Gidiyoni adagonjesa Amidiyani

Paidapita nthawe, Aizirayeli adaleka pomwe kutumikira Yahova ndipo adayamba kutumikira milungu yabodza. Kwa magole 7, Amidiyani ambaba vipfuwo va Aizirayeli komasoti ambadzonga mbewu zawo. Pakuthawa Amidiyani, Aizirayeli ambabishala mvimphako komasoti m’mapiri. Patsogolo pake adakumbira Yahova kuti awapulumuse. Manje Yahova adatumiza mngelo kuti ayende kwa Gidiyoni. Mngelo muyo adauza Gidiyoni kuti: ‘Yahova wakusankhula kuti ukhale nsocha olimba ntima komasoti wamphanvu.’ Gidiyoni adabvunza kuti: ‘Ko munthu alibe na basa ninge inepano ningapulumuse tani Aizirayeli?’

Koma ko Gidiyoni adatsimikizira tani kuti Yahova wamusankhuladi? Iye adaikha ukuse pasi nkumuuza Yahova kuti: ‘Peno mangwana ukuse moyu ungatote na mame koma pasi nkukhala pouma nidzadziwe kuti mwanisankhuladi kuti nipulumuse Aizirayeli.’ Mangwana yake adagumana kuti ukuse ule wenze wotota koma pasi penze pouma. Koma Gidiyoni adakumbira pomwe kuti mangwana agumane ukuse ule uli wouma, koma pasi pakhale potota vimwevi vidachitikadi. Gidiyoni adatsimikizira kuti Yahova wamusakhuladi. Manje adasonkhanisa masocha yake kuti akamenyane na Amidiyani.

Yahova adauza Gidiyoni kuti: ‘Nithandize Aizirayeli kuti awine nkhondo mweyi koma ndawa yakuti una masocha yazinji, ungaganize kuti mwawina na mphanvu zanu. Uza aliyese yemwe ankuchita mantha kuti abwerere.’ Pamwapo masocha 22,000 yadabwereradi nkusala masocha 10,000. Yahova adalewa kuti: ‘Masocha mwaya ni yazinji basi, yenda nawo kukamadzi ndipo ukawauze kuti akamwe madzi. Manje ukasankhule omwe ambakamwe madzi uku ankunyang’ana azondi wawo.’ Masocha 300 yokha ni yomwe yenze tcheru pomwe ambamwa madzi. Yahova adapolomisa kuti masocha yang’onong’ono mwaya yadzagonjese masocha ya Amidiyani yokwana 135,000.

Usiku, Yahova adauza Gidiyoni kuti: ‘Manje Yendani mukamenyane na Amidiyani.’ Gidiyoni adapasa masocha yake malupenga ya nyanga na mitsuko yakuluyakulu ndipo m’mitsuko mumo enze adaikhamo ntsakali za moto. Iye adawauza kuti: ‘Munyang’anisise vomwe ninkuchita ndipo imwepo muchitembo vimwevo.’ Gidiyoni adaliza lupenga yake nkuphwanya ntsuko ule ndipo adatakula ntsakali yake m’dzulu nkukuwa kuti: ‘Nkhondo ya Yahova na ya Gidiyoni!’ Masocha 300 yale yadachitambo chibodzibodzi. Amidiyani padabva vimwevi adachita mantha ndipo adayamba kuthawa. Ndawa yosokonezeka maganizo iwo adayamba kuphana wokhawokha. Pamwapa Yahova adathandiza Aizirayeli kugonjesa azondi wawo.