Kwa Agalatiya
5 Khrisitu adatimasula kuti tikhale na ufulu moyu. Ndipomwapa khalani olimba ndipo ayi kubvuma kuti mumangiwe pomwe pa djoko ya ukapolo.
2 Bvani! Inepano Paulo ninkukuuzani kuti mukachitiwa mdulidwe, vomwe Khrisitu adachita vidzakhale viribe na basa kwa imwepo. 3 Ninkukumbusa pomwe kachiwiri kuti munthu aliyese yemwe ankuchitiwa mdulidwe, afunika kutewedza pomwe vinthu vose va mu Chilamulo. 4 Imwepo omwe mukufuna kuti mumbawonewe kuti ndimwe olungama ndawa yotewedza chilamulo, mwadzisiyanisa na Khrisitu. Ndipo mwachitisa pomwe kuti muleke kudzatambira kukoma ntima kwake kukulu. 5 Koma kupitira mwa mzimu, isepano tinkudikhira vomwe vidzatichitikire ndawa yowonewa kuti ndise olungama, ndawa ya chikhulupiriro. 6 Ndawa peno munthu ni wobverana na Yesu Khrisitu, kuchitiwa mdulidwe panango kusachitiwa mdulidwe kukhala kulibe basa. Koma chofunika maninge ni kukhala na chikhulupiriro chomwe chionekera powonesa chikondi.
7 Mumbathamanga bwinobwino. Ni mbani adakusokonezani kuti muleke kupitiriza kubvera chonadi? 8 Vomwe wanthu omwe adakusokonezani mwawo angapfunzisa viribe kuchokera kwa Mulungu yemwe adakuchemerani. 9 Vofufumisa ving’onong’ono vifufumisa ufa wose wokanyakanya. 10 Ninkukhulupirira kuti imwepo omwe ndimwe obverana na Ambuya, mudzachinjelini maganizo. Koma munthu muyo yemwe akuboneresani peno ni mbani, adzaweruziwe mobverana na vomwe wachita. 11 Pakunena va inepano abale, peno nidakapitiriza kulalikira kuti wanthu ambachitiwe mdulidwe, ndawa chani ninkupitiriza kudzudziwa? Vidakakhala teno, ndiye kuti vomwe nipfunzisa wanthu vakuti Yesu adafera pa muti wodzudzikirapo,* vidakakalipisalini pomwe wanthu. 12 Nidakakonda kuti wanthu mwawo omwe ankufuna kukusokonezani maganizo, adzithene okha.
13 Abale, mudachemerewa kuti mukhale na ufulu. Koma ayi kuphatisa basa ufulu moyu ninge mwayi wakuti mumbandochita virivose vomwe thupi yanu yochimwa ilakalaka. Koma mumbabvume kuti chikondi chimbakulimbikiseni kutumikirana. 14 Ndawa mpfundo ikulu ya mu Chilamulo chose iri pa lamulo ibodzi yakuti: “Umbakonde munzako ninge momwe udzikondera wekha.” 15 Koma mukapitiriza kulumana komasoti kudyana mwekhamwekha, samalani kuti osati mudzongane.
16 M’malomwake nikunena kuti: Pitirizani kufamba motsogolerewa na mzimu ndipo mudzachitelini olo pang’ono vomwe thupi yanu yochimwa inkulakalaka. 17 Ndawa vomwe thupi ilakalaka vilimbana na mzimu ndipo mzimu nawombo ulimbana na thupi. Vinthu viwiri vimwevi vitsutsana kuti osati muchite vinthu vomwe mufuna kuchita. 18 Komasoti peno mukutsogolerewa na mzimu, ndiye kuti munkutongewalini na chilamulo.
19 Manje basa za thupi yochimwa iyi ziwonekera bwinobwino. Basa zimwezi ni chigololo,* khalidwe yomwe ipsyipiza munthu, khalidwe yopasa manyazi,* 20 kutumikira mafano, kukhulupirira mizimu,* chizondo, ndewo, ntsanje, kukalipa, kugegedzana, kugawikana, magulu ya mpatuko, 21 djerasi, kumwa mwauchidakwa, maphwando yoipa,* na vinango volingana na vimwevi. Abale, ninge momwe nidakuchenjezerani kale, ninkukuchenjezani pomwe kuti wanthu omwe achita vimwevi adzangenelini mu Ufumu wa Mulungu.
22 Koma makhalidwe yomwe wanthu akhala nayo mothandiziwa na mzimu uchena ni chikondi, chimwemwe, ntendere, kudekha, kukhala wabwino ntima, ubwino, chikhulupiriro, 23 kupfatsa na kudziletsa. Palibe lamulo yolambiza makhalidwe mwaya. 24 Komasoti wanthu omwe ni opfunzira wa Yesu Khrisitu, adakhomerera pamuti thupi yawo pabodzi na vomwe iyo ilakalaka kuti ichite.
25 Peno tinkutsogolerewa na mzimu pamoyo wathu, naboni tipitirize kuchita vinthu mobverana na mzimu muyo. 26 Ayi kuti tikhale odzikwiza, osati timbayambise mipikisano pakati pathu ndipo osati timbachitirane djerasi.