Wonembewa na Mateyu

27 Machibese pakudachena, wantsembe akulu wose pabodzi na akulu wa wanthu adakambirana nkubverana vakuti aphe Yesu. 2 Ndipo padamumanga adayenda kukamupereka kwa Pilato yemwe wenze Governador.

3 Patsogolo pake Yudasi yemwe adamupereka ule padawona kuti Yesu wagemuliwa kuti aphewe, adawawiwa maninge mu ntima mpakana adayenda kukabweza kobiri 30 za siliva zire kwa wantsembe akulu komasoti akulu. 4 Iye adati: “Nachimwa pakupereka munthu wosaphonya.” Iwo adamudawira kuti: “Isepano tiribe navo basa. Ni zako izo!”* 5 Pamwapo iye adathusa kobiri za siliva zire mu kachisi nkuchokapo. Patsogolo pake adayenda kukadzimangirira. 6 Koma wantsembe akulu adatenga kobiri za siliva zire nkulewa kuti: “Nivosabvumizika kuti kobiri zimwezi ziikhiwe m’malo yopatulika yosungiramo chuma ndawa ni malipiro ya magazi.” 7 Padakambirana adaphatisa basa kobiri mwezi pakugulira munda wa woumba mbiya kuti ukhale manda ya alendo. 8 Ndipomwapa munda muyo uchemerewa Munda wa magazi mpakana lero. 9 Vimwevi vidakwanirisa mawu yomwe Mulungu adaneneratu pakuphatisa basa mneneri Yeremiya kuti: “Ndipo adatenga kobiri 30 zasiliva, ntengo wogulira munthu, ntengo womwe anango mwa wana wa Izirayeli adamuikhira, 10 ndipo adagulira munda wa woumba mbiya mobverana na vomwe Yahova* adanilamula.”

11 Manje Yesu adaimirira pamaso pa governador ndipo governador muyo adamubvunza kuti: “Ko iwepo ndiwe Mpfumu ya Ayuda?” Yesu adadawira kuti: “Vili tenoletu ninge mwamwanenera.” 12 Koma antsembe akulu na akulu pambamunamizira, iye alibe kudawira chirichose. 13 Pamwapo Pilato adamubvunza kuti: “Ko iwepo unkubvalini vinthu vizinjizinji vomwe ankukunamizira ivi?” 14 Koma iye adandokhala chete, alibe kumudawira chinthu, mpakana governador moyu adadabwa maninge.

15 Pa chikondwerero chirichose, Pilato ambauza wanthu kuti alewe womwe iwo ankufuna kuti amasuliwe mudjeri ndipo iye ambamumasuladi. 16 Pa nthawe mweyi, penze munthu munango yemwe wenze woipa maninge yemwe wenze mudjeri dzina yake Baraba. 17 Manje wanthu padasonkhana pabodzi, Pilato adawabvunza kuti: “Ko munkufuna kuti nikumasulireni mbani, Baraba panango Yesu, yemwe mumuchemera kuti Khrisitu?” 18 Ndawa Pilato ambadziwa kuti wanthu mwawa adapereka Yesu ndawa ya njiru. 19 Manje padakhala pa mpando wotongera milandu, nkazi wake adamutumizira mawu yakuti: “Ayi kuti mungenerereko nkhani ya munthu wolungama moyu, ndawa inepano navingiwa maninge kutulo lero ndawa ya munthu moyu.” 20 Koma olo nteno, antsembe akulu pabodzi na akulu adalimbikisa wanthu kuti akumbire kuti amasuliriwe Baraba, koma kuti Yesu aphewe. 21 Manje Pilato ule adawabvunza kuti: “Ko pa wanthu awiri awa munkufuna kuti nikumasulireni mbani?” Iwo adati: “Baraba.” 22 Pilato adabvunza pomwe kuti: “Manje Yesu, yemwe mumuchemera kuti Khrisitu nichite naye chani?” Wose adadawira kuti: “Amanikiwe muyo!”* 23 Iye adati: “Ndawa chani? Ko moyu waphonya chani?” Koma wanthu mwawo adapitiriza kukuwa mwamphanvu kuti: “Muyo amanikiwe basi!”

24 Padawona kuti vinkuthandizalini koma vikundoyambisa chipiringu, Pilato adatenga madzi nkusamba m’manja pamaso pa gulu yose ya wanthu mwawo, ndipo adalewa kuti: “Inepano niribe mulandu wa magazi ya munthu moyu. Mudziwe mwekha vati muchite naye.” 25 Padalewa vimwevi, wanthu wose adadawira kuti: “Magazi yake yakhale pa ise na pa wana wathu.” 26 Pamwapo adawamasulira Baraba koma adalamula kuti Yesu akwapuliwe, ndipo patsogolo pake adamupereka kuti akamuphe mwa kuchita kumumanika pamuti.

27 Pamwapo masocha ya governador yadatenga Yesu nkungena naye m’nyumba ya governador muyo ndipo adachemeresa gulu yose ya masocha kuti abwere kwa iye. 28 Kumuko adamuvula vovala vake nkumuvazika chinguwo chofuwira maninge. 29 Ndipo adaluka pomwe chisote chachifumu cha minga nkumuvazika ku msolo kwake ndipo adamupasa ntsanga ku djanja yake ya makulu. Patsogolo pake adamugwadira nkumbamunyoza kuti: “Muli tani Mpfumu ya Ayuda!” 30 Padateno, adamulavulira mata ndipo adakatenga ntsanga ile nkuyamba kumumenya nayo mu msolo. 31 Padamaliza kumunyoza, adamuvula chinguwo chire nkumuvazika malaya yake yakunja ndipo adayenda naye kuti akamukhomerere pamuti.

32 Ali munjira, adagumana na munthu munango wa ku Kurene dzina yake Simoni. Ndipo adakakamiza munthu moyu kuti asenze muti wodzudzikirapo* wa Yesu. 33 Padafika pa malo yochemerewa Gologota, kutanthauza kuti Malo ya Chibade, 34 adapasa Yesu vinyu wosanganisa na vinthu vowawa vamadzimadzi kuti amwe, koma iye padalawa adalamba kumwa. 35 Padamukhomerera pa muti adagawana malaya yake ya kunja mwa kuchita maere 36 ndipo adakhala pasi nkumbamunyang’anira. 37 Ndipo padzulu pa msolo wake adakhomapo chikwangwani chowonesa mulandu womwe adamuphera kuti: “Uyu ni Yesu Mpfumu ya Ayuda.”

38 Vigananga viwiri vidamanikiwa naye pabodzi. M’bodzi adamumanika kudjanja yake yamakulu ndipo munango adamumanika kumadzere kwake. 39 Wanthu womwe ambagwata pafupi ambanena mawu yonyoza Yesu ndipo ambachita misolo yawo kupukupu 40 nkumbanena kuti: “Iwe yemwe umbalewa kuti ungakwanise kugwesa kachisi nkumumanga mu ntsiku zitatu, dzipulumuse! Peno ndiwedi mwana wa Mulungu, buluka tiwone pa muti wodzudzikirapo* moyu!” 41 Nchibodzibodzimbo antsembe akulu pabodzi na alembi na akulu. Iwombo adayamba kumunyoza nkumbalewa kuti: 42 “Anango adakwanisa kuwapulumusa, koma kuti adzipulumuse yekha vinkumukanga! Peno moyu ni Mpfumudi ya Izirayeli, naboni tiwone peno angakwanise kubuluka pa muti wodzudzikirapo* moyu, ndipo akachita vimwevi timukhulupirire. 43 Pale iye akhulupirira Mulungu, manje peno Mulungu uyo ankumufunadi amupulumuse, ndawa iye ambanena kuti: ‘Ine ndine Mwana wa Mulungu.’” 44 Navombo vigananga vomwe vidamanikiwa naye pabodzi vimbamunyoza.

45 Kuyambira 12 ora* mpakana 15 ora, mudziko yose mweyo mudachita mdima. 46 Cha m’ma 15 ora mumo, Yesu adakuwa mwamphanvu kuti: “Eli, Eli, lama sabactâni?” kutanthauza kuti: “Mulungu wangu, Mulungu wangu, mwanisiiranyi ine?” 47 Wanthu anango omwe enze adaimirira pafupi padabva vimwevi, adayamba kunena kuti: “ Munthu moyu ankuchemera Eliya.” 48 Nthawe mweyo m’bodzi adathamanga nkukatenga siponja* nkuivuwika mu vinyu wowawasha ndipo adaiikha ku ntsanga nkumupasa kuti amwe. 49 Koma anango adati: “Mulekeni! Tiwone peno Eliya angabwere kudzamupulumusa.” 50 Pamwapo Yesu adakuwa maninge ndipo adamalizika.

51 Nthawe mweyo, nguwo yogwatiza ya mu nyumba yopatulika idang’ambika pakati kuchokera padzulu mpakana pasi. Dziko yapasi idagunduzika ndipo viminyala vidang’ambika. 52 Manda* yadafunguka ndipo vitanda vizinji va wanthu wochena womwe adaikhiwa mumo vidathusiwa kunja, 53 ndipo wanthu azinji adakwanisa kuwona. (Yesu padamukisiwa, wanthu womwe angachokera kumanda muko adangena mu thaundi ichena.) 54 Koma nkulu wa masocha na anango womwe enze naye pabodzi pakudikhirira Yesu padawona chivomezi chimwecho na vomwe vidachitika, adachita mantha maninge ndipo adalewa kuti: “Shuwadi, moyu wenzedi Mwana wa Mulungu.”

55 Ndipo azimayi azinji wochokera ku Galileya womwe ambamutewera kuti ambamutumikire, enze kumuko nkumbanyang’anira ali patali. 56 Pagulu ya azimayi mwawa penze Mariya wa ku Magadala, Mariya mayi wa Yakobo na Yose ndipo penze pomwe amayi wa Yakobo na Yohani.

57 Manje maulo maninge kudabwera munthu munango wolemera wa ku Arimateya dzina yake Yosefe, yemwe adakhalambo wopfunzira wa Yesu. 58 Iye adayenda kwa Pilato kukakumbira thupi ya Yesu ndipo Pilato adalamula kuti amupase chitanda mwicho. 59 Yosefe adatenga thupi mweyo nkuikulungira mu nguwo ichena yabwino maninge, 60 ndipo adayenda kukaiikha m’manda* yake yanyowani yomwe adayasema mu chimwala. Patsogolo pake padakunkhuliza chimwala chikulu nkufunga pa nsuwo pa manda* mwayo adachoka. 61 Koma Mariya wa ku Magadala na Mariya adasalirira kumuko, ali khale pasi pafupi na manda mwayo.

62 Mangwana yake paidapita Ntsiku Yokonzekera, wantsembe akulu na Afalisi adasonkhana pamaso pa Pilato, 63 nkulewa kuti: “Bwana, isepano takumbukira kuti munthu wonama ule pewenze na moyo, adalewa kuti: ‘Zikadzapita ntsiku zitatu nidzamukisiwe.’ 64 Ndipomwapa lamulani mwamphanvu kuti ateteze mwamphanvu pa manda mwapo mpakana ntsiku yachitatu, kuti wopfunzira wake osati abwere kudzamuba nkumbauza wanthu kuti: ‘Adamukisiwa kwa wakufa!’ Ndawa bodza yomalizira mweyi idzakhale yoipa maninge kuposha yoyamba ile.” 65 Pilato adawadawira kuti: “Tengani masocha aya yachitetezo. Yendani mukalimbise chitetezo ninge momwe munkudziwira.” 66 Pamwapo adayenda kukalimbisa chitetezo pa manda mwayo mwakuchita kupafunga maninge pa manda mwapo na chimwala, nkuikhapo masocha yoteteza.