Kwa Aroma
2 Ndipomwapa peno ndiwe mbani, peno uweruza anango, ulibe chifukwa chobveka chodziwona kuti ndiwe wolungama. Pakuti ukambaweruza anango, ukhala kuti unkudzitsutsa wekha, ndawa iwembo uchita vimwevo. 2 Tikudziwa kuti Mulungu akambaweruza wanthu womwe achita vimwevi kuti ni wofunika kutambira chilango, awaweruza mobverana na chonadi.
3 Koma iwepo ukambaweruza wanthu omwe achita vinthu vomwe iwembo uchita, ko unkuganiza kuti udzathawe chiweruzo cha Mulungu? 4 Ko unkudziwalini kuti Mulungu ankukuwonesa kukoma ntima kwake kukulu, kusakalipa kankulumize komasoti kudekha na cholinga chakuti ulape? 5 Koma ndawa yakuti unkufunalini kuchinja, ndipo unkuwonesa ntima wosalapa, Mulungu adzakulange pa ntsiku ya ukali wake akambadzaulula chiweruzo chake cholungama. 6 Iye adzaweruze aliyese mobverana na vochita vake. 7 Adzapereke moyo wosapera kwa wanthu womwe ankupitiriza kuchita vabwino. Wanthu mwawa ankuyesesa kugumana ulemerero, ulemu na moyo wosadzongeka. 8 Koma wanthu omwe akonda kugegedzana, atewedzalini chonadi komasoti achita vinthu viribe chilungamo, Mulungu adzawawonese ukali wake. 9 Munthu aliyese wochita voipa, peno akhale Muyuda panango Mgiriki, adzagumane na mabvuto komasoti vowawa. 10 Koma aliyese wochita vabwino adzatambire ulemerero, ulemu na ntendere, choyamba Muyuda patsogolo pake Mgiriki. 11 Ndawa Mulungu alibe tsankho.
12 Wanthu wose womwe adachimwa osadziwa Chilamulo, adzafe ali wosadziwa Chilamulo. Koma wose womwe adachimwa akudziwa Chilamulo, adzaweruziwe mobverana na Chilamulo mwicho. 13 Pale wanthu wondobva Chilamulo, Mulungu awonalini kuti ni wolungama koma omwe atewedza Chilamulo ndiwo womwe adzawonewe kuti ni wolungama. 14 Wanthu wamakhaindi yanango alibe Chilamulo. Koma akambachita mwachibadwa vinthu vomwe viri mu Chilamulo, olo kuti alibe Chilamulo, awonesa kuti anacho muntima mwawo. 15 Amwawa awonesa kuti mpfundo za m’Chilamulo zidanembewa m’mitima mwawo ndipo chikumbuntima chawo chiwachitira umboni. Wanthu mwawa maganizo yawo yawatsutsa panango kuwadawikiza. 16 Vimwevi vidzawonekere pantsiku yomwe Mulungu, pakuphatisira basa Yesu Khrisitu, adzaweruze vinthu vachintsintsi vomwe wanthu achita komasoti kuganiza. Ndipo adzaweruze mobverana na ntontholo wabwino womwe nikulalikira.
17 Anango imwe mudzichemera kuti ndimwe Ayuda, muthemba Chilamulo komasoti mudzitama kuti muli paushamwali na Mulungu. 18 Mudziwa vomwe Mulungu afuna komasoti mukondwa na vinthu vabwino maninge ndawa yakuti mudapfunzisiwa Chilamulo. 19 Mukhulupirira kuti mungakwanise kutsogolera alombe komasoti kuvunikira wanthu womwe ali mumdima. 20 Muganiza kuti mungakwanise kutsogolera wanthu alibe nzeru. Muganiza pomwe kuti mungakwanise kupfunzisa anango ndawa mubvesa komasoti kudziwa chonadi chogumanika mu Chilamulo. 21 Ko iwepo yemwe upfunzisa anango, udzipfunzisalini wekha? Ulalikira kuti: “Ayi kuba,” ko nawembo ukuba? 22 Iwepo yemwe unena kuti: “Ayi kuchita chigololo,” ko uchitambo chigololo? Iwepo yemwe uyankhula vowonesa kuti unyantsiwa na mafano, ko ukuba pomwe va nkachisi? 23 Iwepo womekera Chilamulo, ko uchitira pomwe Mulungu choipa pakuphonyesa Chilamulo? 24 “Dzina ya Mulungu inkunyozewa pakati pa wanthu wa makhaindi yanango ndawa ya imwepo,” ninge momwe Malemba yanenera.
25 Mdulidwe ni waphindu pokhapokha peno iwepo utewedzadi Chilamulo. Koma peno utewedzalini Chilamulo, mdulidwe wako ulibe na basa. 26 Ndipomwapa peno munthu wosachitiwa mdulidwe akutewedza mpfundo zolungama za mu Chilamulo, kuleka kuchitiwa mdulidwe kwake kudzawonewe kuti ni mdulidwe, ntenolini? 27 Munthu yemwe ni wosachitiwa mdulidwe akambatewedza Chilamulo, adzakuweruze. Adzakuweruze iwepo yemwe uphonyesa Chilamulo podiya kuti uli na malamulo yonembewa komasoti ndiwe wochitiwa mdulidwe. 28 Yemwe ni Myuda kunja kokha ni Myudalini, komasoti mdulidwe wakunja kokha wochitiwa pathupi, ni mdulidwelini. 29 Kukhala Myuda chaiye kuli muntima ndipo mdulidwe wake udakhala pomwe wa muntima wochitiwa na mzimu, osati na malamulo yonembewa. Munthu wateno atamandiwa na Mulungu, osati na wanthu.