Vomwe atumi adachita
1 A Teofilo, mu nkhani yoyamba ire, nidanemba vinthu vose vomwe Yesu adachita na kupfunzisa, 2 mpakana ntsiku yomwe adatengewa nkuyenda kudzulu, padapereka malangizo pophatisira basa mzimu uchena kwa atumi omwe iye adawasankhula. 3 Patsogolo pa mabvuto yomwe adagumana nayo, iye adawonekera wamoyo kwa atumi mwawo pakuphatisira basa maumboni yazinji yotsimikizirika. Muntsiku zokwana 40 iwo adamuwona ndipo ambawauza va Ufumu wa Mulungu. 4 Panthawe yomwe adasonkhana na wopfunzira mwawo, adawapasa malangizo yakuti: “Ayi kuchoka mu Yerusalemu, koma mudikhire vomwe Ababa adapolomisa, vomwe nidakuuzani. 5 Ndawa Yohani ambabatiza na madzi, koma imwepo mudzabatiziwe na mzimu uchena pakalibe kupita ntsiku zizinji.”
6 Manje padasonkhana adamubvunza kuti: “Ambuya, ko mubwezerese ufumu kwa Aizirayeli manjeuno?” 7 Iye adawadawira kuti: “Mufunikalini kudziwa ntsiku panango nthawe yomwe Ababa wasankhula mu ulamuliro wake. 8 Koma mukadzatambira mzimu uchena, mudzakhale na mphanvu. Ndipo mudzakhale mboni zangu mu Yerusalemu, ku Yudeya kose na ku Samariya, mpakana kumamaliziro ya dziko yapasi.” 9 Padamaliza kunena vimwevi, adatengewa nkuyenda mumlengalenga iwo akuwona ndipo ntambo udamubisa mpakana alibe kukwanisa pomwe kumuwona. 10 Pomwe iwo anganyang’anisisa kudzulu, iye akukwera kudzulu muko, mwadzidzidzi amuna awiri wovala vichena adaima pambali pawo. 11 Amuna mwawo adawabvunza kuti: “Amuna imwe wa ku Galileya, ndawa chani mwandoima nkumbanyang’ana kudzulu? Yesu moyu yemwe watengewa pakati panu nkuyenda kudzulu, adzabwere mu njira yolingana na momwe mwamuwonera akuyenda kudzulu.”
12 Patsogolo pake adabwerera ku Yerusalemu, kuchokera kuphiri ya maolivi. Phiri mweyi iri pafupi na Yerusalemu, pa nsenga wa kilometro ibodzi.* 13 Padafika muthaundi mwiyo adayenda muchipinda cha mdzulu, momwe ambakhala. Penze Petulo, Yohani, Yakobo, Andireya, Filipo, Thomasi, Batolomeyo, Mateyu, Yakobo mwana wa Alifeyo, Simoni wodzipereka ule komasoti mwana wa Yudasi mwana wa Yakobo. 14 Mobverana, wose ambalimbikira kupemphera pabodzi na Mariya mayi wa Yesu, azimayi anango komasoti azibale wake wa Yesu.
15 Muntsiku mwizo, Petulo adaimirira pakati pa abale mwawo (gulu yose mweyo yenze ya wanthu wothamangira 120) nkunena kuti: 16 “Abale wangu, venze vofunika kuti lemba ikwanirisiwe, yomwe mzimu uchena udaneneratu pophatisira basa Davide. Lemba mweyi inena va Yudasi, yemwe adatsogolera wanthu kuyenda kukaphata Yesu. 17 Iye wenze mugulu yathu, ndipo ambatumikira nase pabodzi. 18 (Munthu moyu, adagula munda na malipiro ya basa zosalungama. Adagwa chodololika nkuphoka mimba ndipo matumbo yake yose yadakhuthuka. 19 Vimwevi vidadziwika kwa wanthu wose waku Yerusalemu, mwakuti munda muyo adaupasa dzina ya chiyankhulo chawo yakuti Acéldama, kutanthauza “Munda wa Magazi.”) 20 M’bukhu ya Masalimo adanembamo kuti: “Malo yake yokhala yasanduke matongwe, ndipo ayi kuti pagumanike aliyese wokhalamo,’ komasoti kuti: ‘Udindo wake ninge wonyang’anira utengewe na munthu munango.’ 21 Ndipomwapa ni vofunika kuti angenewe m’malo na munthu m’bodzi pa wanthu womwe ambafamba nase panthawe yose yomwe Ambuya Yesu angachita vinthu vosiyanasiyana pakati pathu. 22 Munthu wake akhale yemwe ambafamba nase kundoyambira pomwe Yesu adabatiziwa na Yohani, kudzafika ntsiku yomwe adatengewa kuyenda kudzulu kuchoka pakati pathu. Munthu moyu akhale mboni ya kumuka kwa Yesu pabodzi na isepano.”
23 Pamwapo padatomolewa wanthu awiri, Yosefe wochemerewa Barasaba, yemwe ambadziwika pomwe kuti Yusito, na Matiya. 24 Patsogolo pake adapemphera kuti: “Imwe Yahova,* muyadziwa mitima ya wanthu wose, tiwoneseni yemwe mwamusalula pa wanthu awiri mwawa 25 kuti atenge malo yomwe Yudasi adayasiya nkuchita vinthu vomwe iye ambafuna ndipo atenge utumiki moyu komasoti akhale ntumi.” 26 Padateno adachita maere ndipo maere mwayo yadagwera Matiya. Pamwapo iye adamuphatikiza pa atumi 11 wale.