Kalata yachiwiri yoyenda kwa Akorinto
6 Pomwe tinkuphata naye basa pabodzi, tinkukulimbikisani kuti ayi kuti mutambire kukoma ntima kukulu kwa Mulungu nkuphonya cholinga cha kukoma ntima kumuko. 2 Ndawa iye adati: “Panthawe yobvumizika nidakubvera, ndipo pantsiku yachipulumuso nidakuthandiza.” Shuwadi, ino ni nthawe chaiyo yobvumizika. Lero ni ntsiku yachipulumuso.
3 Tinkuchitalini chirichose chokhumudwisa, kuti wanthu aleke kugumanira chifukwa utumiki wathu. 4 Koma tinkuwonesa munjira iriyose kuti ndise atumiki wa Mulungu. Tinkuchita vimwevi pakupirira vinthu vizinji, pakugumana na mabvuto, pakukhala tiribe vinthu, pakugumana na vinthu voshupa, 5 pakumenyewa, kuikhiwa mudjeri, vipiringu, pophata basa mwakhama, kusowa tulo komasoti kukhala na njala. 6 Tinkuwonesa pomwe vimwevi pakukhala wochena, wodziwa vinthu, wodekha, wokoma ntima, pakutsogolerewa na mzimu uchena, powonesa chikondi chaicho, 7 pakuyankhula chaivo komasoti pakukhala na mphanvu ya Mulungu. Komasoti tinkuchita vimwevi pakunyamula vinthu vachilungamo kudjanja yamakulu na yamadzere, 8 popasiwa ulemerero na kunyozewa komasoti pakunenerewa voipa na vabwino. Tinkuwonewa ninge tiribe chilungamo koma ndise wachilungamo, 9 ninge wosadziwika koma ndise wodziwika bwinobwino, ninge tinkufa koma tinkupitiriza kukhala na moyo, ninge wolangiwa koma osaperekewa kuti tikaphewe, 10 ninge okwinyirira koma wokondwa nthawe zose, ninge wosauka koma wolemeresa wanthu azinji komasoti ninge alibe chirichose koma alinavo vinthu vose.
11 Takhala tinkuyankhula namwe imwepo wanthu wa ku Korinto, isepano tikukondani* maninge. 12 Isepano tinkuumiralini pankhani yokuwonesani chikondi, koma imwepo ndimwe omwe munkutikonda moumira. 13 Ndipomwapa ninkuyankhula namwe ninge wana wangu, imwembo mumbachite vimwevo, mumbatikonde* maninge.
14 Ayi kumangiwa djoko pabodzi na wanthu omwe atumikiralini Mulungu, ndawa ndimwe wosiyana. Ko pali mbverano wotani pakati pa chilungamo na kusabvera malamulo? Panango ko pali kubverana kotani pakati pa kugwerewera na mdima? 15 Komasoti pali mbverano wotani pakati pa Khrisitu na Beliyali?* Manje ko munthu yemwe atumikira Mulungu na yemwe atumikiralini Mulungu angalingane pavinthu viponi? 16 Ndipo ko pali kubverana kotani pakati pa kachisi wa Mulungu na mafano? Ndawa isepano ndise kachisi wa Mulungu wamoyo, ninge momwe Mulungu adanenera kuti: “Nidzakhale pagulu yawo komasoti nidzafambe pagulu yawo. Nidzakhale Mulungu wawo ndipo iwo adzakhale wanthu wangu.” 17 “‘Ndipomwapa chokani pagulu yawo ndipo musiyane nawo,’ wanena teno Yahova.* ‘Ayi kugumirira chinthu chopsyipiziwa,’” “‘ndipo nidzakutambireni.’” 18 “‘Nidzakhale baba wanu ndipo imwepo mudzakhale wana wangu wachimuna na wachikazi,’ wanena teno Yahova* wamphanvu zose.”