Kwa Afilipi
4 Ndipomwapa abale wangu womwe nikukondani maninge, ninashungu ya kukuwonani. Imwepo ndimwe chimwemwe changu na chisote* changu chaulemerero. Anzangu wapamoyo, ninkukulimbikisani kuti mupitirize kukhala wokhulupirika kwa Ambuya.
2 Ninkudandaulira Eodiya na Suntuke ninge ateweri wa Ambuya kuti amalise kusabvana kwawo. 3 Ninkukumbira pomwe iwepo nyabasa munzangu chaiye, kuti upitirize kuwathandiza azimayi mwawa. Iwo ayesayesa mwakhama kuphata basa yolalikira ntontholo wabwino pabodzi na ine. Achita pomwe vimwevi pabodzi na Kelementi na anyabasa anzangu anango wose, womwe madzina yawo yali m’bukhu ya moyo.
4 Mumbakhale wokondwa nthawe zose ndawa ya Ambuya. Ninkubwerezera kukuuzani kuti mbakondwani! 5 Wanthu wose adziwe kuti mungingimiralini nzeru zanu. Ambuya ali pafupi. 6 Ayi kukhala na nkhawa na chilichose. Koma m’malo mwake nthawe zose mumbamukumbire Mulungu, mumbamugwigwirire kuti akutsogolereni pa chirichose ndipo nthawe zose mumbamutembeje. 7 Mukateno ntendere wa Mulungu womwe wanthu angakwaniselini kuubvesa, udzateteze mitima yanu na maganizo yanu pomwe munkutewera Khrisitu Yesu.
8 Chomalizira abale, pitirizani kuganizira vinthu virivose vomwe ni chaivo, virivose vofunika maninge, virivose volungama, virivose vochena, virivose volimbikisa chikondi, virivose vomwe wanthu avitembeja, khalidwe yabwino iliyose komasoti chirichose chomwe ni cholemekezeka. 9 Vinthu vomwe mudavipfunzira, vomwe mudavibvuma, vomwe mudabva kwa ine na vomwe mudaviwona ninkuchita, mumbachite vimwevo ndipo Mulungu wantendere adzakhale namwe.
10 Ninkukondwera maninge mwa Ambuya kuti manjeuno mwayamba pomwe kuniganizira. Ninkudziwa kuti mwakhala munkuniganizira nthawe yose mweyi, koma kundoti mungasowa mpata wowonesa vimwevi. 11 Ninkuyankhulalini vimwevi ndawa yakuti ninkusowa kanthu neye, koma ndawa yakuti napfunzira kukhala wokhutira* na vomwe ninavo, vilibe basa momwe vinthu viliri pa moyo wangu. 12 Ninkudziwa momwe vikhalira ukakhala na vinthu ving’onong’ono, komasoti momwe ukhalira wokondwa ukakhala na vinthu vizinji. Pa chirichose na pa vinthu vosiyanasiyana, napfunzira chintsintsi chokhala wokhuta na chokhala wanjala. Napfunzira pomwe chintsintsi chokhala na vizinji na chintsintsi chokhala ulibe chinthu. 13 Pa vinthu vose, nigumana mphanvu kuchokera kwa Mulungu yemwe anipasa mphanvu zofunika.
14 Komasoti muchita bwino maninge pakunithandiza pa mabvuto yangu. 15 Ndipo imwepo abale wa ku Filipi munkudziwa bwino kuti paningachoka ku Makedoniya, pamudandoti mwabva manjemanje ntontholo wabwino, penze palibe mpingo olo ubodzi womwe udanithandiza pankhani ya kupasa panango kutambira, ndimwe mwekha basi. 16 Ndawa yakuti penenze ku Tesalonika, imwepo mumbanitumizira vinthu kuti vinithandize pa vomwe nimbafunikira ndipo mulibe kuchita vimwevi kabodzi kokha, koma kawiri. 17 Sikuti ninkufuna kuti munipase vinthu, koma ninkufunisisa kuti mumbachite vinthu vabwino vomwe vingakuphindulireni maninge. 18 Ninavinthu vose vomwe ni vofunika ndipo palibe chomwe ninkusowa. Viriteno ndawa yakuti Epafurodito wanipasa vinthu vomwe mwanitumizira. Vinthu vimwevi vili ninge pfungo yonunkhira bwino, vili ninge pomwe ntsembe yobvumizika yomwe ikondweresa Mulungu. 19 Ndawa ya vimwevi, Mulungu wangu adzakupaseni vose vomwe mufunika, mobverana na kuwanda kwa chuma chake cha ulemerero, pakuphatisa basa Yesu Khrisitu. 20 Ndipomwapa, Mulungu yemwe ni Ababa wathu atambire ulemerero mpakana kalekale. Ame.
21 Muniperekere moni kwa wochena wose womwe ni wopfunzira wa Khrisitu Yesu. Abale womwe anaine ankuperekambo moni. 22 Wochena wose ankupereka moni, makamaka womwe akhala m’nyumba ya Kaisara.
23 Ndawa ya maganizo yabwino yomwe muli nayo, kukoma ntima kukulu kwa Ambuya Yesu Khrisitu kukhale namwe.