Kalata yoyamba yoyenda kwa Atesalonika
2 Shuwadi, imwepo mukudziwa abale, kuti ulendo wathu wobwera kwa imwepo sikuti wenze ulibe phindu. 2 Ndawa podiya kuti pakuyamba tidabonera na kuchitiriwa voipa ku Filipi, ninge momwe tikudziwira, tidalimba ntima mothandiziwa na Mulungu wathu kuti tikuuzeni ntontholo wabwino wa Mulungu panthawe yomwe wanthu ambatitsutsa maninge. 3 Vomwe tinkukulimbikisani kuti muchite vinkuchokeralini m’maganizo yophonyeka panango yopsyipiziwa ndipo tinkuvinenalini mosowa chilungamo. 4 Koma Mulungu wabvumiza kuti tipasiwe basa yolalikira ntontholo wabwino. Ndipomwapa, tinkuyankhulalini na cholinga chokondweresa wanthu, koma kukondweresa Mulungu yemwe aunguza mitima yathu.
5 Ndipo mukudziwa kuti tikanati takuyankhulani mawu yokutembejani monamizira, panango kuchita vinthu vilibe chilungamo na volinga vadyera. Mulungu ni mboni yathu. 6 Komasoti tinkufunalini ulemerero wochokera kwa wanthu, panango kuchokera kwa imwepo panango kwa wanthu anango, podiya kuti ninge atumi wa Khrisitu tidakakwanisa kukumbira kuti mutilipirire vinthu vinango kuti mutithandize. 7 Koma tidakuwonesani chikondi komasoti kukoma ntima ninge momwe mayi woyamwisa achitira posamalira wana wake mwachikondi. 8 Manje pakuti tikukondani maninge, timbafunisisa kukuuzani ntontholo wabwino wa Mulungu komasoti kupereka moyo wathu chaiwo kuti tikuthandizeni.
9 Shuwadi abale, mukukumbukira kuti tidayesesa kuphata basa mwakhama na mphanvu zathu zose. Timbaphata basa usiku na masikati kuti aliyese wa imwepo osati atilipirire chinthu pakufuna kutithandiza, patimbalalikira ntontholo wabwino wa Mulungu kwa imwepo. 10 Petenze na imwepo atumiki wa Mulungu, tenze okhulupirika, timbachita vinthu vachilungamo komasoti tenze tilibe chifukwa chotinenera vinthu voipa. Imwepo na Mulungu ndimwe mboni zathu. 11 Imwepo mukudziwa bwino kuti aliyese wa imwepo tingamudandaulira, kumulimbikisa komasoti kumulangiza ninge momwe baba achitira na wana wake. 12 Timbachita vimwevi na cholinga chakuti mupitirize kufamba munjira yomwe Mulungu afuna. Iye ndiye adakuchemerani kuti mungene mu Ufumu wake na kutambira ulemerero.
13 Ndipomwapa, isembo titembeja Mulungu mosalekedza ndawa pomwe mudatambira mawu ya Mulungu yomwe mudayabva kwa ise, mulibe kuyatambira ninge mawu ya wanthu, koma momwe yalilidi, ninge mawu ya Mulungu. Mawu mwaya yakuphata pomwe basa kwa imwepo atumiki wa Mulungu. 14 Ndawa imwepo abale mudatewedzera mipingo ya Mulungu yobverana na Yesu Khrisitu yomwe yali ku Yudeya. Tinkunena teno ndawa mudayamba kuboneresewa na wanthu wakwanu, ninge momwe iwombo ankubonereserewa na Ayuda. 15 Iwo adafika pakupha Ambuya Yesu komasoti aneneri ndipo ise adatidzudza. Kuingizira pamwapo, iwo ankukondweresalini Mulungu, koma ankuchita vinthu vomwe vingaphinduliselini wanthu wose. 16 Iwo ankuchita vimwevi pomwe akuyesa kutilambiza kulalikira kwa wanthu wamakhaindi yanango vomwe angachite kuti adzapulumuke. Pakuchita vimwevi, nthawe zose akuingizira machimo yawo. Koma manje ukali wake wawafikira.
17 Koma pomwe tidachichimizika kusiyana na imwepo abale, kwa nthawe ing’ono (maso na maso osati mu ntima mwathu), tidayesesa maninge kuti tikuwoneni maso na maso, ndawa ndivo vomwe timbafunisisa maninge. 18 Ndipomwapa timbafuna kubwera kwa imwepo ndipo inepano Paulo nidayesesa kuti nibwere, osati kabodzi kokha koma kawiri, koma Satana adatchingiriza njira yathu. 19 Ko chidikhiro chathu panango chimwemwe chathu ni chani? Ko malipiro yomwe tidzameke nayo pamaso pa Ambuya wathu Yesu, pa nthawe ya kukhalapo kwake ni chani? Ko ndimwepolini? 20 Shuwadi, imwepo ndimwe ulemerero wathu komasoti chimwemwe chathu.