Yesu adamukisa Lazaro

Yesu wenze na azishamwali wake atatu omwe ambakhala ku Betaniya. Azishamwali wake mwawo enze Lazaro na azilongosi wake awiri, Mariya na Malita. Ntsiku inango, Yesu ali ku tsidya inango ya Yorodano, Mariya na Malita adamutumizira ntontholo wakuti Lazaro ankudwala mwa penopeno. Pulizi bwerani mwa kankulumize. Koma Yesu alibe kuyenda nthawe mweyoletu. Adakhala ntsiku ziwiri ndipo patsogolo pake adauza wopfudzira wake kuti: ‘Naboni ku Betaniya. Lazaro ankugona ninkufuna kuti nikamumuse.’ Atumi mwawo adati: ‘Peno Lazaro ankugona vimuthandize kuti apole mwa kankulumize.’ Apa manje Yesu adawauza kuti: ‘Lazaro wamwalira.’

Pomwe Yesu adafika ku Betaniya, nkuti Lazaro alikale m’manda kwa ntsiku 4. Kwenze wanthu azinji omwe adabwera kudzanyamalisa Malita na Mariya. Malita padabva kuti Yesu ankubwera, adamuchunguzira ndipo padagumana naye adati: ‘Ambuya sembe mwenze kuno mulongosi wangu adakafalini.’ Yesu adamudawira kuti: ‘Mulongosi wako adzamuke. Ko unkukhulupirira vimwevi?’ Malita adati: ‘Inde, ninkukhupirira kuti adzamuke pa ntsiku yomaliza.’ Pamwapo Yesu adati: “Inepano ndine kumuka na moyo.”

Patsogolo pake, Marita adayenda kukauza Mariya kuti: ‘Yesu wabwera.’ Mariya adamuthamangira Yesu ndipo gulu ya wanthu ire idamulondola. Maria adagwada pafupi na Yesu ndipo ambandolira. Patsolo pake, adati: ‘Ambuya, sembe mwenze kuno mulongosi wangu adakafalini.’ Yesu padawona kuti Mariya akulira, nayembo adayamba kulira. Wanthu padawona kuti Yesu ankulira adati: ‘Eee, koma Iye ambamukondadi Lazaro.’ Koma anango adayamba kubvunza kuti: ‘ Manje ndawa chani alibe kumuthandiza kuti osati afe?’ Ko Yesu adachita chani?

Yesu na wanthu mwawo adayenda kumanda ndipo adagumana kuti pa manda mwapo afunga na chimwala. Iye adauza wanthu kuti: ‘Chosani chimwala ichi!’ Koma Malita adati: ‘Wakhala m’manda ntsiku 4. Vinkuwoneka kuti wayamba kununkha.’ Koma wanthu adachosa chimwala chire ndipo Yesu adapemphera kuti: ‘Ababa, ninkukutembejani ndawa yakuti mwanibva. Ninkudziwa kuti munibva nthawe zose, koma ninkupemphera mokuwa tene ndawa ya gulu ya wanthu awa kuti adziwe kuti imwepo mudanitumiza.’ Patsogolo pake adakuwa kuti: “Lazaro, bula!” Padateno padachitika chodabwisa. Lazaro ule adabula ananguwo zomwe adamukulungira. Yesu adati: “Mumasuleni kuti akwanise kufamba.”

Wanthu azinji omwe adawona vimwevi adakhulupirira Yesu. Koma anango adayenda kukauza Afarisi ndipo Afarisi mwawo adayamba kufuna kupha Lazaro na Yesu. M’bodzi mwa Atumi 12 wale dzina yake Yudasi, adayenda mobisa kwa Afalisi nkuwauza kuti: ‘Munipase kobiri zingasi nikakuthandizani kugumana Yesu?’ Adabverananaye kuti amupase kobiri 30 za siriva. Mwapo Yudasi adayamba kufagafaga njira yakuti aperekere Yesu.