Chitenti chotumikiriramo

Mose pomwe wenze mu phiri ya Sinai, Yahova adamuuza kuti akonze malo yotumikiriramo yapadera yomwe yambachemerewa kuti chitenti. Chomwe Aizirayeli ambakatumikiriremo komasoti chomwe iwo adakakwanisa kuchitakula nkumbafamba nacho.

Yahova adauza Mose kuti: ‘Uza wanthu kuti akupase vinthu vomwe ungaphatisire basa pakukonza chitenti mwechi.’ Aizirayeli adapereka golide, siliva, minyala, komasoti vodzikhuzisira. Adaperekasoti ukuse wa nkhosa, nguwo, vikumba va nyama komasoti vinthu vinango. Wanthu mwawa adapereka vinthu vizinji mwakuti Mose adawauza kuti: ‘Basi vakwana, ayi kubweresa pomwe vinango.’

Mose adaphatisa basa vinthu mwevi pakukonza chitenti. Aizirayeli ambatumikira Mulungu mu chitenti mwechi, komasoti adachikonza mu njira yakuti ambakwanise kuchitakula akambafamba. Amuna na akazi azinji wabuya, adaphata nawo basa pakukonza chitenti mwechi. Yahova adawapasa nzeru kuti akakwanise kuphata basa mweyi. Anango ambakonza nguwo komasoti kuzikhuzisa. Penze pomwe anango omwe ambaphatisira basa vinthu ninge minyala, golide panango miti.

Wanthu mwawo adakonza chitenti ninge momwe Yahova adawauzira. Adakonza nguwo yokhuza yomwe imbagawanisa Malo Yochena na Malo Yochena Maninge. M’malo Yochena Maninge mwenze bokosi yomwe imbachemerewa kuti likasa yapangano. Bokosi mweyi idakonzewa na golide komasoti matabwa ya muti wa nthethe. M’malo Yochena mwenze choikhapo kandyelo cha golide, meza na malo yakulu yoperekera ntsembe. Ndipo panja pa chitenti mwechi, penze basiya na malo yanango yoperekera tsembe yoshoka. Likasa ya pangano, imbawakumbusa Aizirayeli va polomisi yawo yobvera Yahova. Ko unkudziwa kuti pololomisi ni chani? Ni polomisi yapadera yomwe wanthu apolomisana.

Yahova adasankhula Aroni na wana wake, kuti ambaphate basa mu Chitenti mwechi nkumbapereka ntsembe. Aroni yekha ni yemwe wenze nkulu wa atsembe ndipo ndiye yekha yemwe ambabvumiwa kungena M’malo Yochena Maninge. Iye ambachita vimwevi kabodzi pagole kukapereka ntsembe ya machimo yake, yabanja yake komasoti ya Aizirayeli.

Aizirayeli adamaliza kukonza chitenti mwechi payidandopita gole ibodzi, kundochokera pomwe adabula ku Iguputo. Apa enze na malo yotumikiramo Yahova.

Ulemerero wa Yahova udadzadza mu chitenti mumo ndipo ntambo umbakhala padzulu pake. Ntambo moyu ukakhala padzulu pa chitenti, Aizirayeli ambakhala pamwapo. Koma ukachoka, ambadziwa kuti afunika kufuluka. Patsogolo pake, ambachiphwasula chitenti chile nkumbatewera ntambo ule ndipo ambakachimanga pamalo yomwe ntambo ule waima.