Dipo Ya Yesu Ni Mphaso Yapadera Yomwe Mulungu Adatipasa

1, 2. (a) Ko imwepo muchawona kuti mphaso ni yakudikana ikakhala yotani? (b) Ndawa chani tinganene kuti dipo ya Yesu ni mphaso yakudikana kuposha zose?

PA MPHASO zose, ko ni mphaso iponi yomwe mudaiwona kuti ni yapadera maninge? Kuti mphaso ikhale yakudikana viliralini kuti ikhale yodula. Koma mphaso ikakufikani panthawe yake, mungakondwe ndipo mungatembeje maninge.

² Pa mphaso zizinji zomwe Mulungu watipasa, panamphaso ibodzi yomwe ni yakudikana kuposha zose. Mu msolo uno tipfunzire kuti Yahova adatumiza mwana wake Yesu Khrisitu padziko yapasi kudzapereka moyo wake ninga dipo. (Lewengani Mateyu 20:28.) Iye adachita mwevi kuti tidzagumane moyo wosapera. Vomwe Yahova adachita ni umboni wakuti achatikonda maninge.

KO DIPO NI CHANI?

3. Ndawa chani wanthu achafa?

³ Dipo ya Yesu ni njira yomwe Yahova adaphatisira basa kuti apulumuse wanthu ku uchimo na impfa. (Aefeso 1:7) Kuti tibvesese ndawa yake pangadikana dipo, tichadekana kudziwa vomwe vidachitika kale-kale m’munda wa Edeni. Abereki wathu woyambirira Adamu na Hava, adachimwa ndipo vimwevi vidachitisa kuti patsogolo pake afe. Isepano tichafa ndawa tidatengera uchimo wawo.​—Wonani mawu yakumapeto 9.

4. Ko Adamu wenze mbani ndipo wenze munthu wotani?

⁴ Adamu wenze munthu woyambirira kusikiwa. Iye wenze wangwiro ndipo mwevi vikuthandawuza kuti adakadwalalini, kukalamba na kufa. Yahova wenze ninga Baba wake ndawa ndiye adamulenga ndipo angayankhula naye pafupi-pafupi. (Luka 3:38) Mulungu adamuwuza Adamu vinthu vomwe angadikana kuchita ndipo adamupasa soti basa yabwino yoti ambaphate.​—Genesis 1:28-30; 2:16, 17.

5. Ko Baibolo ichathandawuza chani ikambati Adamu adasikiwa ‘mu chifaniziro cha Mulungu’?

⁵ Adamu adasikiwa ‘mu chifaniziro cha Mulungu.’ (Genesis 1:27) Vimwevi vinkuthandawuza kuti Yahova adamusika Adamu na makhalidwe yakulingana na yake ninge chikondi, nzeru, chilungamo na mphanvu. Adamupasa soti ufulu wosalula vochita. Adamu alibe kusikiwa ninge chidoli chomwe chichakumbukalini. Iye wenze na ufulu wosalula kuchita vinthu vabwino panango voyipa. Adakabvera Mulungu, adakakhala na moyo wosapera mu paradaiso.

6. (a) Ko kusabvera Mulungu kudachitisa kuti Adamu aluze chani? (b) Ko uchimo wake watiyambukira tani isepano?

⁶ Pomwe Adamu adasalula kusabvera Mulungu, adaweruziwa kuti achadikana kufa. Kusabvera kwake kudamuchitisa kuti ataye wushamwali na Yahova, ndiposoti kuti aleke kukhala na moyo wangwiro. Kudamuchitisa soti kuti athamangisiwe mu paradaiso momwe angakhala. (Genesis 3:17-19) Ndawa ya kusabvera kwa Adamu, ‘uchimo udangena m’dziko kuchokera kwa munthu m’bodzi, ndipo impfa kuchokera ku uchimo, ndipo impfa n’kudzala padziko yose ndawa wose adachimwa.’ (Aroma 5:12) Padandoti Adamu wachimwa, ‘adadzigulisa’ pabodzi na wana wake ku ukapolo wa uchimo na impfa. (Aroma 7:14) Koma, ko vingakwanisike kuti tipulumusiwe ku ukapolo moyu? Inde nivokwanisika.

7, 8. Ko mawu yakuti dipo yachathandawuza chani?

⁷ Ko dipo n’chani? Mawu yakuti dipo yachathandawuza vinthu viwiri: Chakuyamba, ni mali panango vinthu vomwe vingaperekewe pakuda kuti munthu yemwe wamangiwa awombolewe. Chachiwiri, ni mali yomwe achapereka pakulipira vinthu vadzongeka.

⁸ Palibe munthu yemwe adakakwanisa kupagali vinthu vomwe Adamu adadzonga pomwe iye adachimwa. Koma Yahova adakonza njira yotipulumusira ku uchimo na impfa. Naboni tikambirane momwe Yahova adaperekera dipo mweyi na momwe ichatithandizira.

MOMWE YAHOVA ADAPEREKERA DIPO

9. Ko pangadikana chani kuti dipo iperekewe?

⁹ Pa wanthu tose, palibe olo m’bodzi yemwe adakakwanisa kulipira dipo. Ndawa chani? Ndawa tose ndise wochimwa. (Salimo 49:7, 8) Pakuti Adamu adataya moyo wangwiro, pangadikana soti moyo unango wangwiro kuti ukhale ‘dipo yakukwana ndendende.’​—1 Timoteyo 2:6.

10. Ko Yahova adapereka tani dipo?

¹⁰ Ko Yahova adapereka tani dipo? Yahova adatumiza Yesu padziko yapasi yemwe ni Mwana wake wapadera. Mulungu akanati kulenga vinthu vose, adayamba walenga Yesu. (1 Yohane 4:9, 10) Yesu adabvuma kusiyana na Ababa wake nkubwera padziko yapasi. (Afilipi 2:7) Yahova adachosa moyo wa Yesu kudzulu nkuwubweresa padziko yapasi kuti adzabadwe wangwiro alibe uchimo.​—Luka 1:35.

11. Ko vidakakwanisika tani kuti munthu m’bodzi apereke dipo kwa wanthu wose?

¹¹ Pomwe Adamu adachimwa, adachitisa kuti wanthu wose akhale wochimwa. Tsono vidakakwanisika kuti munthu m’bodzi apulumuse wanthu wose ku uchimo na impfa? Inde. (Lewengani Aroma 5:19.) Yesu yemwe wenzebe uchimo adapereka moyo wake kuti ukhale dipo. (1 Akorinto 15:45) Moyo wangwiro ndiwo udakathandiza kuti wana wose wa Adamu amasuliwe ku uchimo na impfa.​—1 Akorinto 15:21, 22.

12. Ndawa chani Yesu angadikana kudzudzika?

¹² Baibolo ichafotokoza momwe Yesu adabonerera akanati kuphewa. Iye adashapuliwa mwankhanza ndipo adamukhomerera pamuti wangadzudzirapo wanthu nkumusiya afe. (Yohane 19:1, 16-18, 30) Ndawa chani Yesu angadikana kudzudzika tenewuyu? Ndawa Satana adalewa kuti munthu akagumana na mabvuto, angakhalelini wokhulupirika kwa Mulungu. Yesu adawonesa kuti munthu wangwiro angakwanise kukhala wokhulupirika kwa Mulungu olo agumane na mabvuto. Ndoganizani momwe Yahova adabvera pakuwona kukhulupirika kwa Yesu!​—Miyambo 27:11; wonani mawu ya kumapeto 15.

13. Ko nchani chingafunika soti kuti dipo iperekewe?

¹³ Ko nchani chingafunika soti kuti dipo iperekewe? Mu gole ya 33 C.E. pa ntsiku ya 14 m’mwezi wa Nisani, Yahova adabvuma kuti Yesu aphewe na adani wake. (Aheberi 10:10) Pazidapita ntsiku zitatu, Yahova adam’musa na thupi yauzimu ninga mwewenzere kudzulu akanati kubwera padziko yapasi. Koma kuti amalizise kulipira dipo, Yesu angadikana kubwerera soti kudzulu. Padafika kudzulu, Mulungu adadawikiza vose vadachita pewenze padziko yapasi pakupereka moyo wake ninga dipo. (Aheberi 9:24) Yesu padalipira moyo wangwiro wadaluza Adamu, adatidamasula ku uchimo na impfa.​—Lewengani Aroma 3:23, 24.

MOMWE MUNGAPHINDULIRE NA DIPO YA YESU

14, 15. Ko tichadekana kuchita chani kuti Mulungu atikhululukire machimo yathu?

¹⁴ Mphaso yapadera mweyi idayambakale kutithandiza. Naboni tiwone momwe ingatithandizire manjewuno na madaliso yomwe tidzagumane kutsogolo.

¹⁵ Mulungu achatikhululukira machimo yathu. Nthawe zizinji vichatishupa kuchita vabwino. Nthawe zinango tichayankhula panango kuchita vinthu vophonyeka. (Akolose 1:13, 14) Ko tingachite tani kuti Mulungu ambatikhululukire? Tichadekana kudziwa kuti taphonyadi nkukumbira Yahova kuti atikhululukire.​—1 Yohane 1:8, 9.

16. Ko tichadekana kuchita chani peno tinkudziyimba mulandu pa vomwe taphonyesa?

¹⁶ Tichakhaliralini kudziyimba mulandu pa vataphonya. Tikaphonya, tingakhalelini wokondwa ndipo tingambadziwone kuti ndise wosafunika. Koma tichadekanalini kutaya mtima vimwevi vikachitika. Tikapemphera, Yahova angabve nkutikhululukira ndawa ya ntsembe ya dipo ya Yesu. (Aheberi 9:13, 14) Yahova achada kuti timbamuwuze vataphonyesa na mabvuto yathu. (Aheberi 4:14-16) Kuchita vimwevi kungatithandize kukhala naye pa ushamwali wolimba

17. Ko pomwe Yesu adatifera, adachitisa kuti tidzatambire madaliso yaponi?

¹⁷ Tichakhala na chidikhiro cha moyo wosapera. Baibolo ichati: ‘Malipiro ya uchimo ni impfa, koma mphaso yomwe Mulungu adatipasa ni moyo wosapera kudzera mwa Yesu Khrisitu ambuya wathu.’ (Aroma 6:23) Ndawa yakuti Yesu adatifera, isepano tidzakhale mpakana kale-kale tichimbadzakondwa na moyo wangwiro. (Chivumbulutso 21:3, 4) Tsono tingatani kuti tidzagumane madaliso mwaya?

MOMWE MUNGAWONESERE KUTEMBEJA MPHASO YA DIPO

18. Ko tinkudziwa tani kuti Yahova achatikonda maninge?

¹⁸ Ganizirani momwe muchabvera muyanu akakupasani mphaso. Palibe mphaso yakudikana maninge kuposha dipo, ndipomwapa tichadekana kumutembeja maninge Yahova yemwe ndiye adatipasa. Lemba ya Yohane 3:16 ichati: ‘Mulungu adakonda maninge dziko, ndipo adapereka mwana wake wobadwa yekha.’ Chikondi cha Yahova ndicho chidamuchitisa kuti apereke Yesu yemwe ni Mwana wake wapadera. Nayembo Yesu achatikonda ndawa adabvuma kubwera kudzatifera. (Yohane 15:13) Mphaso ya dipo ichadikana kukutsimikizirani kuti Yahova na Yesu achakukondani maninge.​—Agalatiya 2:20.

19, 20. (a) Ko mungachite tani kuti mukhale shamwali wa Mulungu? (b) Ko mungawonese tani kuti muchakhulupiriradi ntsembe ya dipo ya Yesu?

¹⁹ Pakuti mwadziwa kuti Yahova achakukondani maninge, ko mungachite tani kuti mukhale shamwali wake? Ni voshupa kukonda munthu yemwe muchamudziwalini. Lemba ya Yohane 17:3 ichanena kuti vingakwanisike kumudziwa Yahova. Mukambapfunzira va Yahova m’Baibolo, chikondi chanu pa iye chidzakule, mudzamufenderere ndipo mudzakhale naye pa ushamwali. Pitirizani kupfunzira Baibolo kuti mudziwe vizinji va Yahova.​—1 Yohane 5:3.

²⁰ Mumbakhulupirire ntsembe ya dipo ya Yesu. Baibolo ichati ‘aliyese wokhulupirira Mwana adzagumane moyo wosapera.’ (Yohane 3:36) Ko kukhala na chikhulupiriro kuchathandawuza chani? Kuchathandawuza kuchita vomwe Yesu angapfunzisa. (Yohane 13:15) Kundonena kuti tichakhulupirira Yesu nkosakwanira. Tichadekana kuchita vinthu vowonesa kuti tichakhulupiriradi dipo ya Yesu. Lemba ya Yakobo 2:26 ichati: ‘Chikhulupiriro chilibe basa zake ni chakufa.’

21, 22. (a) Ndawa chani gole iliyose tichadekana kugumanika pansinda wokumbukira impfa ya Yesu? (b) Ko tidzapfunzire chani mu msolo 6 na 7?

²¹ Mumbagumanike pansinda wokumbukira impfa ya Yesu. Yesu adawuza ateweri wake kuti ambachite nsinda wokumbukira impfa yake. Gole iliyose tichachita nsinda moyu wochemerewa kuti chikumbuso panango ‘chakudya chamawulo cha Ambuya.’ (1 Akorinto 11:20; Mateyu 26:26-28) Yesu achada kuti timbakumbukire kuti iye adatifera. Iye adanena kuti: ‘Mumbachite vimwevi pakunikumbukira.’ (Lewengani Luka 22:19.) Mukambagumanika pansida wokumbukira impfa ya Yesu, ndiye kuti munkutembeja chikondi chomwe Yahova na Yesu adatiwonesa.​—Wonani mawu yakumapeto 16.

²² Dipo ni mphaso yapadera maninge kuposha mphaso iliyose. (2 Akorinto 9:14, 15) Wanthu azinji womwe adafa adzaphindule soti na mphaso mweyi. Mu msolo 6 na 7 tidzapfunzire momwe vimwevi vidzakwanisikire.