Kwa Aheberi
8 Pa vomwe tikunena ivi, mpfundo ikulu ni yakuti: Tiri na nkulu wa antsembe ninge moyu, ndipo iye wakhala kudjanja yamakulu ya mpando wachifumu wa Wolemekezeka kudzulu. 2 Iye ni ntumiki wa m’malo yochena komasoti muchitenti chaicho, chomangiwa na Yahova* osati munthu. 3 Nkulu wa antsembe aliyese aikhiwa kuti ambapereke mphaso komasoti ntsembe. Ndipomwapa muyumbo ambafunika kukhala na chinthu chakuti apereke. 4 Iye adakapitiriza kukhala padziko yapasi adakakhalalini wantsembe, ndawa pali kale amuna opereka mphaso mwizo mobverana na Chilamulo. 5 Utumiki womwe amuna mwawa ankuchita uli ninge chifaniziro ndipo unkuimira vinthu vakudzulu. Vimwevi vinkulingana na lamulo yomwe Mulungu adapasa Mose padasala pang’ono kumanga chitenti. Lamulo yake yenze yakuti: “Uwonesese kuti wakonza vinthu vose motewedza masomphenya yomwe wawonesewa m’phiri.” 6 Koma Yesu watambira utumiki wapadzulu maninge, ndawa iyembo ni mkhalapakati wa pangano yabwino maninge, yomwe yakhazikisiwa mwalamulo pa mapolomisi yabwino pomwe.
7 Adakati pangano yoyamba ire yenze yosaphonyeka, padakafunikalini pomwe pangano yachiwiri. 8 Ndawa Mulungu ankuwona kuti pali vomwe wanthu ankuphonyesa ndipomwapa iye ankunena kuti: “‘Onani! Ntsiku zinkubwera pomwe nidzachite pangano inyowani na banja ya Izirayeli komasoti banja ya Yuda,’ wanena teno Yahova.* 9 ‘Koma idzakhalelini pangano yolingana na yomwe nidachita na azibereki wawo pa ntsiku yomwe nidaphata djanja yawo kuti niwabulise mudziko ya Iguputo. Pakuti alibe kupitiriza kusunga pangano yangu mwiyo, nidasiya kuwasamalira,’ wanena teno Yahova.”*
10 “‘Pangano yomwe nidzachite na banja ya Izirayeli patsogolo pa ntsiku mwizo ni iyi: Nidzaikhe malamulo yangu m’maganizo mwawo na kuyanemba m’mitima yawo. Ine nidzakhale Mulungu wawo ndipo iwo adzakhale wanthu wangu,’ wanena teno Yahova.*
11 ‘Munthu adzapfunziselini pomwe nzika inzake panango m’bale wake kuti: “Mumudziwe Yahova!”* Ndawa aliyese adzanidziwe kuyambira mng’ono mpakana nkulu. 12 Inepano nidzawachitire chifundo pa vochita vawo viribe chilungamo, ndipo nidzakumbukirelini pomwe machimo yawo.’”
13 Pakunena kuti “pangano inyowani,” iye wachitisa kuti pangano yoyamba mwiyo imale basa. Pangano yomwe yamala basa ndipo ikukalamba, ndiye kuti yasala pang’ono kupfudzika.