Wonembewa na Mateyu
8 Padabuluka m’phiri mumo, chigulu cha wanthu chidamulondola. 2 Pamwapo padafika munthu wakhate. Munthu muyo adamugwadira nkulewa kuti: “Ambuya, ninkudziwa kuti peno munkufuna mungakwanise kunichenesa.” 3 Pamwapo Yesu adapfuthula djanja yake nkumugumirira ndipo adamuuza kuti: “Inde ninkufuna. Khala wochena.” Nthawe mwiyoletu khate yake ire idamala. 4 Pamwapo Yesu adamuuza kuti: “Ayi kuuza munthu aliyese nkhani mweyi, koma uyende ukadziwonese kwa wantsembe ndipo ukapereke mphaso yomwe Mose adalamula, kuti ukhale umboni kwa iwo.”
5 Yesu padangena mu thaundi ya Kaperenao, nkulu wa masocha adabwera kwa iye nkumukumbira 6 kuti: “Ambuya, nyabasa wangu wazizira vidzo, mwakuti pano ali gone m’nyumba ndipo ankubonera maninge.” 7 Iye adamuuza kuti: “Nikafika kumuko, nikamupolese.” 8 Nkulu wa masocha ule adadawira kuti: “Ambuya, ndinelini munthu woyenerera kuti imwepo mungangene m’nyumba mwangu, mundonena mawu yokha ndipo nyabasa wangu muyo apole. 9 Ndawa yakuti inembo nina akuluakulu womwe aninyang’anira ndipo ninamasocha yomwe niyanyang’anirambo. Nikauza m’bodzi kuti: ‘Yenda!’ ayenda, nikauza munango kuti: ‘Bwera!’ abwera. Nyabasa wangu nikamuuza kuti: ‘Chita ichi!’ achitiratu.” 10 Yesu padabva vimwevo, adadabwa ndipo adauza omwe angamutewera wale kuti: “Kunena shuwa ninkukuuzani, mu Izirayeli nikalibe kugumanamo munthu aliyese wachikhulupiriro chikulu ninge chimwechi. 11 Koma ninkukuuzani kuti azinji wochokera kumbali ya kumachibese, na kumbali ya kum’maulo adzabwere nkukhala pa meza pabodzi na Abulahamu, Isaki na Yakobo mu Ufumu wakudzulu, 12 koma wana wa Ufumu moyu adzaponyewe kunja kumdima. Kumuko adzalire na kukukuta manu.” 13 Pamwapo Yesu adauza nkulu wa masocha ule kuti: “Yenda, pakuti waonesa chikhulupiriro, vomwe wakumbira vichitike.” Pa nthawe mweyoletu, nyabasa ule adapola.
14 Manje Yesu padangena m’nyumba ya Petulo, adawona apongozi wachikazi wa Petulo aligone ndawa enze wofesuka. 15 Pamwapo adaphata djanja ya mayi ule ndipo adapoleratu, mpakana adamuka achiwaphikira chakudya. 16 Koma chakum’maulo, wanthu adamubweresera wanthu azinji wophatiwa na viwanda. Iye adabulisa mizimu mwayo na mawu yokha ndipo adapolesa wanthu wose womwe angadwala. 17 Adachita vimwevi kuti vomwe Mulungu adalewa pakuphatisira basa mneneri Yesaya vikwanirisike. Iye adalewa kuti: “Iye adatenga matenda yathu, nkutakula vowawa vathu.”
18 Yesu padawona kuti gulu ya wanthu yamuzwengerera, adauza wopfunzira wake kuti naboni tiyambuke tiyende tsidya inango. 19 Pamwapo kudabwera mulembi ndipo adamuuza kuti: “Mpfunzisi, nikutewereni kulikose kwamungayende.” 20 Koma Yesu adamudawira kuti: “Nkhandwe ziri nazo mphako zokhala, ndipo mbalani zamunlengalenga zinavisa, koma Mwana wa munthu alibiretu olo potsamirisa msolo wake.” 21 Pamwapo m’bodzi mwa wopfunzira wake adamuuza kuti: “Ambuya, nibvumizeni kuti niyambe nayenda kukaikha maliro ya ababa wangu.” 22 Yesu adamudawira kuti: “Iwepo upitirize kunitewera ndipo asiye wakufa aikhe wakufa anzawo.”
23 Padakwira barko, wopfunzira wake adamulondola. 24 Patsogolo pake panyanja padayamba chimphepo champhanvu mpakana mabimbi yambapitisa madzi m’barko, koma iye wenze m’tulo. 25 Ndipo adayenda kukamumusa nkumuuza kuti: “Ambuya, tipulumuseni tinkufa!” 26 Koma iye adawabvunza kuti: “Ndawa chani munkuchita mantha tene wanthu wachikhulupiriro chochepa imwe?’” Pamwapo iye adamuka nkutsuula mphepo ile na nyanja ndipo kudademba maninge. 27 Ndawa ya vimwevi, amuna wale adadabwa nkunena kuti: “Ko munthu moyu ni wakhaindi yanyi? Mpakana mphepo na nyanja kumbamubvera!”
28 Padafika ku tsidya inango mu dera ya Agadara, adagumana na amuna awiri wophatiwa na viwanda ankuchokera ku manda.* Amuna mwawa enze wopasa mantha maninge ndipo palibe aliyese yemwe ambachita chikanga nkupita na njira mweyo. 29 Nthawe mweyo iwo adakuwa kuti: “Ko imwepo Mwana wa Mulungu munkufuna chani kwa isepano? Ko munkufuna kutilanga nthawe yoikhiwiratu ikanati yakwana?” 30 Koma pataliko na mwapo, penze nkhumba zizinji zomwe zimbadyera. 31 Pamwapo viwanda vire vidayamba kugwigwirira kuti: “Peno munkufuna kutibulisa, mutitumize munkhumba.” 32 Iye adaviuza kuti: “Ndokoni!” Pamwapo ivo vidachoka nkukangena mu nkhumba zire. Nthawe mweyo nkhumba zose mwizo zidathamangira kuphompho nkukangeneratu munyanja, ndipo zidafera m’madzi mumo. 33 Koma anyakabusa wa nkhumba zire adathawa ndipo padangena mu thaundi adafotokoza vose kuphatanidzapo vomwe vidachitikira amuna wophatiwa na viwanda wale. 34 Pamwapo wanthu wose wa muthaundi adayenda kukagumana na Yesu. Padamuwona, adamukumbira kuti achoke mudera yawo.”