Ko tingakonzekere tani misonkhano?

Peno imwepo munkupfunzira Baibolo na wa Mboni za Yahova, tinashuwa kuti imwepo muchayamba mwakonzekera mukanati kupfunzira. Mungachite vibodzi-bodzi mukanati mwayenda kumisonkhano ya mpingu kuti muphindule mwakukwana. Mungaphindule mukambakhala na ndandanda yabwino.

Sankhulani nthawe na malo yopfunzirira. Ko ni nthawe yabwino iponi yamungakwanise kupfunzira? Ko ni kumachibese mukanati kuyamba kuphata basa, masikati, panango usiku wana wanu akayenda kagona? Podi mumbakwanise kupfunzira nthawe idiki-diki, tsimikizirani nthawe yamuchadikana kusunga kuti mupfunzire na kuchita khama kuti muleke kusokonezewa. Fagani malo yalibe zungo ndipo thimwisani vose vomwe vingakusokonezeni ninge radio, vidiyo na foni. Muchadikana kupemphera mukanati mwayamba kupfunzira, kuti muchepese nkhawa zanu nakuti mumbadoganizira Mawu ya Mulungu. —Afilipi 4:6, 7.

Pakukonzekera, mumbachonge vati mukadawire. Poyamba, onani mwachigwato nkhani yose. Ganizirani pfunziro panango msolo wa nkhani, wonani momwe timisolo tunkubveranirana na msolo ukulu, ndipo wonanipomwe momwe mafoto, mibvunzo yobwereza yankubveranirana na mpfundo zikulu-zikulu. Patsogolo pake, lewengani ndime iliyose ndipo gumanani m’dawiro wa mbvunzo uli mundime. Lewengani malemba yomwe yali mundime, ndipo ganizirani momwe yankubveranirana na nkhani yose. (Machitidwe 17:11) Mukagumana m’dawiro, uchongeni panango nembani mpfundo ikulu pasaidi pake kuti mukayikumbukire pamisonkhano. Misonkhano irinkati, mungakayimise djanja peno muchada, nkudawira mwachigwato mu mawu yanu-yanu.

Kupfunzira mpfundo zosiyana-siyana zomwe zikafotokozewe kumisonkhano sondo yose, kudzayingizire chidziwiso chanu ku ‘chuma’ chomwe chili m’Baibolo. —Mateyu 13:51, 52.

• Ko ni ndandanda iponi yamungakhale nayo pakukonzekera misonkhano?

• Ko mungakonzekere tani kuti mukadawire kumisonkhano?