Wonembewa na Yohani
13 Manje Yesu adadziwiratu chikondwerero cha Pasika chikalibe kufika kuti nthawe yake yochoka mu dziko nkuyenda kwa Ababa yakwana. Ndipo pakuti ambakonda ateweri wake womwe enze mudziko, adawakonda mpakana pamapeto ya moyo wake. 2 Ali nkati mwa kudya chakudya chakumaulo, Ndyerekezi wenze adayikha kale maganizo yofuna kupereka Yesu muntima mwa Yudasi Sikariyoti, mwana wa Simoni. 3 Yesu ambadziwa kuti Ababa adapereka vinthu vose m’manja mwake komasoti kuti adabwera kuchokera kwa Mulungu nakuti ambayenda kwa Mulungu. 4 Panthawe ya chakudya chakumaulo adaimirira ndipo adavula malaya yake yakunja. Patsogolo pake adatenga thaulo* nkuimanga nchiuno mwake. 5 Padateno adathira madzi m’basiya nkuyamba kusambika mapazi ya wopfunzira mwawo komasoti kuwapukuta na thaulo yomwe adaimanga nchiuno ire. 6 Patsogolo pake adafika pa Simoni Petulo. Koma Petulo adabvunza Yesu kuti: “Ambuya, imwepo mukufuna musambike mapazi yangu?” 7 Yesu adadawira kuti: “Vomwe ninkuchita ivi ungavibveselini pakali pano, koma patsogolo pake udzabvese.” 8 Petulo adati: “Shuwa, vikwanisikelini kuti munisambike mapazi yangu.” Yesu adamudawira kuti: “Nikaleka kukusambika, palibe chako kwa ine.” 9 Simoni Petulo adati: “Ambuya, osati munisambike mapazi yokha, koma munisambike pomwe manja na msolo.” 10 Yesu adamuuza kuti: “Yemwe wasamba mthupi andofunika kusamba mapazi yokha basi, ndawa thupi yose ni yochena. Ndipo imwepo ndimwe wochena, koma osati mose imwepo.” 11 Iye ambadziwa munthu yemwe adakonza vakuti amupereke. Ndipomwapa adanena kuti: “Sikuti mose imwepo ndimwe wochena.”
12 Manje padawasambika mapazi yawo nkuvala pomwe malaya yake yakunja yale, adakhazikika pafupi na meza. Pamwapo adawabvunza kuti: “Ko mukudziwa kuti ndawa chani nakusambikani mapazi yanu? 13 Imwepo munichemera kuti: ‘Mpfunzisi’ komasoti ‘Ambuya’ muchita bwino, ndawa ndinedi Mpfunzisi komasoti Ambuya. 14 Manje peno inepano yemwe ndine Ambuya komasoti Mpfunzisi, nasambika mapazi yanu, imwembo mufunika* kusambikana mapazi. 15 Ndawa nakupasani chitsanzo kuti momwe inepano nachitira kwa imwepo, imwembo mumbachite chibodzibodzi. 16 Shuwa ninkukuuzani, kapolo aposhalini abwana wake, ndipo wotumiwa aposhalini yemwe wamutuma. 17 Peno vimwevi mukuvidziwa, mudzakhale wokondwa mukambavichita. 18 Ninkunenalini mose imwepo, ninkudziwa womwe nawasankhula. Koma vimwevi vachitika kuti lemba ikwanirisiwe, yomwe inena kuti: “Munthu yemwe angadya chakudya changu, waimisa katendeni wake kuti anichite choipa.” 19 Kuyambira manjeuno kuyenda kutsogolo, nimbakuuzirentuni vikanati kuchitika, kuti vikadzachitika mudzakhulupirire, kuti vikadzachitika mudzakhulupirire kuti yemwe mumbadikhira ule ndine. 20 Shuwa nikukuuzani, aliyese yemwe watambira yemwe inepano namutuma watambira pomwe ine. Ndipo yemwe watambira inepano, watambira pomwe yemwe adanituma.”
21 Padanena vimwevi, Yesu adashupika maninge muntima, ndipo adachitira umboni kuti: “Shuwa nikukuuzani, m’bodzi pa imwepo anipereke.” 22 Wopfunzira mwawo adayamba kunyang’anana ndawa ambadziwalini kuti akunena mbani. 23 M’bodzi pa wopfunzira mwawo, yemwe Yesu ambamukonda, adakhala pafupi* na Yesu. 24 Pamwapo Simoni Petulo adamugunduzira msolo nkumuuza kuti: “Tiuze, ko akunena mbani?” 25 Pamwapo wopfunzira munango ule adatsamira pachifuwa cha Yesu nkumubvunza kuti: “Ambuya, mukunena mbani?” 26 Yesu adadawira kuti: “Ni yemwe nimupase nkate womwe nisaize.” Pamwapo padasaiza nkate muyo, adapasa Yudasi, mwana wa Simoni Sikariyoti. 27 Yudasi padatambira nkate muyo, adangenewa na Satana. Pamwapo Yesu adamuuza kuti: “Vomwe wakonza kuti uchite, uvichite kankulumize.” 28 Koma pa wanthu womwe adakhala nawo pa meza mwiyo, palibe aliyese adadziwa kuti ndawa chani adamuuza vimwevo. 29 Pakuti Yudasi ambasunga bokosi ya kobiri, anango ambaganiza kuti Yesu ambamuuza kuti: “Ugule vinthu vose vomwe vikufunika pa chikondwerero,” panango kuti apaseko kobiri wanthu wosauka. 30 Manje Yudasi padatambira nkate muyo, adabula nthawe mwiyoletu ndipo wenze usiku.
31 Yudasi padabula, Yesu adati: “Manje Mwana wa munthu walemekezewa, ndipo Mulungu walemekezewa pakuphatisira basa iye. 32 Mulungu amulemekeze ndipo amulemekeze nthawe mwainoletu. 33 Anzangu wapamoyo, nikhale namwe kwa kanthawe kang’ono chabe. Mudzanifagefage, ndipo mobverana na vomwe nidauza Ayuda wale kuti: ‘Komwe inepano nikuyenda mungakwaniselini kufikako,’ manje ninkuuzambo imwepo. 34 Nikukupasani lamulo inyowani, kuti mumbakondane. Ninge momwe inepano nakukonderani, imwepo mumbakondanembo tene. 35 Wose adzadziwe kuti ndimwe wopfunzira wangu peno munkukondana.”
36 Simoni Petulo adamubvunza kuti: “Ambuya, mukuyenda kuponi?” Yesu adadawira kuti: “Komwe nikuyenda unganilondolelini pakali pano, koma udzanilondole kutsogolo.” 37 Petulo adabvunza pomwe kuti: “Ambuya, ndawa chani ningakulondolenilini pakali pano? Nidzapereke moyo wangu ndawa ya imwepo.” 38 Yesu adadawira kuti: “Ko udzapereke moyo wako ndawa ya ine? Shuwa ninkukuuza iwe, tambala akanati kulira unilambe katatu.”