Wonembewa na Mateyu
10 Pamwapo adachemera wopfunzira wake 12, nkuwapasa mphanvu kuti ambakwanise kubulisa mizimu yoipa na kupolesa matenda ya khaindi iriyose yomwe wanthu angadwala.
2 Madzina ya atumi 12 ni aya: Simoni yemwe ambachemerewa kuti Petulo na Andireya m’bale wake. Yakobo mwana wa Zebedayo na m’bale wake Yohani. 3 Filipo na Batolomeyu, Thomasi na Mateyu wotsonkhesa mtsonkho, Yakobo mwana wa Alifeyo na Tadeyo. 4 Simoni Kananiya* na Yudasi Sikariyoti yemwe patsogolo pake adapereka Yesu.
5 Yesu adatumiza atumi 12 mwawa ndipo adawapasa malangizo aya: “Ayi kuyenda mu nsewu wa wanthu wa khaindi inango, ndipo ayi kungena mu thaundi iriyose ya Asamariya. 6 Koma nthawe zose mumbayende kwa nkhosa zosokera za nyumba ya Izirayeli. 7 Mukayenda, mumbakalalikire kuti: ‘Ufumu wakudzulu wafendera.’ 8 Mumbapolese wodwala, kumukisa wakufa, kuchenesa wakhate na kuchosa viwanda. Mudatambira fovolo ndipo mumbaperekembo fovolo. 9 Ayi kutenga golide, siliva panango kobiri ya khaindi iriyose mu vikwama vanu. 10 Ayi kutakula chombo chirichose cha chakudya cha paulendo, panango malaya yawiri panango ntsapato panango mpsimbo, ndawa yakuti nyabasa afunika kutambira chakudya chake.
11 “Mukangena muthaundi panango m’muyi uliwose mumbafagefage yemwe ni woyenerera kumuuza ntontholo wanu, ndipo mumbakhale m’nyumba yake mpakana nthawe yochoka. 12 Mukangena m’nyumba, mumbamonise wanthu wa m’banja mumo. 13 Peno akutambirani bwino, ntendere womwe munkuwafunira ukhale pa wanthu mwawo. Koma peno alibe kukutambirani bwino, ntendere wanu ubwerere kwa imwepo. 14 Kulikose komwe wanthu akakutambirenilini panango kuleka kubvesera mawu yanu, mukambabula m’nyumba mweyo panango muthaundi mweyo, mumbakunkhumule pfumbi kumapazi yanu. 15 Shuwa ninkukuuzani, chilango cha thaundi mwiyo chidzakhale chowawa maninge pa Ntsiku ya Chiweruzo kuposha cha Sodomu na Gomora.
16 “Wonani! Ninkukutumizani ninge nkhosa pakati pa mphumphi. Ndipomwapa, mumbachite vinthu mochenjera ninge nyoka koma wachilungamo ninge nkhangaiwa. 17 Chenjerani na wanthu ndawa adzakuyendeseni ku matiribunali yang’onoyang’ono ndipo adzakukwapuleni m’masunagoge yawo. 18 Adzakuyendeseni kwa magovernador na mafumu ndawa yakuti ndimwe wotewera wangu, kuti iwo pabodzi na wanthu wamakhaindi yanango apfunzire va inepano. 19 Koma akadzakuyendesani kumuko ayi kudzachita mantha kuti mudzayankhule tani, panango mudzalewe chani ndawa yakuti vati mudzayankhule mudzauziwe panthawe mweyo. 20 Viriteno ndawa yakuti woyankhula mudzakhalelini imwepo mwekha, koma mzimu wa Ababa wangu udzayankhule pakuphatisa basa imwepo. 21 Munthu adzapereke m’bale wake kuti aphewe, ndipo baba adzapereke mwana wake. Wana adzaukire azibereki wawo ndipo adzawaphese. 22 Wanthu wose adzazondane namwe ndawa ya dzina yangu, koma yemwe adzapirire mpakana mapeto ndiye wati adzapulumuke. 23 Akakudzudzani muthaundi ibodzi, mumbathawire muthaundi inango. Shuwa ninkukuuzani, mudzamalizelini kuzungulira mathaundi yose ya Izirayeli, Mwana wa munthu akanati kufika.
24 “Muluno aposhalini ticha wake ndipo kapolo aposhalini bwana wake. 25 Muluno andolingana na ticha wake ndipo kapolo andolingana na abwana wake. Peno munikachiro wa nyumba adapasiwa dzina yakuti Belezebule,* kulitani anango wa m’banja yake mweyo? 26 Ndipomwapa ayi kuwagopa ndawa palibe chobisika chomwe chidzaululikelini ndipo palibe chintsintsi chomwe chidzadziwikelini. 27 Vomwe nikuuzani mumdima, muvinene pachena ndipo vomwe munkubva wanthu ankuwerewesana, muvilalikire muli padenga. 28 Ayi kumbagopa wanthu omwe akupha thupi koma angakwaniselini kupha moyo, koma mumbagope yemwe angakwanise kupha vose viwiri, moyo na thupi kubodzi m’Gehena.* 29 Mpheta ziwiri azigulisa kakobiri kabodzi kochepa mphanvu,* ntenolini? Koma palibe olo ibodzi yomwe idzagwe pasi Ababa wanu osadziwa. 30 Ndipo olo tsitsi yose ya munsolo mwanu aiwerenga. 31 Ndipomwapa ayi kuchita mantha, ndimwe wofunika maninge kuposha mpheta zizinji.
32 “Ndipomwapa aliyese yemwe ankubvuma pamaso pa wanthu kuti ni wopfunzira wangu, inembo nidzamubvume pamaso pa Ababa wangu wakudzulu kuti ni wopfunzira wangu. 33 Koma aliyese yemwe adzanilambe pamaso pa wanthu, inembo nidzamulambe pamaso pa Ababa wangu wakudzulu. 34 Ayi kuganiza kuti nidabwera kudzabweresa ntendere padziko yapasi. Niribe kubwera kuti nibwerese ntendere, koma nkhondo. 35 Nidabwera kudzachitisa wanthu kuyambana. Nidabwera kudzachitisa kuti mwana mwamuna atsutsane na ababa wake, mwana nkazi atsutsane na amayi wake nakuti mulowola atsutsane na apongozi wake wachikazi. 36 Shuwa ninkukuuzani, azondi wa munthu adzakhale wa m’banja mwake chaiwo. 37 Aliyese yemwe akonda maninge amayi wake panango ababa wake kuposha inepano, ni wosayenerera kuti akhale wopfunzira wangu. Ndipo aliyese yemwe akonda maninge mwana wake mwamuna panango nkazi kuposha inepano, ni wosayenerera kuti akhale wopfunzira wangu. 38 Komasoti aliyese yemwe afunalini kutakula muti wake wodzudzikirapo* nkupitiriza kunitewera, ni wosayenerera kuti akhale wopfunzira wangu. 39 Aliyese yemwe ankuyesesa kupulumusa moyo wake adzauluze, koma yemwe waluza moyo wake ndawa ya inepano adzaugumane.
40 “Yemwe wakutambirani watambira pomwe inepano ndipo yemwe watambira inepano watambira pomwe yemwe adanituma. 41 Yemwe atambira mneneri ndawa yakuti ni mneneri, adzatambire mphoto yolingana na yomwe mneneri atambira. Ndipo yemwe atambira munthu wolungama ndawa yakuti ni wolungama, adzatambire mphoto yolingana na yomwe munthu wolungama atambira. 42 Aliyese wopasa m’bodzi wa tuwana utu olo madzi yozizira m’khapu kuti amweko ndawa yakuti ni wopfunzira wangu, shuwa ninkukuuzani, muyo mphoto yake idzataikelini ne pang’ono.”