Ko mungatamande tani Yahova na lilime yanu?

Pomwe Yahova adatisika iye adatipasa mphaso yabwino maninge, mphaso yakuyankhula. Ko vichamukhudza momwe isepano tichadekana kuiphatisira basa? Mosakaika! (Lewengani Yakobo 1:26.) Manje ko tingaphatise tani basa mphaso mweyi yoyankhula munjira yomwe ingalemekeze Yahova?

1. Ndawa chani tichadekana kuphatisa basa mphaso yoyankhula?

Baibolo ichatiuza kuti: ‘Pitirizani kulimbikisana.’ (1 Atesalonika 5:11) Ko imwepo munkuganizira munthu munango yemwe ankufunika chilimbikiso? Ko mungachite tani kuti mumuchitise kuti iye abveko bwino? Mutsimikizireni kuti imwepo muchamuganizira. Panango mungamufotokozere chinthu chomwe imwepo muchakomedzewa nacho kwa iye. Ko mungaganizireko lemba inango yomwe ingamulimbikise? Panavizinji vomwe imwepo mungasalule. Kumbukirani pomwe kuti, munjira yomwe muchayankhulira vingakhudze anango. Ndipomwapa nthawe iliyose yesesani kuyankhula mwachikondi na modzichepesa.—Miyambo 15:1.

2. Ko ni mawu ya khaindi yanyi yomwe tichadekana kuyapewa?

Baibolo ichati: ‘Mawu yaliyose yowola yasachoke pakamwa panu.’ (Lewengani Aefeso 4:29.) Mwevi vinkuthandauza kuti tichadekana kuyankhula vinthu vabwino, vinkuthandauza pomwe kuti tichadekanalini kuyankhula vinthu vomwe vingakhumudwise munthu munango. Tichadekana kupewa kumbalewa anango panango kuchita midjedo.—Lewengani Miyambo 16:28.

3. Ko ni chani chomwe chingatithandize kuti timbayankhule munjira yolimbikisa?

Vinthu vomwe tichayankhula ndivo vomwe vichakhala mumtima mwathu ndipo kazinjikazinji ndivo vomwe tichaganizira. (Luka 6:45) Ndipomwapa tichadekana kupfunzisa maganizo yathu kuti timbaganizire vinthu volimbikisa, vinthu volungama, vochena, vachikondi na vilivose votembejeka. (Afilipi 4:8) Kuti tiyikhire nzeru pa vinthu vimwivi tichadekana kusalula mwanzeru vinthu vosangulusa. (Miyambo 13:20) Vingakhale pomwe vothandiza kukhala na nthawe yoganiza mukanati mwayankhula. Ganizirani momwe mawu yanu yangakhudzire anzanu. Baibolo ichati: ‘Mawu yoyankhuliwa mosaganizira yali ninge chibemba chonoza, koma lilime ya wanthu wanzeru ichachilisa.’—Miyambo 12:18.

PFUNZIRANI VIZINJI

4. Samalani kayankhulidwe kanu

Nthawe zinango, tingayankhule vinthu vomwe patsogolo pake tingadzilinge navo. (Yakobo 3:2) Lewengani Agalatiya 5:22, 23, ndipo patsogolo pake kambiranani mibvunzo aya:

• Ko ni yaponi mwa makhalidwe mwaya yomwe imwepo mungapempherere kuti yakuthandizeni pa vomwe imwepo muchayankhula? Ko makhalidwe mwaya yangakuthandizeni tani imwepo?

Lewengani 1 Akorinto 15:33, ndipo patsogolo pake kambiranani mbvunzo uyu:

• Ko vomwe muchasalula pankhani ya vosangulusa na azishamwali wanu vingakhudzetani momwe imwepo muchayankhulira?

Lewengani Mlaliki 3:1, 7, ndipo patsogolo pake kambiranani mbvunzo uyu:

• Ni nthawe iponi yomwe vingakhale vanzeru kusayankhula chinthu panango kudikhirira nthawe yabwino kuti muyankhule chinthu?

5. Mbayankhulani vinthu vabwino va anango

VIDIYO: Yankhulani ‘vinthu volimbikisa’ anango (4:07)

• Mu vidiyo, ndawa chani m’bale ule angadekana kuchinja momwe angayankhulira na anango?

• Ni chani chomwe iye adachita kuti achinje?

Lewengani Mlaliki 7:16, ndipo patsogolo pake kambiranani mbvunzo uyu:

• Ko ni chani chomwe tichadekana kuganizira tikakhala kuti tilipachiyeso chakufuna kuyankhula vinthu voipa va anango?

Lewengani Mlaliki 7:21, 22, ndipo patsogolo pake kambiranani mbvunzo uyu:

• Ko mavesi mwaya yangakuthandizeni tani imwepo mukabva kuti munthu munango ankukulewani vinthu voipa?

6. Khalani wodekha mukambayankhula na wachibale wanu

VIDIYO: Chikondi na ulemu vichabveranisa banja (3:08)

• Ni chani chomwe chingakuthandizeni kuyankhula mwachikondi na mwaulemu kwa banja yanu?

Lewengani Aefeso 4:31, 32, ndipo patsogolo pake kambiranani mbvunzo uyu:

• Ko ni khaindi yanyi yakayankhulidwe komwe kangalimbise banja?

Yahova adafotokoza momwe iye angabvera na Mwana wake Yesu. Lewengani Mateyu 17:5, ndipo patsogolo pake kambiranani mbvunzo uyu:

• Ko imwepo mungatewedzere tani Yahova munjira yomwe mungayankhulire na banja yanu?

CHIGWATO

Mawu yanamphanvu. Ndipomwapa tichadekana kuganizira vomwe tichayankhula, nthawe yoyankhula, na momwe tingayankhulire.

Kubwerezera

• Ko ni njira ziponi zomwe imwepo mungaphatise basa mawu yanu kuti muthandize wanthu anango?

• Ko ni khaindi yanyi yakayankhulidwe komwe imwepo muchadekana kukapewa?

• Ko ni chani chomwe chingathandize kuti nthawe zose timbakhale wachikondi na wolimbikisa pa mawu yathu?

KUTI MUDZIWE VIZINJI

Ko ni chani chomwe chingatithandize kuti timbayankhule vinthu volimbikisa?

Khalani na lilime ya wanthu wanzeru (8:04)

Onani chomwe chingakuthandizeni imwepo kupewa kuphatisira basa mawu yoipa.

‘Ko kutemberera ni koipa?’ (Nkhani ya pa intaneti)

Onani momwe imwepo mungapewere kugwera mu msampha wamabodza.

Ko ningachitetani kuti nileke kunama? (2:36)

Onani momwe Yahova adathandizirira mwamuna munango kuti aleke kuyankhula mabodza.

‘Nidayamba kuganizira mwasiliyasi komwe moyo wangu angayenda’ (Nsanja ya Olonda ya 1 Agosto, 2013)