu. Ine niribe mulandu. Kuyambira manjeuno nimbayende kwa wanthu wa makhaindi yanango.” 7 Pavidateno, iye adachoka kumuko* nkuyenda kunyumba ya munthu munango dzina yake Titiyo Yusito. Munthu moyu ambatumikira Mulungu ndipo nyumba yake yenze pafupi na sunagoge. 8 Kirisipo, mtsogoleri wa sunagoge, adakhulupirira Ambuya pabodzi na wanthu wose wa m’banja yake. Ndipo wanthu azinji wa ku Korinto, omwe adabva ntontholo wabwino, adayamba kukhulupirira nkubatiziwa. 9 Komasoti usiku, Ambuya adauza Paulo m’masomphenya kuti: “Ayi kugopa, pitiriza kuyankhula. Ayi kukhala chete, 10 ndawa inepano niri nawe. Palibe munthu yemwe adzakuguntse na kukudzonga, ndawa ninawanthu azinji muthaundi mweyi.” 11 Pamwapo adakhala kumuko gole na minyezi 6, akuwapfunzisa mawu ya Mulungu.
12 Pomwe Galiyo wenze governador wa Akaya, Ayuda adanyamuka mobverana kuti amuchitire voipa Paulo ndipo adamutenga kuyenda naye ku mpando wotongera milandu. 13 Kumuko iwo adati: “Munthu moyu ankuchitisa wanthu kuti ambatumikire Mulungu mosabverana na chilamulo.” 14 Koma pomwe Paulo ambafuna kuyamba kuyankhula, Galiyo adauza Ayuda mwawo kuti: “Imwe Ayuda, adakati munthu moyu pali chawaphonya panango kupalamula mulandu ukulu, sembe nakubveserani modekha. 15 Koma peno nkhani yake ni yonena va kugegedzana ndawa ya mawu, madzina na chilamulo chanu, vimwivo mumalizane navo mwekha. Inepano nikufunalini kuti nikhale woweruza nkhani zatene.” 16 Padateno adawauza kuti achoke ku mpando woweruzira milandu muyo. 17 Pavidateno, wose adaphata Sositene, mtsogoleri wa sunagoge nkuyamba kumumenya pafupi na mpando woweruzira mulandu muyo. Koma Galiyo wenze alibe navo basa vimwevi.
18 Pazidapita ntsiku Paulo ali kumuko, adalairana na abale mwawo ndipo adapitiriza ulendo wake wa pamadzi kuyenda ku Siriya. Paulendo moyu adayenda pabodzi na Purisila na Akula. Paulo adagera tsitsi yake ku Kenkereya ndawa ya polomisi yomwe adachita. 19 Pamwapo wose adafika ku Efeso, ndipo anzake mwawo adawasiya kumuko. Koma iye yekha adangena musunagoge nkuyamba kukambirana na Ayuda. 20 Olo kuti adamukumbira mobwerezabwereza kuti akhale nawo kwa ntsiku zizinji, iye alibe kubvuma. 21 Koma adalairana nawo, nkuwauza kuti: “Yahova* akabvuma nidzabwere pomwe kudzakuwonani.” Pamwapo adanyamuka ku Efeso ulendo wa panyanja 22 ndipo adafika ku Kaisareya. Patsogolo pake adayenda* kukapereka moni ku mpingo ndipo patsogolo pake adayenda ku Antiokeya.
23 Padakhala kumuko kwakanthawe, adanyamuka nkuyamba kuyenda malo yosiyanasiyana mu chigawo cha Galatiya na Fulugiya ndipo ambalimbikisa wopfunzira wose.
24 Manje Muyuda munango dzina yake Apolo, waku Alekizandiriya, yemwe ambayankhula mwaluso, adafika ku Efeso. Iye ambayadziwa bwino Malemba. 25 Mwamuna moyu adapfunzisiwa mpfundo za Yahova.* Iye wenze wodzipereka maninge ndawa yakuti wenze na mzimu uchena, ndipo ambayankhula na kupfunzisa chaivo pankhani ya Yesu. Koma ambandodziwa va ubatizo wa Yohani wokha. 26 Munthu moyu adayamba kuyankhula molimba ntima musunagoge. Manje Purisila na Akula padamubvesera, adamutenga nkumufotokozera njira chaiyo ya Mulungu. 27 Ndipo, pakuti ambafunisisa kuyenda ku Akaya, abale mwawo adanembera wopfunzira kumuko. Adawalimbikisa kuti amutambire bwino. Iye padafika kumuko, adathandiza maninge wanthu omwe enze adakhulupirira ndawa ya kukoma ntima kukulu kwa Mulungu. 28 Ndawa iye adawatsimikizira Ayuda mosabisa komasoti mwamphanvu kuti enze wophonya, ndipo adaphatisa basa Malemba powonesa kuti Yesu ndiyedi Khrisitu.