Ko laibulale ya pa Nyumba ya Ufumu ingatithandize tani?

Ko pali nkhani yamuchada kufaga-faga kuti muyingizire chidziwiso chanu pa Baibolo? Muchada kudziwa bwino-bwino thandawuzo ya vesi, munthu, malo panango chinthumbo chinango chotomolewa m’Baibolo? Ko mudayamba mwadzibvunzako kuti peno Baibolo ingakwanise kukudawirani mibvunzo yanu? Peno nteno, yesani kuphatisira basa laibulale ya pa Nyumba ya Ufumu.

Inamabukhu yazinji yofagira nkhani. N’vodziwikiratu kuti pa mabukhu yose ya Mboni za Yahova, imwepo yanango mulibe mu chiseweredwe chanu. Koma ku laibulale ya pa Nyumba ya Ufumu, kuchagumanika mabukhu yazinji. Panango kuli soti Mabaibolo yosiyana-siyana, dicionário yabwino na mabukhu yanango yofagira nkhani. Khalani womasuka kuphatisa basa laibulale mweyi misonkhano ikanati kuyamba na pomwe yapera. Panango kungakhale soti kompiyuta yomwe ina Watchtower Library nkati. Pologalama mweyi inamabukhu ya gulu yathu ya khaindi na khaindi ndipo ni njira yosashupa kuphatisa basa pofaga-faga nkhani, mawu panango vesi ya m’Baibolo.

Ni yophindulisa kwa omwe adanembesa mu nsonkhano wa Utumiki na moyo wathu wachikhrisitu. Laibulale ya pa Nyumba ya Ufumu ingakuthandizeni kukonzekera mbali zamwapasiwa. Wonyang’anira Nsonkhano wa Utumiki ndiye anawudindo wonyang’anira laibulale mweyi. Iye achawonesesa kuti mabukhu yanyowani yaikhiwa mu laibulale ndipo ni yolongedza bwino. Imwepo mungamukumbire m’bale moyu, panango munthu yemwe ankukupfunzisani Baibolo kuti akuwoneseni momwe mungagumanire nkhani yamuchada. Koma mungabvumiziwelini kuti mutengeretu bukhu ya mu laibulale. Tichadekana kuyasamala bwino mabukhu mwaya ndipo ayi kumbayachonga mukambalewenga.

Baibolo ichati, kuti tigumane ‘nzeru ya Mulungu,’ timbafage ninge kuti tinkufaga ‘chuma chobisika.’ (Miyambo 2:1-5) Yesesani kuphindula na laibulale ya ku Nyumba ya Ufumu pakufaga-faga nkhani.

• Ko ni vipangizo viponi vofagira vomwe vichagumanika ku laibulale ya ku Nyumba ya Ufumu?

• Ko ni mbani angakuthandizeni kuphatisa bwino basa laibulale?