Ntsogoleri wamanjemanje na azikazi awiri wolimba ntima

Padatsogolera wanthu kwa magole yazinji, Yoswa adamwalira anamagole 110. Panthawe yomwe iye wenze na moyo Aizirayeli ambatumikira Yahova, koma pomwe adamwalira iwo adayamba kutumikira mafano, ninge momwe wanthu wa ku Kanani ambachitira. Ndawa ya vimwevi, Yahova adabvuma kuti mpfumu inango yaku Kanani dzina yake Yabini imbawachitire vinthu viribe chilungamo. Wanthu mwawo adakumbira Yahova kuti awathandize. Patsogolo pake, Yahova adawapasa ntsogoleri munango dzina yake Baraki, iye adathandiza Aizirayeli kuti ayambe pomwe kutumikira Yahova.

Pamwapo mneneri munango nkazi dzina yake Debora, adatumizira Baraki ntontholo wochokera kwa Yahova. Ntontholo muyo wenze wakuti: ‘Tenga amuna 10,000 ndipo uyende ukagumane na masocha ya Yabini kukamadzi ka Kisoni, kumuko ukagonjese Sisera nkulu wa masocha ya Yabini.’ Baraki adauza Debora kuti: ‘Niyende, peno iwepo uyende nane.’ Iye adalewa kuti: ‘Niyende nawe, koma dziwa kuti ndiwepolini yemwe ukaphe Sisera, Yahova walewa kuti yemwe akamuphe ni nkazi.’

Debora adayenda na Baraki komasoti masocha ya Baraki ku phiri ya Tabori nkukakonzekera nkhondo. Sisera padabva vimwevi, adasonkhanisa ngolo zake na masocha yake. Debora adauza Baraki kuti: ‘Lero Yahova akuthandize kuti uwine nkhondo mweyi.’ Baraki namasocha yake 10,000 adabuluka m’phiri mule nkuyenda kukagumana na Sisera na masocha yake ya mphanvu.

Manje Yahova adachitisa kuti kamadzi ka Kisoni kadzale. Pamwapo ngolo za Sisera zidangena m’matope. Sisera padaona kuti vashupa adandobuluka n’ngolo mule nkuyamba kuthawa. Baraki na masocha yake adagonjesa azondi mwawo, koma Sisera adathawa ndipo adabishala mu tenti ya nkazi munango dzina yake Yaeli. Nkazi moyu adamupasa nkaka kuti amwe komasoti adamufunika bulangeti. Padagona tulo, Yaeli adafamba mwakachetechete nkukamukhomerera mu msolo na chimuti chomwe ambakhomera tenti ndipo Sisera adafera pamwapo.

Baraki padafika, adayamba kunyang’ananyang’ana Sisera. Yaeli adabula mu tenti yake nkumuuza kuti: ‘Ngenani muno nikuoneseni munthu yemwe munkumufagafaga.’ Baraki padangena, adaona Sisera ali gone wakufa. Baraki na Debora adaimba nyimbo yotamanda Yahova ndawa yothandiza Aizirayeli kugonjesa azondi wawo. Ndipo kwa magole 40, Aizirayeli adakhala pomwe pa ntendere.