Wonembewa na Luka
16 Patsogolo pake adauza pomwe wopfunzira wake kuti: “Munthu munango wolemera wenze na ntumiki wonyang’anira nyumba yake, yemwe wanthu anango adamunenera kuti ankudzonga chuma. 2 Pamwapo adamuchemera nkumuuza kuti: ‘Nabva voipa vomwe ukuchita. Yenda ukanembe pa tsamba momwe wakhala unkuphatira basa yonyang’anira nyumba ino nkunipasa, ndawa upitirizelini kufambisa basa za pamuyi pano.’ 3 Pamwapo ntumiki muyo muntima mwake adati: ‘Nichite tani pamwapa? Abwana wangu ankufuna kunichosa basa. Ningakwaniselini kulima ndawa niribe mphanvu ndipo ninkuchita manyazi kuti nimbachite kukumbira vinthu. 4 Yaa! Nadziwa vati nichite kuti akanichosa basa, wanthu akanitambire bwino m’mamiyi mwawo.’ 5 Pamwapo adachemera womwe enze na vikwerete kwa abwana wake ndipo adabvunza m’bodzi na m’bodzi, ndipo adabvunza woyamba kuti: ‘Unachikwerete chikulu tani kwa abwana wangu?’ 6 Iye adadawira kuti: ‘Mitsuko 100* ya mafuta ya maolivi.’ Iye adamuuza kuti: ‘Tenga kalata yamudasainirana chikwerete chako ndipo ukhale pasi n’kunemba mitsuko 50 mwakankulumize.’ 7 Patsogolo pake adabvunza munango kuti: ‘Ko iwepo chikwerete chako ni chikulu tani?’ Iye adadawira kuti: ‘Madengu 100 ya tirigu.’ Iye adamuuza kuti: ‘Tenga kalata yamudasainirana chikwerete chako ndipo unembepo madengu 80.’ 8 Bwana wake ule adamutembeja ntumiki moyu, podiya kuti wenzelini wolungama, ndawa adachita vinthu mwanzeru. Ndawa wana wa nthawe* ino achita mwanzeru akambachita vinthu na wanthu wa m’badwo wawo kuposa wana wa kugaka.
9 “Imwembo ninkukuuzani kuti: Gumanani anzanu pakuphatisa basa chuma chosalungama, kuti chuma mwicho chikamala, akakutambireni m’malo yokhala mpakana kalekale. 10 Munthu yemwe ni wokhulupirika pa chinthu ching’ono akhala pomwe wokhulupirika pa chinthu chikulu, ndipo munthu yemwe ni wosakhulupirika pa chinthu ching’ono akhala pomwe wosakhulupirika pa chinthu chikulu. 11 Ndipomwapa peno mulibe kuwonesa kuti ndimwe wokhulupirika pa chuma chosalungama, ni mbani yemwe angakupaseni basa yonyang’anira chuma chaicho? 12 Komasoti peno mulibe kuwonesa kuti ndimwe wokhulupirika pa vinthu va anango, ni mbani angakupaseni mphoto yomwe adakusungirani? 13 Ntumiki angakhalelini kapolo wa mabwana yawiri, ndawa angazondane na m’bodzi nkukonda munango, panango angakhale wokhulupirika kwa m’bodzi n’kunyoza munango. Mungakhalelini akapolo wa Mulungu na Chuma nthawe ibodzi.”
14 Manje Afalisi omwe ambakonda maninge kobiri, ambabvesera vose vimwevi ndipo adayamba kumunyoza. 15 Pamwapo iye adawauza kuti: “Imwepo ndimwe wale womwe munena pamaso pa wanthu kuti ndimwe wolungama, koma Mulungu akudziwa mitima yanu. Ndawa chomwe wanthu achiwona kuti ni chapadzulu ni chonyantsa pamaso pa Mulungu.
16 “Wanthu ambalalikira va Chilamulo na vomwe aneneri adanemba kudzafika mu nthawi ya Yohani. Kuyambira nthawi mwiyo, ntontholo wabwino womwe unkulengezewa ni wonena va Ufumu wa Mulungu, ndipo wanthu wosiyanasiyana ankuyesesa mwakhama kuti akangenemo. 17 Shuwadi, ni vosashupa kuti kudzulu na dziko yapasi vichoke kusiyana nakuti kambali kang’ono ka letra ka m’Chilamulo kaleke kukwanirisiwa.
18 “Aliyese yemwe wasiya nkazi wake nkulowola munango, wachita chigololo ndipo aliyese yemwe walowola nkazi wosiyiwa muyo nayembo wachita chigololo.
19 “Penze munthu munango wolemera yemwe ambakonda kuvala vovala vifuwira na nguwo zabwino maninge. Iye ambakondwa na kudya vabwino ntsiku na ntsiku. 20 Komasoti penze munthu munango yemwe ambandokhalira kukumbira, yemwe wenze na vilonda thupi yake yose dzina yake Lazaro ndipo wanthu ambamukhazika pa nsuwo wa mpanda wa munthu wolemera muyo. 21 Iye ambakhumbwira kudya vombwera pameza ya munthu wolemera ule. Nazombo mbwaya zimbabwera kudzanyanguta vilonda vake. 22 Nkuyenda kwa nthawe munthu yemwe ambandokhalira kukumbira ule adamwalira ndipo angelo adamutenga nkukamuikha pambali pa Abulahamu.
“Nayembo munthu wolemera ule adamwalira ndipo adaikhiwa m’manda. 23 Ali m’Manda* mumo komasoti ankudzudzika, adakwiza maso yake nkuwona Abulahamu ali pataliko ndipo Lazaro wenze pambali pake. 24 Pamwapo adachemera kuti: ‘Ababa Abulahamu, nichitireni chifundo. Tumani Lazaro kuti avuwike ntsonga ya chala chake m’madzi kuti azizirise lilimi yangu, ndawa ninkudzudzika m’moto uzinji uyu.’ 25 Koma Abulahamu adati: ‘Mwanawe, kumbukira kuti udatambiliratu vabwino vako vose pomwe wenze na moyo, ndipo Lazaro adatambira vinthu voipa. Manjeuno ankukondwa kuno koma iwepo unkudzudzika. 26 Komasoti pakati pa isepano na imwepo paikhiwasoti chidindi chikulu maninge, mwakuti yemwe akufuna kubwera kumuko kuchokera kuno angakwaniselini. Komasoti wanthu angayambukelini kuchokera kumuko kubwera kuno.’ 27 Manje munthu wolemera ule adati: ‘Pakuti viri teno, ninkukukumbirani ababa kuti mumutumize kunyumba kwa ababa wangu. 28 Ndawa ninawo azibale wangu wokwana 5 kumuko, manje ayende akawapase umboni wokwana, kuti nawombo osati adzabwere kumalo yodzudzikira kuno.’ 29 Koma Abulahamu adanena kuti: ‘Kumuko anavonemba va Mose na vomwe aneneri adanemba, abvere vimwevo.’ 30 Pamwapo iye adati: ‘Neye pulizi ababa Abulahamu, koma peno munango wochokera kwa akufa angayende kumuko, iwo adzalape shuwa.’ 31 Koma iye adamuuza kuti: ‘Peno ankubveralini vonemba va Mose na vomwe aneneri adanemba, vingakwanisikelini podiya munango achimuka kwa akufa.’”