Kalata yoyamba yoyenda kwa Timoteyo
6 Wanthu wose omwe ni akapolo ambawone kuti mabwana yawo ni wofunika kuwalemekeza na moyo wose, kuti dzina ya Mulungu komasoti vomwe atipfunzisa osati vinyozewe. 2 Komasoti akapolo omwe mabwana yawo ni Akhrisitu, osati ambawachitire vinthu mosowa ulemu pakuwona kuti ni abale. Koma, ambaphate basa mwakhama maninge, ndawa basa yawo mwiyo yabwino inkuthandiza Akhrisitu anzawo omwe awakonda.
Pitiriza kupfunzisa vinthu vimwevi komasoti kulimbikisa wanthu kuti ambachite vimwevi. 3 Peno munthu ankupfunzisa vinthu vabodza, ndipo ankubvumalini malangizo yabwino* yochokera kwa Ambuya wathu Yesu Khrisitu, na vinthu vomwe tipfunzira mobverana na kudzipereka kwathu kwa Mulungu, 4 munthu muyo ni wodzikwiza komasoti womeka ndipo abvesalini chirichose. Koma, akonda kugegedzana komasoti kutsutsana pa mawu. Vimwevi viyambisa ntsanje, kugegedzana, kuyankhulana mawu yopweteka na kuganizirana voipa. 5 Vichitisa pomwe kuti wanthu wosokonezeka maganizo na osadziwa chonadi, ambagegedzane pa vinthu ving’ono pakuganiza kuti kukhala wodzipereka kwa Mulungu ni njira yogumanira phindu. 6 Nishuwadi kuti kukhala wodzipereka kwa Mulungu komasoti kukhala wokhutira na vomwe tinavo, ni njira yogumanira phindu ikulu. 7 Pale tilibe kubwera na kanthu mu dziko ndipo tingachokemolini na kanthu. 8 Ndipomwapa, peno tili na chakudya, vovala na pogona, timbakhale wokhutira na vinthu vimwevi.
9 Koma wanthu ofunisisa kulemera agumana na mayesero ndipo aphatiwa munsampha. Iwo afunisisa vinthu vowadzonga komasoti achita vinthu mosowa nzeru. Vimwevi viwadzonga na kuwabweresera mabvuto. 10 Ndawa kukonda kobiri kuyambisa vopweteka vakhaindi iriyose, ndipo ndawa yotengeka na chikondi chimwechi, anango asiya chikhulupiriro ndipo adzibweresera vopweteka vizinji pathupi yawo.
11 Koma munthu wa Mulungu iwe, thawa vinthu vimwevi. Yesesa kukhala wachilungamo, wodzipereka kwa Mulungu, wachikhulupiriro, wachikondi, wopirira komasoti wopfatsa. 12 Menya nkhondo yabwino ya chikhulupiriro. Phata mwamphanvu moyo wosapera womwe adakuchemerera. Pale udalengeza mobveka bwino va moyo moyu pamaso pa mboni zizinji.
13 Pamaso pa Mulungu, yemwe athandiza kuti vinthu vose vipitirize kukhala vamoyo komasoti pamaso pa Yesu Khrisitu, yemwe adapereka umboni wabwino maninge pamaso pa Pontiyo Pilato, ninkukulamula 14 kuti umbasunge malamulo. Umbayasunge uli wochena komasoti ulibe chifukwa chokunenera voipa mpakana panthawe yomwe Ambuya wathu Yesu Khrisitu adzawonekere. 15 Iye ni wokondwa na Wamphanvu komasoti ni Mpfumu ya mafumu na Ambuya wa ambuya, ndipo adzawonekere panthawe yake. 16 Iye anamoyo wakuti ungafelini ndipo akhala pa malo yogwerewera maninge mwakuti palibe munthu angafikepo. Palibe pomwe munthu yemwe adamuwonako panango yemwe angamuwone. Iye apasiwe ulemu ndipo mphanvu zake zipitirize kukhalapo mpakana kalekale. Ame.
17 Ulangize* wanthu wachuma mudziko iyi kuti osati akhale odzikwiza, komasoti kuti osati ambathembe chuma chosathembeka, koma ambathembe Mulungu, yemwe atipasa mosaumira vinthu vose vomwe tikondwa navo. 18 Uwauze kuti ambachite vabwino, akhale olemera pa basa zabwino, opereka mosaumira komasoti okonzeka kugawira anango 19 kuti asunge bwino chuma chochokera kwa Mulungu chomwe ni fundasau yabwino ya tsogolo yawo na cholinga chakuti aphate mwamphanvu moyo chaiwo.
20 Timoteyo, usunge bwino vomwe udatambira kwa Mulungu. Umbapewe nkhani zilibe na basa zomwe ziipisa vinthu vochena. Umbapewe pomwe kutsutsana pa vinthu vomwe anango monama anena kuti ni “kudziwa vinthu.” 21 Ndawa yodziwonesera na kudziwa vinthu kumoku, anango asiya chikhulupiriro.
Kukoma ntima kukulu kukhale namwe.