Wonembewa na Yohani

11 Manje penze munthu munango yemwe ambadwala, dzina yake Lazaro. Wenze wa m’muyi wa Betaniya, kwawo kwa Mariya na m’bale wake Malita. 2 Mariya moyu ni ule yemwe adadzoleka Ambuya mafuta yonunkhira na kupukuta mapazi yawo na tsitsi yake. Lazaro yemwe angadwala uyu wenze m’bale wake. 3 Manje azilongosi wake mwawo adatumiza mawu kwa Yesu, yakuti: “Ambuya, yemwe mumukonda ule akudwala.” 4 Koma Yesu padabva vimwevi adanena kuti: “Matenda mwaya sikuti yandomuchitisa kuti afe basi, koma kuti Mulungu atambire ulemerero komasoti kuti Mwana wa Mulungu alemekezeke ndawa ya kudwala muko.”

5 Yesu ambakonda maninge Malita na m’bale wake komasoti Lazaro. 6 Koma padabva kuti Lazaro akudwala, iye adapitiriza kukhala komwe wenze kwa ntsiku zinango ziwiri. 7 Ntsiku ziwiri zire pazidamala, Yesu adauza wopfunzira wake kuti: “Naboni tiyende soti ku Yudeya.” 8 Wopfunzira mwawo adamuuza kuti: “Mpfunzisi, manjemanje apa wanthu wa ku Yudeya ambafuna kukubomani na minyala, manje ko mukufuna kuyenda pomwe kumuko?” 9 Yesu adadawira kuti: “Ko masikati yalibe maora 12? Munthu akambafamba masikati palibe chomwe chimukhukhumudwisa, ndawa awona kugwerewera kwa dziko. 10 Koma munthu akambafamba usiku, akhukhumudwa ndawa awonalini kugwerewera.”

11 Padanena vimwevi adauza wopfunzira wake mwawo kuti: “Munzathu Lazaro ali m’tulo, koma ninkuyenda kumuku kukamumusa.” 12 Pamwapo wopfunzira mwawo adati: “Ambuya, peno ankugona akhale bwino.” 13 Pamwapa Yesu angatanthauza kuti Lazaro wamwalira. Koma iwo ambaganiza kuti akunena va kugona tulo chaito. 14 Patsogolo pake Yesu adawauza sitiriti kuti: “Lazaro wamwalira, 15 ndipo ine nikukondwa ndawa ya imwepo kuti nirilini kumuko, kuti imwepo mukhulupirire. Koma naboni tiyende kwa iye.” 16 Pamwapo Thomasi, yemwe angadziwika pomwe kuti Didimo, adauza wopfunzira anzake mwawo kuti: “Isembo naboni tiyende, kuti tikafere naye pabodzi.”

17 Yesu padafika kumuko, adagumana kuti Lazaro alikale m’manda* kwa ntsiku zinayi. 18 Muyi wa Betaniya wenze pafupi na Yerusalemu pa nsenga wa makilometro pafupifupi yatatu. 19 Pamwapo Ayuda azinji adayenda kwa Marita na Mariya kukawanyamalisa ndawa ya impfa ya mulongosi wawo. 20 Pamwapo Malita padabva kuti Yesu akubwera, adayenda kukamuchunguzira, koma Mariya adasala kumuyi. 21 Malita adauza Yesu kuti: “Ambuya, sembe mwenze kuno m’bale wangu adakamwaliralini. 22 Olo kuti viri teno, nikudziwa kuti chirichose chomwe mungakumbire kwa Mulungu, iye adzakupaseni.” 23 Yesu adamuuza kuti: “M’bale wako adzamuke.” 24 Malita adati: “Nikudziwa kuti adzamuke pa kumuka kwa wakufa pantsiku yomalizira.” 25 Yesu adamuuza kuti: “Ine ndine kumuka na moyo. Aliyese wokhulupirira ine, podiya amwalire, adzakhale pomwe na moyo. 26 Komasoti aliyese yemwe anamoyo ndipo anikhulupirira adzafelini. Ko ukukhulupirira vimwevi?” 27 Iye adadawira kuti: “Inde, Ambuya. Nikhulupirira kuti ndimwe Khrisitu, Mwana wa Mulungu, yemwe wanthu ambamudikhirira kuti adzabwere padziko.” 28 Padanena vimwevi, adayenda kukachemera m’bale wake Mariya nkumuuza mwachintsintsi kuti: “Mpfunzisi wabwera ndipo akukuchemera.” 29 Mariya padabva vimwevo, adanyamuka mwakankulumize nkuyenda komwe kwenze Yesu.

30 Pa nthawe mwiyi Yesu wenze akanati kungena m’muyi mumo. Iye wenze adakali kumalo komwe Marita adagumana naye. 31 Ayuda womwe enze naye pabodzi mu nyumba mumo, womwe angamunyamalisa, padawona Mariya ankunyamuka mwakankulumize nkubula kunja, adamulondola. Iwo angaganiza kuti ankuyenda kumanda* kuti akalilire kumuko. 32 Mariya padafika komwe kwenze Yesu nkumuwona, adagwada na kujolima mpakana nkhope yake pasi pafupi na mapazi ya Yesu. Patsogolo pake adamuuza kuti: “Ambuya, mudakakhala kuno mulongosi wangu adakamwaliralini.” 33 Yesu padawona Mariya ankulira komasoti Ayuda omwe adabwera naye pabodzi ankulirambo, vidamuwawa maninge ndipo adadzuma ndawa yoshupika muntima. 34 Patsogolo pake adabvunza kuti: “Mwamuikha kuponi?” Iwo adati: “Ambuya, naboni mukawone.” 35 Yesu adalira. 36 Pamwapo Ayuda mwawo adayamba kunena kuti: “Onani, ambamukondadi maninge!” 37 Koma anango ambanena kuti: “Ko moyu, yemwe adafungula maso ya munthu wosawona ule, adakakwanisalini kuchita chirichose kuti Lazaro aleke kumwalira?”

38 Patsogolo pake Yesu padadzuma pomwe ndawa yoshupika muntima, adafika kumanda* muko. Chimwicho chenze chimphako, ndipo adachifunga na chimwala. 39 Yesu adati: “Chosani chimwala ichi.” Malita, mulongosi wake wa womwalira ule adanena kuti: “Ambuya, panango manje wayamba kununkha, ndawa lero ni ntsiku yachinayi ali m’manda.” 40 Yesu adamuuza kuti: “Ko niribe kukuuza kuti peno ungakhulupirire udzawone ulemerero wa Mulungu?” 41 Pamwapo adachosa chimwala chire. Patsogolo pake Yesu adakwiza maso yake kudzulu nkunena kuti: “Ababa, ninkukutembejani ndawa yakuti mwanibva. 42 Inde, ninkudziwa kuti munibvesera nthawe zose, koma ninkunena vimwevi ndawa ya gulu ya wanthu womwe aimirira pano awa, kuti akhulupirire kuti imwepo mudanituma.” 43 Padanena vimwevi, adakuwa maninge kuti: “Lazaro, bula!” 44 Munthu yemwe wenze wakufa ule adabula. Mapazi na manja yake yenze kulungiriwe na nguwo zamaliro, nkhope yake pomwe yenze yomanga na nguwo. Manje Yesu adawauza kuti: “M’masuleni kuti akwanise kufamba.”

45 Pamwapo Ayuda azinji omwe adabwera kwa Mariya na kuwona vomwe Yesu adachita, adamukhulupirira. 46 Koma anango wa iwo adayenda kwa Afalisi kukawauza vomwe Yesu adachita. 47 Pavidateno, antsembe akulu na Afalisi adasonkhana ku Tiribunali Ikulu ya Ayuda nkunena kuti: “Ko tichite chani pamwapa? Ndawa munthu moyu akuchita vizindikiro vizinji. 48 Peno tingamulekerere, wose adzamukhulupirire ndipo Aroma adzabwere kudzatitengera malo* yathu na wanthu wa khaindi yathu.” 49 Koma m’bodzi wa iwo, Kayafa, yemwe wenze nkulu wa ntsembe gole mwiyo adati: “Palibe chomwe munkudziwa, 50 ndipo mukuwonalini kuti ni vothandiza kwa imwepo kuti munthu m’bodzi afere wanthu wose m’malo mwakuti wanthu wa khaindi yose adzongeke.” 51 Vomwe adanena ivi, alibe kuviganiza pa iye yekha, koma ndawa yakuti iye wenze nkulu wa ntsembe gole mwiyo, adaneneratu ulosi wakuti Yesu adzafere ntundu muyo. 52 Ndipo osati kufera ntundu wokha, komasoti kuti adzasonkhanise wana wa Mulungu omwe adamwazikana. 53 Ndipo kuyambira ntsiku mwiyo adapangana kuti amuphe.

54 Pamwapo, Yesu ambafambafambalini mowonekera kwa Ayuda. Koma adachoka kumuko nkuyenda kudera inango yomwe iri pafupi na chipululu, mu thaundi yochemerewa kuti Efuraimu. Ndipo adakhala kumuko pabodzi na wopfunzira wake. 55 Manje ntsiku ya Pasika wa Ayuda yenze idafendera ndipo wanthu azinji wa m’mamiyi adayenda ku Yerusalemu Pasika akanati kuyamba kuti akadzichenese mobverana na mwambo wawo. 56 Iwo angafagafaga Yesu ndipo ambaima pa malo yabodzi mu kachisi mumo nkumbakambirana kuti: “Mukuganiza tani? Ko mwaule abwerelini ku chikondwerero mwichi?” 57 Koma antsembe akulu na Afalisi adalamula kuti aliyese yemwe angadziwe komwe kuli Yesu, aulule kuti iwo akamuphate.*