Wonembewa na Mateyu

22 Yesu adawauza pomwe vitsanzo vinango kuti: 2 “Ufumu wakudzulu tingaulinganize na mpfumu yomwe idakonzera mwana wake mwamuna phwando ya ukwati. 3 Ndipo idatuma akapolo wake kuti akachemere wanthu wochemerewa ku phwando ya ukwati, koma wanthu mwawo alibe kufuna kubwera. 4 Patsogolo pake idatuma pomwe akapolo anango kuti: ‘Kauzeni wochemerewa mwawo kuti: “Inepano nakonza chakudya cha midiya, ng’ombe zangu zimuna na nyama zangu zonenepa zaphewa, ndipo vinthu vose vakonzewa kale. Bwerani ku phwando ya ukwati.”’ 5 Koma wanthu mwawo adawayawaya nkuchoka. Munango adayenda kumunda ndipo munango adayenda kukachita bizi yake. 6 Koma anango adaphata akapolo wake ndipo adawachitira voipa nkuwapha.

7 “Pavidakhala teno, mpfumu ile idakalipa maninge ndipo idatumiza masocha yake kukapha wanthu womwe adapha akapolo wake wale nkushokeratu thaundi yawo. 8 Patsogolo pake adauza akapolo wake kuti: ‘Phwando ya ukwati yakonzewa kale, koma wochemerewa wale enze wosayenerera. 9 Ndipomwapa, yendani m’misewu yobulira mu thaundi ndipo aliyese wamungagumane mukamuchemere kuti abwere ku phwando mweyi ya ukwati.’ 10 Pamwapo akapolo wale adayenda m’misewu ndipo adasonkhanisa wose womwe adawagumana, oipa na wabwino kubodzi. Ndipo chipinda chodyeramo phwando ya ukwati chidadzala na wanthu womwe angadya chakudya.

11 “Mpfumu ile pidangena kuti iwone alendo mwawo, idawona munthu munango mumo yemwe wenze alibe kuvala chovala cha ukwati. 12 Pamwapo idamubvunza kuti: ‘Iwe! Wangena tani muno ulibe kuvala chovala cha ukwati?’ Iye adasowa chodawira. 13 Patsogolo pake mpfumu ile idauza atumiki wake kuti: ‘M’mangeni manja na minyendo ndipo mumuponye kunja ku mdima. Kumuko adzalire na kukukuta manu.’

14 “Ndawa wochemerewa ni azinji koma osaluliwa ni ang’onong’ono.”

15 Pamwapo Afalisi adachoka nkukapangana kuti amutape nkamwa. 16 Iwo adamutumizira wopfunzira wawo pabodzi na wanthu womwe angatewera Herode, ndipo iwo adanena kuti: “Mpfunzisi, tinkudziwa kuti imwepo munamalini ndipo mulewa chaivo mukambapfunzisa njira ya Mulungu. Ndipo muchitalini vinthu pakundofuna kukondweresa munthu, ndawa munyang’analini mawonekedwe ya wanthu. 17 Manje tiwuzeni, munkuganiza tani? Ko ni vobvumizika* kupereka mtsonkho kwa Kaisara panango neye?” 18 Koma Yesu adadziwa kuipa kwawo ntima ndipo adalewa kuti: “Wanthu woipa imwe! Ndawa chani munkuniyesa? 19 Niwoneseni kobiri ya mtsonkho.” Iwo adamubweresera kobiri ibodzi ya dinari.* 20 Pamwapo adawabvunza kuti: “Ko nkhope iyi na mawu yali mwapa ni vambani?” 21 Iwo adadawira kuti: “Ni va Kaisara.” Pamwapo adawauza kuti: “Manje perekani vinthu va Kaisara kwa Kaisara, koma va Mulungu kwa Mulungu.” 22 Padabva vimwevi adadabwa ndipo adandochokapo nkumusiya.

23 Pa ntsiku mweyo, Asaduki womwe ambanena kuti akufa adzamukisiwelini, adabwera nkumubvunza kuti: 24 “Mpfunzisi, Mose adanena kuti: ‘Peno mwamuna wafa akanati kubereka wana, m’bale wake wamwalira kulowola nkazi wamasiye muyo kuti abalire wana m’bale wake.’ 25 Manje penze amuna 7 wa pachibale. Woyamba adalowola basi nkumwalira. Koma pakuti wenze alibe wana, nkazi muyo adalowodwa na m’bale wake wa mwamuna ule. 26 Vidachitika chibodzibodzi kwa wachiwiri na wachitatu mpakana wose 7 adafa. 27 Pamapeto pake nkazi ule adamwalirambo. 28 Manje pamwapa, akufa akadzamukisiwa, nkazi moyu adzakhale wa mbani? Pakuti wose 7 adamulowola.”

29 Koma Yesu adawadawira kuti: “Munkuphonyesa ndawa mudziwalini Malemba panango mphanvu ya Mulungu. 30 Ndawa akufa akadzamukisiwa, amuna adzalowolelini ndipo akazi adzalowodwelini, koma adzakhale ninge angelo wakudzulu. 31 Pakulewa va kumuka kwa akufa, ko mulibe kuwerenga vomwe Mulungu adalewa kwa imwepo kuti: 32 ‘Inepano ndine Mulungu wa Abulahamu, Mulungu wa Isaki na Mulungu wa Yakobo’? Iye ni Mulungu wa wanthu wamoyo, osati wa akufa.” 33 Gulu ya wanthu ile pidabva vimwevi, idadabwa na vomwe iye angapfunzisa.

34 Afalisi padabva kuti Yesu adawasowesa chonena Asaduki, adasonkhana ninge gulu ibodzi. 35 Ndipo m’bodzi wa iwo yemwe ambadziwa Chilamulo, adamuyesa nzeru pakumubvunza kuti: 36 “Mpfunzisi, ko lamulo ikulu maninge mu Chilamulo ni iponi?” 37 Iye adamudawira kuti: “‘Mumbakonde Yahova* Mulungu wanu na ntima wanu wose, moyo wanu wose na maganizo yanu yose.’ 38 Imweyi ndiyo lamulo ikulu maninge komasoti yoyamba. 39 Yachiwiri yolingana nayo ni iyi: ‘Umbakonde munzako ninge momwe udzikondera wekha.’ 40 Chilamulo chose chagona pa malamulo yawiri mwawa, kuphatanidzapo na vomwe aneneri adanemba.”

41 Manje Afalisi wale padasonkhana pabodzi, Yesu adawabvunza kuti: 42 “Munkuganiza tani va Khrisitu? Ko ni mwana wa mbani?” Iwo adadawira kuti: “Ni mwana wa Davide.” 43 Iye adawabvunza pomwe kuti: “Manje ndawa chani mouziriwa na mzimu, Davide adamutomola kuti Ambuya, pomwe ambalewa kuti: 44 ‘Yahova* adauza Ambuya wangu kuti: “Khala kudjanja yangu ya makulu mpaka niikhe azondi wangu pasi pa mapazi yako”’? 45 Manje peno Davide adamuchemera kuti Ambuya, vinkukwanisika tani kuti akhale mwana wake?” 46 Palibe olo m’bodzi adakwanisa kumudawira, ndipo kundochokera ntsiku mweyo palibe pomwe yemwe ambachita chikanga nkumubvunza mibvunzo.