Yakobo na Esau adakhazikisa ntendere

Yahova adapolomisa Yakobo kuti adzamuteteze ninge momwe adatetezera Abulahamu na Isaki. Yakobo ambakhala ku Harana ndipo wenze na banja ikulu komasoti chuma chizinji.

Manje Yahova adauza Yakobo kuti: ‘Bwerera ku dziko yakwanu.’ Pamwapo Yakobo na banja yake adafamba ulendo utali wobwerera kwawo. Ali mu njira wanthu anango adamuuza kuti: ‘Esau ankubwera ndipo ana masocha 400.’ Yakobo adanganizira kuti m’bale wake moyu ankubwera kudzapha iye pabodzi na banja yake. Patsogolo pake, adapemphera kwa Yahova kuti: ‘Pulizi, nithandizeni kuti m’bale wangu aleke kunipha.’ Mangwana yake Yakobo adatumizira Esau mphaso zizinji ninge mbuzi, nkhosa, ng’ombe, ngamila na abulu.

Manje usiku wa ntsiku mwiyo, Yakobo pomwe wenze yenkhayenkha adaona mngelo. Nthawe mwiyo adayamba kulimbana naye ndipo alibe kusiyana naye mpakana kudayamba kuchena. Podiya kuti Yakobo adaphwetekeka, alibe kumusiya mngelo muyo. Patsogolo pake, mngelo muyo adalewa kuti: ‘Iwe nisiye nimbayende.’ Koma Yakobo adamudawira kuti: ‘Nikusiyelini mpakana unidalise.’

Patsogolo pake mngelo ule adadalisa Yakobo. Pamwapa Yakobo adadzithemba ndipo adadziwa kuti Yahova abvumelini kuti Esau amuphe.

Manje Yakobo adaona Esau ankubwera chapatali pabodzi na masocha 400. Yakobo adayenda patsogolo ndipo akanati wagumana na m’bale wake muyo, adamugwadira maulendo 7. Esau adathamanga nkukamukumbatira pamwapo wose adayamba kulira ndipo adabverana pomwe. Ko unkuganiza kuti Yahova adabva tani na vomwe Yakobo adachita pakufuna kuti abverane pomwe na m’bale wake?

Patsogolo pake, Yakobo adabwerera kwawo ndipo Esau adapitiriza ulendo wake. Yakobo wenze na wana amuna 12 madzina yawo enze Rubeni, Simiyoni, Levi, Yuda, Dani, Nafitali, Gadi, Aseli, Isakala, Zebuloni, Yosefe, na Benjamini. Yahova adaphatisira basa Yosefe pakufuna kupulumusa wanthu wake. Ko unkudziwa vomwe vidachitika? Tikambirane vimwevi mu msolo unkubwera.