Kwa Aroma
7 Ninkuyankhula na imwepo abale omwe mudziwa Chilamulo. Ko munkudziwalini kuti Chilamulo chikhala na mphanvu pa munthu pomwe munthu muyo ali na moyo? 2 Mwakulinganiza, nkazi wolowodwa akhala womangika kwa mwamuna wake mwa lamulo pomwe mwamuna muyo ali moyo. Koma mwamuna muyo akamwalira, nkazi akhala womasuka ku lamulo ya mwamuna wake. 3 Peno nkazi angalowodwe na mwamuna munango mwamuna wake ali na moyo, ndiye kuti wachita chigololo. Koma peno mwamuna wake wamwalira, nkazi muyo wamasuka ku lamulo ya mwamuna wake. Ndipomwapa peno angalowodwe na mwamuna munango, alibe kuchita chigololo.
4 Abale wangu, thupi ya Khrisitu idakumasulani ku Chilamulo, kuti mukhale wa munango yemwe adamukisiwa na cholinga chakuti tibale vipaso kwa Mulungu. 5 Ndawa pomwe timbakhala mobverana na mathupi yathu yochimwa mwaya, Chilamulo chidachitisa kuti vilakolako va uchimo vomwe tenze navo m’mathupi yathu viwonekere. Ndipo vilakolako mwivi vidakatibweresera impfa. 6 Koma manjeuno tamasuliwa ku Chilamulo, ndawa tafa ku Chilamulo chomwe chingatimanga kuti tikhale akapolo munjira inyowani motsogolerewa na mzimu, osati munjira yakale motsogolerewa na malamulo yonembewa.
7 Manje tinene kuti chani? Ko Chilamulo ni uchimo? Neye shuwa. Kunena shuwa, nidakadziwalini uchimo vidakakhala kuti penze palibe Chilamulo. Mwakulinganiza, nidakadziwalini kukhumbira kwa ntsanje vikadakhala kuti Chilamulo chiribe kunena kuti: “Ayi kukhumbira mwantsanje.” 8 Koma ndawa ya lamulo, uchimo udagumana njira yonichitisa kukhala na kusirira kwa ntsanje kwa khaindi iriyose. Ndawa palibe Chilamulo, uchimo wenze ulibe mphanvu. 9 Chilamulo chikalibe kuperekewa nenze wamoyo. Koma Chilamulo pachidafika, uchimo udakhala pomwe na moyo, koma inepano nidafa. 10 Ndipo lamulo yomwe imbafunika kunitsogolera kuti nigumane moyo, idanitsogolera ku impfa. 11 Uchimo udaphatisa basa lamulo mweyi pakuninyengerera ndipo udanipha. 12 Ndipomwapa Chilamulo pachokha ni chochena, ndipo malamulo ni yochena, yolungama komasoti yabwino.
13 Ko vinthu vimwevi vinkutanthauza kuti chinthu chabwino chidachitisa kuti nife? Neye. Uchimo ndiwo udachitisa kuti nife. Chilamulo ni chabwino, kundoti chidachitisa kuti vidziwike bwino kuti uchimo ukuchitisa kuti nife. Ndipomwapa malamulo yadatithandiza kudziwa kuti uchimo ni woipa maninge. 14 Ndawa tinkudziwa kuti Chilamulo ni chochokera kwa Mulungu pophatisira basa mzimu, koma inepano ndinelini wangwiro ndipo nidagulisiwa ku uchimo. 15 Nibvesalini vomwe vinichitikira. Ndawa vomwe nifuna kuvichita, nivichitalini. Koma vomwe niyipidwa navo ni vomwe nichita. 16 Koma olo nteno peno nichita vomwe ninkufunalini kuchita, ndiye kuti ninkudawikiza kuti Chilamulo ni chabwino. 17 Koma yemwe ankuchita vimwevo ndinelini, koma uchimo omwe uli na ine. 18 Ninkudziwa kuti thupi yangu yochimwa iyi, iribe chirichose chabwino. Ndawa nifuna kuchita vabwino, koma nikwanisalini kuvichita. 19 Vinthu vabwino vomwe nifuna kuchita nivichitalini, koma voipa vomwe nifunalini kuchita ni vomwe nichita. 20 Manje peno nichita vomwe nifunalini ndiye kuti yemwe ankuchita vimwevo ndinelini, koma uchimo omwe uli mwa ine.
21 Vomwe vinichitikira ni vakuti, pomwe ninkufuna kuchita vinthu vabwino, voipa vikhala muntima mwangu umu. 22 Mu ntima mwangu nikondwa maninge na malamulo ya Mulungu, 23 koma niwona lamulo inango mthupi mwangu inkumenyana na malamulo ya m’maganizo mwangu nkunichitisa kukhala kapolo wa lamulo ya uchimo yomwe iri mthupi mwangu. 24 Munthu wobvesa ntsisi ine! Nimbani adzanipulumuse ku thupi mweyi yomwe inkunichitisa kuti nife? 25 Mulungu adzanipulumuse pakuphatisa basa Yesu Khrisitu Ambuya wathu. Ndipomwapa m’maganizo mwangu ndine kapolo wa malamulo ya Mulungu, koma mthupi yangu ndine kapolo wa lamulo ya uchimo.