Yahova adapasa mphanvu Samisoni

Panthawe inango, Aizirayeli adayamba pomwe kutumikira mafano ndipo Yahova adabvuma kuti Afilisiti ambawalamulire mwankhanza. Koma penze Aizirayeli anango omwe ambakonda Yahova. Chitsanzo pa nkhani mweyi ni munthu munango dzina yake Manowa. Koma iye na nkazi wake enze alibe mwana. Manje ntsiku inango Yahova adatuma mngelo kuti ayende kwa nkazi wa Manowa. Mngelo muyo adauza nkazi muyo kuti: ‘Udzakhale na mwana mwamuna yemwe adzapulumuse Aizirayeli kwa Afilisiti, koma mwana muyo adzakhale mnaziri.’ Ko iwepo uwadziwa Anaziri? Anaziri enze atumiki wapadera wa Yahova ndipo ambabvumiziwalini kugera tsitsi yawo.

Kuyenda kwa nthawe, nkazi wa Manowa adakhaladi na mwana ndipo adamupasa dzina yakuti Samisoni. Mwana muyo padakula, Yahova adamupasa mphanvu zizinji. Iye adapha mphondolo alibe chibemba chirichose, ntsiku inango ali yenkha adapha Afilisiti 30. Afilisiti ambazondana maninge na Samisoni ndipo ambafagafaga njira yakuti amuphe. Ntsiku inango iye aligone ku Gaza, Afilisiti adayenda pa msuwo wa nthaundi mweyo kukamudikhirira kuti amuphe kukachena. Koma Samisoni adamuka pakati pa usiku nkuzula msuwo muyo ndipo adamutakula nkukamutaya pa phiri inango yapafupi naku Heburoni!

Patsogolo pake, Afilisiti adayenda kwa nkazi yemwe ambafuna kulowodwa na Samisoni dzina yake Delila. Iwo adamuuza kuti: ‘Iwepo ko chitsitsi cha mphanvu za Samisoni chili paponi? Ukatiuza tikupase kobiri zizinji, tinkufuna timuphate nkumufungira mu djeri.’ Delila wenze wokonda kobiri ndipo adawauza kuti afagefage. Pakuyamba Samisoni ambalamba kufotokozera Delila chintsintsi mwecho. Koma iye adangingimira maninge mwakuti Samisoni adafika pakuneta navo ndipo adamuululira. Iye adalewa kuti: ‘Inepano ndine Mnaziri, nikanati nagerako tsitsi yangu. Nichiti nayesa kugera tsitsi yangu mphanvu zangu zose zingamalire pamwapo.’ Samisoni adakadziwa adakamuululirarini vimwevo.

Nthawe mwiyo Delila adauza Afilisiti kuti: ‘Waniuza chintsintsi chake chose.’ Patsogolo pake adamugonesa Samisoni paminyendo pake. nkuchemera munthu kuti abwere kudzamugera. Padamugera tsitsi yake, Delila ule adakuwa kuti: ‘Samisoni! Afilisiti abwera.’ Samisoni adamuka koma wenze alibiretu mphanvu, Afilisiti wale adabwera nkumuphata nkumuchosa maso ndipo adamufungira mu djeri.

Ntsiku inango, adasonkhana mu kachisi yemwe ambatumikiramo mulungu wawo dzina yake Dagoni. Iwo ambakuwa kuti: ‘Mulungu wanthu watipasa Samisoni mubuliseni tisenzeke naye.’ Manje wanthu mwawo adamuikha pakati pa vipilala viwiri nkumbamuseka. Koma Samisoni adakuwa kuti: ‘Yahova pulizi nipaseni mphanvu kabodzi kokha aka.’ Pa nthawe mweyo ntsintsi yake imbamelako pang’ono, iye adagwinya vipilala vile na mphanvu zake zose. Chinyumba chose chimwecho chidangwa ndipo chidapha wanthu wose, nayembo Samisoni adafera pamwapo.