Vomwe atumi adachita
7 Koma nkulu wa antsembe adati: “Ko vimwevi ni chaivo?” 2 Sitefano adati: “Wanthu imwe, abale wangu na ababa wangu, bveserani. Mulungu waulemerero adawonekera kwa m’bereki wathu Abulahamu pomwe wenze ku Mesopotamiya, akalibe kuyenda kukakhala ku Harana. 3 Ndipo adamuuza kuti: ‘Fuluka mudziko yako ndipo uchoke pakati pa azibale wako. Uyende kudziko yomwe nidzakuwonese.’ 4 Pamwapo adafuluka mudziko ya Akasidi nkukakhala ku Harana. Kumuko, ababa wake padamwalira, Mulungu adamuuza kuti afulukire mudziko ino yomwe imwepo mukukhala manjeuno. 5 Koma alibe kumupasako malo yaliyose olo kadera kang’ono. Koma adamupolomisa kuti adzamupase dziko iyi kuti ikhale malo yake, na ya mbadwa zake, olo kuti panthawe mwiyo wenze alibe mwana. 6 Ndipo Mulungu adamuuza pomwe kuti mbadwa zake zidzakhale alendo mudziko ya anichiro, ndipo wanthu adzawasanduse akapolo na kuwadzudza* kwa magole 400. 7 Mulungu adati: ‘Nidzaweruze ntundu muyo womwe adzautumikire ninge akapolo, ndipo patsogolo pake adzanitumikire pamalo yano.’
8 Adamupasa pomwe pangano ya mdulidwe. Patsogolo pake adabereka Isaki ndipo adamugwata* pantsiku ya 8. Nayembo Isaki adabereka Yakobo ndipo Yakobo adabereka misolo ya mabanja 12 yale. 9 Misolo ya mabanja mwayo yadachitira njiru Yosefe nkumugulisa ku Iguputo. Koma Mulungu wenze naye, 10 ndipo adamupulumusa kumabvuto yose yomwe adagumana nayo. Komasoti angamukonda ndipo angamuthandiza kuti ambachite vinthu mwanzeru pamaso pa Farao mpfumu ya Iguputo. Farao muyo adapasa Yosefe udindo wakuti ambanyang’anire Iguputo na nyumba yake yose. 11 Patsogolo pake ku Iguputo na ku Kanani kose kudagwa njala mwakuti kwenze mabvuto yakulu. Ndipo azibereki wathu mwawo ambagumanalini chakudya. 12 Koma Yakobo adabva kuti ku Iguputo kuli chakudya, ndipo adatuma azibereki wathu wale kwa nthawe yoyamba. 13 Pa ulendo wachiwiri Yosefe adadziulula kwa azibale wake, ndipo Farao adadziwa va abale wake wa Yosefe na azibereki wake. 14 Pamwapo Yosefe adatumiza wanthu ku Kanani kukatenga Yakobo yemwe wenze baba wake komasoti abale wake wose. Ndipo wose pabodzi enzepo wanthu 75. 15 Manje Yakobo adayenda ku Iguputo komwe iye na azibereki wathu wale adafera. 16 Patsogolo pake mabonzo yawo adayatenga nkuyenda nayo ku Sekemu. Mpakana adakawaikha m’manda yomwe Abulahamu adagula na kobiri za siliva kwa wana wa Hamori ku Sekemu muko.
17 Nthawe pidafendera, yakuti vomwe Mulungu adapolomisa kwa Abulahamu vikwanirisiwe, mbadwa za Yakobo zidawanda maninge ku Iguputo. 18 Patsogolo pake, mpfumu inango yomwe imbamudziwalini Yosefe idayamba kutonga ku Iguputo. 19 Mpfumu mweyi idajerera wanthu wa khaindi yathu komasoti idachichimiza azibereki wathu mwawo kuti ambataye akacheche wawo na cholinga chakuti osati akhale na moyo. 20 Mose adabadwa panthawe mweyi, ndipo Mulungu adamuwona kuti ni wokhuza. Iye adalerewa munyumba ya ababa wake kwa minyezi yatatu. 21 Koma padamusiya yekha, mwana nkazi wa Farao adamutenga nkumbamulera ninge mwana wake. 22 Pamwapo Mose adapfunzira nzeru zose za Aiguputo. Iye ambayankhula mwamphanvu ndipo ambachita vinthu vikuluvikulu.
23 Padakwanisa magole 40, adaganiza* vakuti akawone* abale wake, Aizirayeli. 24 Padawona m’bale wake m’bodzi ankudzudziwa na munthu wa ku Iguputo, adamuteteza ndipo adabwezera pa kupha munthu wa ku Iguputo muyo. 25 Mose ambaganiza kuti azibale wake mwawo azindikire kuti Mulungu akuwapulumusa pakuphatisa basa djanja yake, koma iwo alibe kuizindikira mpfundo mweyi. 26 Mangwana yake iye adayenda pomwe kukawaona ndipo adagumana Aizirayeli anango akumenyana. Mose adayesa kuwathandiza kuti abverane ponena kuti: ‘Ni paubale panu wanthu imwe. Ndawa chani mukumenyana tene?’ 27 Koma yemwe ambamenya munzake ule adamugwinya nkunena kuti: ‘Ni mbani adakupasa udindo wakuti umbatitonge komasoti kutiweruza? 28 Ko ukufuna kunipha ninge momwe udaphera munthu wa ku Iguputo ule dzulo?’ 29 Padabva vimwevi, Mose adathawa nkukakhala mu dziko ya Midiyani. Kumuko adabereka wana awiri amuna.
30 Payadapita magole 40, mngelo adaonekera kwa iye muchipululu pa phiri ya Sinai, pa chitsamba chaminga chomwe chimbagaka moto. 31 Mose padawona vimwevi, adadabwa maninge. Koma pomwe angafenderera kuti awonesese, adabva mawu ya Yahova* yakuti: 32 ‘Ine ndine Mulungu wa azibereki wako, Mulungu wa Abulahamu, wa Isaki na wa Yakobo.’ Mose adayamba kunjenjemera ndipo alibe kufuna pomwe kufika pafupi na chitsamba chire kuti akaonesese. 33 Yahova* adamuuza kuti: “Vula ntsapato zako, ndawa malo yomwe waima ayo ni malo yochena. 34 Ine naona kuti wanthu wangu omwe ali ku Iguputo ankudzudziwa maninge. Nabva kubuula kwawo ndipo nabwera kudzawapulumusa. Manje nikufuna kuti nikutume uyende ku Iguputo.’ 35 Mose muyo yemwe iwo adamulamba nkunena kuti: “Ni mbani adakupasa udindo wakuti umbatitonge komasoti kutiweruza?,’ ni yemwe Mulungu adamutumiza ninge wolamulira na mpulumusi pakuphatisa basa mngelo yemwe adawonekera kwa iye pa chitsamba chaminga chire. 36 Munthu muyo adawatsogolera nkubula nawo ndipo adachita vodabwisa na vizindikiro ku Iguputo, pa Nyanja ifuwira komasoti muchipululu kwa magole 40.
37 Moyu ni Mose yemwe adauza Aizirayeli kuti: ‘Mulungu adzakupaseni mneneri ninge inepano kuchokera pakati pa abale wanu.’ 38 Moyu ndiye wenze na Aizirayeli muchipululu pabodzi na mngelo yemwe adayankhula na iye komasoti azibereki wathu paphiri ya Sinai. Iye adatambira mawu yopatulika yomwe ni yamphanvu kuti atipasire. 39 Koma azibereki wathu adalamba kumubvera. Pamwapo, adamugwinyira kumbali ndipo muntima mwawo adabwerera ku Iguputo. 40 Adauza Aroni kuti: ‘Tikonzere milungu kuti yatitsogolere ndawa tikudziwalini vomwe vachitikira Mose yemwe ambatitsogolera pochoka ku Iguputo.’ 41 Pamwapo iwo adakonza fano ya mwana wa ng’ombe muntsiku zimwezo. Padateno adabweresa ntsembe zopereka kwa fano mwiyo ndipo adakondwa na basa ya manja yawo. 42 Pamwapo Mulungu adawasiya kuti atumikire magulu yakudzulu ninge momwe malemba yanenera m’bukhu ya Aneneri. Malemba mwayo yanena kuti: ‘Wanthu imwe wa nyumba ya Izirayeli, ko muchipululu mule mungapereka ntsembe na vopereka vinango kwa ine kwa magole 40? 43 Imwepo mumbanyamula chihema* cha Moloki na nyenyezi ya mulungu yochemerewa Refani, mafano yomwe mudakonza kuti mumbayatumikire. Ndipomwapa nidzakuthamangisireni kutali kupitirira ku Babulo.’
44 Azibereki wathu mwawo enze na chihema cha umboni muchipululu. Adachikonza potewedza malangizo yomwe Mulungu adapereka kwa Mose mobverana na chihema chomwe Mose adawonesewa m’masomphenya. 45 Azibereki wathu adatambira chihema chimwechi kwa azibereki wawo ndipo adangena nacho pabodzi na Yoswa mudziko yomwe mwenze wanthu wa makhaindi yanango. Wanthu mwawo Mulungu adawathamangisa pamaso pa azibereki wathu ndipo chihema mwicho chidakhala mudziko mweyi mpakana munthawe ya Davide. 46 Mulungu adamukomera ntima Davide ndipo iye adakumbira kuti amupase mwayi wakuti amange nyumba yakuti Mulungu wa Yakobo ambakhalemo. 47 Koma Solomo ndiye yemwe adamangira Mulungu nyumba. 48 Olo kuti viri teno, Wam’dzulum’dzulu akhalalini munyumba zomangiwa na manja, mobverana na mawu ya mneneri yakuti: 49 ‘Yahova* wanena kuti, Kudzulu ni mpando wangu wachifumu ndipo dziko yapasi ni chopondapo mapazi yangu. Manje ko munganimangire nyumba yotani? Ndipo malo yomwe inepano ningapumulirepo yali kuponi? 50 Ko ni djanjalini yangu yomwe idakonza vose vimwevi?’
51 Wanthu wosakonzeka imwe komasoti wosachita mdulidwe wa muntima na wa m’matu. Nthawe zose mutsutsana na mzimu uchena. Mukuchita vinthu ninge momwe ambachitira azibereki wanu. 52 Ni mneneri mponi yemwe azibereki wanu alibe kumudzudza? Iwo adapha wanthu omwe adalengezeratu va kubwera kwa olungama, yemwe imwepo mudamupereka na kumupha. 53 Imwepo mudatambira Chilamulo kuchokera kwa angelo, koma ne kuchitewedza.”
54 Padabva vimwevi, adakalipa maninge ndipo adayamba kumukukutira manu. 55 Koma iye, padadzadziwa na mzimu uchena, adanyang’anisisa kudzulu ndipo adawona ulemerero wa Mulungu komasoti Yesu ali imirire kudjanja yamakulu ya Mulungu. 56 Ndipo adanena kuti: “Onani! Ninkuwona kudzulu kuli funguke, ndipo mwana wa munthu waima kudjanja yamakulu ya Mulungu.” 57 Iwo padabva vimwevi adakuwa maninge nkufunga m’matu na manja yawo ndipo wose adathamangira pomwe penze iye. 58 Patsogolo pake adamubulisira kunja kwa thaundi nkuyamba kumuphwanya na minyala. Ndipo mboni zidaikha malaya yawo yakunja pafupi na mulumbwana munango dzina yake Saulo. 59 Pomwe angamuphwanya na minyala, Sitefano adakumbira mogwigwirira kuti: “Ambuya Yesu, tambirani mzimu wangu.” 60 Pamwapo adagwada nkukuwa na mawu yamphanvu kuti: “Yahova,* ayi kuwalanga ndawa ya chimo mweyi.” Padanena vimwevi adafa.