Yehoyada wenze wolimba ntima

Yezebeli wenze na mwana nkazi dzina yake Ataliya. Mwana moyu wenze woipa ninge amayi wake. Ataliya adalowodwa na Mpfumu ya Yuda, mwamuna wake padamwalira mwana wake mwamuna adakhala mpfumu. Ndipo patsogolo pake mwana wake ule adamwalira pomwe ndipo Ataliya adayamba kutonga. Iye adayesesa kupha wanthu ose waku banja ya mpfumu womwe adakadzangena ufumu. Ataliya adapha olo azukulu wake ndipo wanthu ose ambamugopa maninge.

Nkulu wa antsembe Yehoyada na nkazi wake Yehoseba, adadziwa kuti vomwe Ataliya ambachita ivi venze voipa. Ndipomwapa adatenga Yehoasi yemwe wenze nzukulu wake wa Ataliya nkukamubisa nkachisi. Adachita vimwevi podiya ambadziwa kuti Ataliya akazindikira awaphe.

Yehoasi padakwanisa magole 7, Yehoyada adachemeresa atsogoleri wamagulu yamasocha na Alevi nkuwauza kuti: ‘Muime pamsuwo wa kachisi ndipo muwonesese kuti aliyese ayi kuti angene muno.’ Pamwapo Yehoyada adamuikha Yehoasi kukhala mpfumu ya Ayuda nkumuvazika chisoti chachifumu. Patsogolo pake Ayuda adakuwa kuti: ‘Ikhale na moyo utali mpfumu!’

Mpfumukazi Ataliya padabva zungo ya wanthu, adathamangira kukachisi muko. Padaona mpfumu yamanjemanje iyo, iye adakuwa kuti: ‘Mwanikonzera chizondo! Mwanikonzera chizondo!’ Patsogolo pake, atsogoleri wamasocha wale adamuphata nkumubulisa panja ndipo adamupha. Koma Ataliya wenze adasokoneza Ayuda azinji.

Yehoyada adathandiza Ayuda kuti achite pangano na Yahova ndipo adapolomisa kuti ambatumikire iye yekha basi. Adawauza kuti agwese mafano yose ya Baala nkupeyapeya mafano yose. Kuingizira pamwapa, adasankhula pomwe wantsembe na Alevi wakuti ambatumikire pakachisi kuti wanthu ayambire pomwe kutumikira Yahova. Komasoti adaikha magwarda yakuti yambakhale pa msuwo na cholinga chakuti yambawonesese kuti aliyese wopswipiziwa ayi kuti angene. Manje Yehoyada na magulu ya masocha yale, adatenga Yehoasi nkuyenda naye kunyumba yachifumu ndipo adamukhazika pampando. Ayuda adakondwa maninge. Pamwapa manje iwo adakwanisa kutumikira Yahova bwinobwino wosachita mantha na Ataliya panango kusokonezewa na wanthu omwe ambatumikira Baala. Ko kulimba ntima kwa Yehoyada kudathandiza wanthu azinji?