Wonembewa na Maliko

15 Mwakankulumize kumadandakucha, wantsembe akulu pabodzi na akulu, komasoti alembi, kutanthauza Tiribunali yose Ikulu ya Ayuda, adasonkhana pabodzi kuti apangane vati amuchite Yesu. Ndipo padamumanga adayenda kukamupereka kwa Pilato. 2 Pamwapo Pilato adamubvunza kuti: “Ko ndiwe Mpfumu ya Ayuda?” Iye adadawira kuti: “Viri tenoletu, ninge mwamwanenera.” 3 Koma antsembe akulu ambamunamizira vinthu vizinji. 4 Pamwapo Pilato adamubvunza pomwe kuti: “Ko unkusowa chodawira? Ndowona kuwanda kwa milandu yomwe ankukunamizira.” 5 Koma Yesu adandokhala chete basi, ndipo Pilato adadabwa maninge.

6 Pa chikondwerero chilichose, Pilato ambamasula munthu m’bodzi yemwe wanthu akumbira kuti abulisiwe mudjeri. 7 Pa nthawe mweyo munthu m’bodzi dzina yake Baraba, wenze mudjeri pabodzi na wanthu anango opandukira boma. Iwo adapha munthu pa nthawe yomwe ambapandukira boma. 8 Pamwapo gulu ya wanthu idafika nkuyamba kukumbira mobverana na vomwe Pilato angawachitira kale nthawe zose. 9 Iye adawabvunza kuti: “Ko mukufuna kuti nikumasulireni Mpfumu ya Ayuda?” 10 Ndawa Pilato ambadziwa kuti wantsembe akulu adamupereka ndawa ya njiru. 11 Koma olo nteno, wantsembe akulu adalimbikisa wanthu kuti awamasulire Baraba. 12 Pakudawira, Pilato adawabvunza kuti: “Manje uyu yemwe mumuchemera kuti Mpfumu ya Ayuda, nichite naye chani?” 13 Iwo adakuwa pomwe kuti: “Amanikiwe* muyo!” 14 Koma Pilato adapitiriza kuwabvunza kuti: “Ndawa chani? Ko moyu waphonya chani?” Koma wanthu mwawo adapitiriza kukuwa maninge kuti: “Muyo amanikiwe basi!” 15 Padateno, pakufuna kukwanirisa vofuna va wanthu mwawo, Pilato adawamasulira Baraba. Patsogolo pake adalamula kuti Yesu akwapuliwe ndipo adamupereka kuti akamuphe mwakuchita kumumanika pamuti.

16 Masocha yadamutenga nkuyenda naye m’nyumba ya governador. Kumuko adasonkhanisa gulu yose ya masocha. 17 Pamwapo adamuvazika chovala chifuwira ndipo adaluka chisote chachifumu cha minga nkumuvazika. 18 Manje adayamba kumukuwirira kuti: “Muli tani* Mpfumu ya Ayuda!” 19 Ndipo ambamumenya mu msolo na ntsanga, nkumbamulavulira mata ndipo ambagwada nkumbamujolimira. 20 Padamaliza kumunyoza, adamuvula chinguwo chake chifuwira chire, ndipo adabula naye nkuyenda kukamukhomerera pa muti. 21 Komasoti iwo adachichimiza munthu munango yemwe ambandogwata dzina yake Simoni wa ku Kurene kuti asenze muti wake wodzudzikirapo.* Munthu muyu ambachokera kudera ya kumuyi ndipo wenze ababa wake wa Alekizanda na Rufu.

22 Pamwapo adafika naye pa malo yochemerewa Gologota. Dzina mweyi akaitsumbudzulira itanthauza “Malo ya Chibade.” 23 Kumuko iwo adayesa kumupasa vinyu wosanganisa na vinthu vowawa, koma iye adalamba. 24 Ndipo adamukhomerera pa muti nkugawana malaya yake yakunja mwa kuchita maere pa malaya mwayo kuti awone chomwe munthu aliyese angatenge. 25 Manje nthawe peyenze 9 ora machibese, iwo adamukhomerera pa muti. 26 Mawu yowonesa mulandu womwe adamuphera, adayanemba kuti: “Mpfumu ya Ayuda.” 27 Ndipo iwo, adamanika pomwe vigananga viwiri pabodzi na iye. M’bodzi adamumanika kudjanja yake yamakulu ndipo munango adamumanika kumadzere kwake. 28* —— 29 Wanthu womwe ambagwata pafupi ambanena mawu yonyoza Yesu ndipo ambachita misolo yawo kupukupu nkumbanena kuti: “Iwe yemwe umbanena kuti ungakwanise kugwesa kachisi nkumumanga pomwe ntsiku zitatu, 30 dzipulumuse ndipo buluka pa muti wodzudzikirapo* moyu.” 31 Nchibodzibodzimbo antsembe akulu pabodzi na alembi, iwo ambamunyoza. Iwo ambanena kuti: “Anango adakwanisa kuwapulumusa, koma kuti adzipulumuse yekha vinkumukanga! 32 Manje Khrisitu, Mpfumu ya Izirayeli, ibuluke pa muti wodzudzikirapo* muyu, kuti ise tiwone na kukhulupirira.” Navombo vigananga vomwe vidamanikiwa naye pabodzi, vimbamunyoza.

33 Nthawe pimbakwana 12 ora mpakana 15 ora, mudziko yose mweyo mudachita mdima. 34 Cha m’ma 15 ora mumo, Yesu adakuwa mwamphanvu kuti: “Eli, Eli, lama sabactâni?” Mawu mwaya yakatsumbudzuliriwa yatanthauza kuti: “Mulungu wangu, Mulungu wangu, mwanisiiranyi ine?” 35 Anango pa wanthu omwe enze adaimirira pafupi padabva vimwevi, adayamba kunena kuti: “Bvani! Ankuchemera Eliya.” 36 Pamwapo munthu munango adathamanga nkukavuwika siponja mu vinyu wowawasha ndipo adaiikha ku ntsanga nkumupasa kuti amwe, achimbanena kuti: “Mulekeni! Tiwone peno Eliya angabwere kudzamubulusa.” 37 Koma Yesu adakuwa maninge ndipo adamalizika.* 38 Manje nguwo yogwatiza ya mu nyumba yopatulika, idang’ambika pakati kuchokera padzulu mpakana pasi. 39 Manje nkulu wa masocha yemwe wenze imirire pafupi na Yesu, padawona vomwe vidachitika pa nthawe yomwe Yesu ambamalizika, adanena kuti: “Shuwadi, moyu wenzedi Mwana wa Mulungu.”

40 Penze pomwe azimayi omwe ambanyang’anira ali patali. Pa gulu ya azimayi mwawa penze Mariya wa ku Magadala, Mariya mayi wa Yakobo Mng’ono na Yose komasoti penze Salome, 41 womwe ambafamba naye pabodzi nkumbamutumikira pa nthawe yomwe wenze ku Galileya. Penze pomwe azimayi azinji omwe adabwera naye pabodzi kuchokera ku Yerusalemu.

42 Manje pakuti kwenze kumaulo maninge komasoti yenze ntsiku Yokonzekera, panango kuti ntsiku yomwe mangwana yake ni Satade, 43 kudabwera Yosefe wa ku Arimateya, munthu wobvekera maninge wa mu Tiribunali Ikulu ya Ayuda yemwembo ambadikhirira Ufumu wa Mulungu. Iye adachita chikanga nkuyenda kwa Pilato kukakumbira thupi ya Yesu. 44 Koma Pilato ambatsimikizalini kuti peno Yesu wenze adafa kale. Pamwapo adachemeresa nkulu wa masocha nkumubvunza kuti peno Yesu wafadi kale. 45 Padatsimikizira kuchokera kwa nkulu wa masocha muyo, adabvuma kuti Yosefe akatenge thupi ya Yesu. 46 Manje Yosefe padagula nguwo yabwino maninge nkumubulusa, adamukulungira na nguwo mwiyo nkukamuikha m’manda* yomwe adayasema mu chimwala. Patsogolo pake adakunkhuliza chimwala nkufunga pa nsuwo pa manda mwayo. 47 Koma Mariya wa ku Magadala na Mariya mayi wake wa Yose, adapitiriza kunyang’anisisa pa malo yomwe iye adaikhiwa.