Kalata yachiwiri ya Yohani
1 Ine ninge munthu wachikulire,* ninkunembera mayi wosankhuliwa na Mulungu komasoti wana wake omwe niwakonda maninge. Ndipo ndinelini nekha yemwe niwakonda, ndawa wose omwe adziwa chonadi awakondambo. 2 Tikukondani ndawa ya chonadi chomwe chiri muntima mwathu, ndipo chidzapitirize kukhala mwa isepano mpakana kalekale. 3 Mulungu yemwe ni Ababa wathu wakudzulu, komasoti Mwana wake Yesu Khrisitu, adzatipfunzise mpfundo chaizo komasoti kutiwonesa chikondi. Adzatiwonese pomwe kukoma ntima kukulu na chifundo komasoti adzatipase ntendere.
4 Ninkukondwa maninge ndawa nagumana wana wanu anango ankufamba mu chonadi mobverana na lamulo yomwe tidatambira kwa Ababa. 5 Ndipomwapa ninkukukumbirani amayi, kuti timbakondane. (Ninkukunemberanilini lamulo inyowani, koma mwaire yomwe takhala nayo kuyambira pakuyamba.) 6 Ndipo chikondi chitanthauza kupitiriza kufamba motewedza malamulo yake. Ninge momwe mudabvera kundoyambira pakuyamba, lamulo yake ni yakuti nthawe zose mumbawonesane chikondi. 7 Koma olo nteno samalani ndawa wanthu azinji opusisa anzawo ayamba kugumanika mudziko iyi. Wanthu mwawa atsutsa vakuti Yesu adabwera ninge munthu. Yemwe achita vimwevi ni wopusisa anango, komasoti wolamba Khrisitu.
8 Samalani kuti osati mutaye vinthu vomwe tidakuthandizani kuti muvigumane na cholinga chakuti mudzatambire madaliso yose yomwe Mulungu wakukonzerani. 9 Aliyese yemwe achita vosabverana na vomwe Khrisitu ambapfunzisa, ndiye kuti ankulamba Mulungu. Koma Ababa komasoti Mwana, akondwa na munthu yemwe achita vinthu mobverana na vomwe iye angapfunzisa. 10 Munango akabwera nkumbakupfunzisani vinthu vosiyana na vimwevi, ayi kumutambira m’nyumba zanu ndipo ayi kumonisana naye. 11 Aliyese yemwe wamumonisa akhala ninge ankuchitambo basa zake zoipa zimwezo.
12 Olo kuti ninavizinji vakuti nikunembereni, nikufunalini kuvinemba pa pepa na tinta. Koma ninkudikhira kubwera kwa imwepo kuti nidzayankhule namwe maso na maso na cholinga chakuti mudzakondwe maninge.
13 Wana wa mulongosi wanu wosankhuliwa na Mulungu, akupereka moni.