Yahova adamukomera ntima Yona

Wanthu wa mu thaundi ya Nineve, ambachita vinthu voipa. Patsogolo pake Yahova adauza mneneri wake Yona kuti akawachenjeze kuti asiye kuchita vinthu voipa. Koma Yona adathawa ndipo adapakira barko yoyenda ku Tarisi.

Ali paulendo moyu, panyanja padayamba chonzi champhanvu mwakuti wofambisa barko adachita mantha maninge. Iwo adapemphera kwa milungu yawo nkumbabvunza kuti: ‘Ko mwevi vinkuchitika ndawa chani?’ Patsogolo pake Yona adawauza kuti: ‘Wanthu imwe, wophonya ndinepano. Yahova waniuza kuti nichite vinango. Manje inepano ninkuthawa. Munithuse munyanja momu, ndipo chonzi ichi chilekedze.’ Wofambisa barko ule ambafunalini kuthusira m’madzi Yona. Koma Yona adalimbikira kuti amuthuse. Patsogolo pake adamuthusadi ndipo chonzi chile chidalekedza.

Yona ambandoganiza kuti afe basi. Pomwe ambamila adayamba kupemphera kwa Yahova. Patsogolo pake, Yahova adatumiza chintsomba chomwe chidamumeza. Koma iye alibe kufa. Ali m’mimba mwa chintsomba mwicho adapemphera pomwe kuti: ‘Yahova ninkukupolomisani kuti nimbabvere chirichose chomwe munganiuze.’ Yona adakhala m’mimba mwa chintsomba mwicho kwa ntsiku zitatu ndipo patsogolo pake chidakamulavulira kuntunthu.

Yahova padamupulumusa Yona, adamuuza pomwe kuti ayende ku Nineve kule. Panthawe mweyi Yona alibe kulamba. Padafika kumuko, adawuza wanthu omwe ambachita vinthu voipa wale kuti: ‘Zandosala ntsiku 40, ndipo thaundi ya Nineve idzongewe. Wanthu wa ku Nineve padabva ntontholo moyu, adachinjiratu ndipo mpfumu yawo idalamula kuti: ‘Naboni tipemphere kwa Mulungu ndipo tisiye kuchita vinthu voipa, kuti panango aleke kutidzonga.’ Yahova padawona kuti wanthu mwawo alapa, alibe kudzonga thaundi mwiyo.

Yona ambadikhiralini vimwevi. Patsogolo pake adakalipa maninge. Manje ndoganizani, Yahova adakomera ntima Yona komasoti kumuchitira chifundo, koma iye alibe kuchitira chifundo wanthu wa ku Nineve. Yona adandobula mu thaundi momu nkukakhazikika m’nyantsi mwa kamuti. Patsogolo pake kamuti kale kadauma ndipo Yona adakalipa pomwe. Manje Yahova adamubvunza kuti: ‘Ko unkubvera ntsisi muti moyu koma osabvera ntsisi wanthu wa ku Nineve? Inepano nawachitira chifundo ndipo niribe kuwadzonga.’ Ko Yahova ambatanthauza chani pamwapa? Ambatanthauza kuti wanthu waku Nineve enze wofunika kuposha muti uliwose.