MSOLO 09

Pemphero ichalimbisa ushamwali wanu na Mulungu

Losindikizidwa

Ko pali vomwe vidakuchitikirani vomwe mumbafunika malangizo? Imwepo munamibvunzo yonena va moyo yomwe munkufuna midawiro yake? Ko muchada chilimbikiso na chithandizo? Ko muchada kudzibva kuti mulipafupi na Yahova? Kupemphera ni thandizo ikulu pa vose mwevi. Koma ko njira yabwino yakupemphera niiponi? Ko Mulungu achabva mapemphero yose? Nchani chomwe mungachite kuti Mulungu ambabvesere mapemphero yanu? Naboni tione.

1. Timbapemphere kwa mbani, ndipo timbapempherere chani?

Yesu adapfunzisa kuti tichadekana kumbapemphera kwa Ababa wathu wakudzulu. Ni vimwevi vomwe iye angachita. Iye adati: ‘Mumbapemphere tene: ‘Ababa wathu wakudzulu . . .’’ (Mateyu 6:9) Tikambapemphera kwa Yahova ushamwali wathu ukhala wolimba.

Ise tingapemphere pankhani iliyose. Koma Mulungu adzadawire mapemphero yobverana na vomwe iye achada. ‘Chilichose chomwe tingamukumbire mobverana na vomwe iye achada [vomwe Mulungu achada] adzatibve.’ (1 Yohane 5:14) Yesu adasiya chitsanzo cha vomwe tingapempherere. (Lewengani Mateyu 6:9-13.) Shuwadi kuti tingambapempherere nkhani zathu-zathu, koma tichadekanalini kuyebwa kupenpherera anango na kutembeja Mulungu pa vomwe ankutichitira.

2. Timbapemphere tani?

Mapemphero yathu yachadikana kukhala yochokera pasi pamoyo ndipo Baibolo ichatilimbikisa kuti ‘mukhutulireni va mumtima mwanu.’ (Salimo 62:8) Tingambapemphere mokuwa, mwakazizizi, nthawe iliyose na malo yaliyose. Komasoti palibe khaindi yakakhalidwe chaiyo pakumbapemphera. Imwepo mungapemphere muligwade, mulikhazikike panango muliimirire. Chakudikana maninge nkuwonesa ulemu kwa Yahova.

3. Ko Mulungu achadawira tani mapemphero yathu?

Iye achachita vimwevi mwanjira zizinji. Mwakulinganiza, m’Baibolo tichagumanamo midawiro yamibvunzo yathu yazinji. Kulewenga Mawu ya Mulungu kuchachitisa ‘munthu alibe nzeru kukhala wanzeru.’ (Salimo 19:7; lewengani Yakobo 1:5.) Yahova angatilimbikise tikagumana na mabvuto. Iye angaphatisire basa atumiki wake pakuti pasa chithandizo chodekana.

PFUNZIRANI VIZINJI

Onani vamuchadekana kuchita kuti mapemphero yanu yochokera pasi pamoyo yambabveke kwa Mulungu. Ndipo onani momwe mapemphero yangakuthandizireni.

4. Vomwe tingachite kuti Mulungu ambabve mapemphero yathu

Ni vinthu viponi vodekana kuti Mulungu ambabvesere mapemphero yathu? Wonesani VIDIYO.

VIDIYO: Ko Mulungu achabvesera mapemphero yose?—Mbali yake (2:42)

Yahova achada kuti timbapemphere kwa iye. Lewengani Salimo 65:2, ndipo patsogolo pake kambiranani mibvunzo aya:

Ko imwepo munkuganiza kuti ‘wakubva mapemphero’ achada kuti imwepo mumbapemphere kwa iye? Ndawa chani munkuganiza tene?

Kuti Mulungu abve mapemphero yathu tichadekana kumbachita vinthu vomwe iye achaona kuti nivabwino. Lewengani Mika 3:4 na 1 Petulo 3:12, ndipo kambiranani bvunzo uyu.

Ko tingatsimikize tani kuti Yahova adzabve mapemphero yathu?

Nkhondo ikambachitika masocha yambali yose yapemphera kwa Mulungu kuti awine, apa vingakhale vobveka kunena kuti Mulungu abvesera mapemphero mwaya?

5. Mapemphero yathu yamabachokere pasi pamoyo

Wanthu anango adapfunzira kuti achadikana kumbapemphera kwa Mulungu mwakubwerezera mawu yabodzi na yabodzi. Koma ko ni vomwe Mulungu ankufuna? Lewengani Mateyu 6:7, ndipo patsogolo pake kambiranani mibvunzo aya:

Nchani chamungachite kuti muleke kumbabwerezera mapemphero ‘yabodza na yabodza’?

Ntsiku iliyose, mungambaganizire madaliso ya Yahova yomwe wakupasani ndipo mungambamutembeje. Mukachita vimwevi mudzapempherere vinthu 7 vosiyanasiyana sondo iliyose.

Mwana ankuyankhula na ababa wake. — Baba wabwino achakondwa mwana wake akambayankhula naye, Yahovambo achakondwa tikambapemphera na moyo wose

6. Pemphero ni mphaso yochokera kwa Mulungu

Ko pemphero ingatipase tani mphanvu tikagumana na mabvuto? Wonesani VIDIYO.

VIDIYO: Pemphero ichatithandiza kugwebana na mabvuto (1:32)

Baibolo ichati pemphero ingatithandize kugumana ntendere wa m’moyo. Lewengani Afilipi 4:6, 7, ndipo patsogolo pake kambiranani mibvunzo aya:

Shuwadi kuti pemphero ingachoselini mabvuto yanu. Koma ko vingakuthandizei tani??
Ni vinthu viponi vomwe mungafune kupempherera?

Ko munkudziwa?

Mawu yakuti ‘Amem’ yachathandauza ‘vikhale tene’ panango kuti ‘shuwadi.’ Kundoyambira m’nthawe za m’Baibolo mawu mwawa yakhala yankuphatisiriwa basa kumapeto kwa mapemphero.—1 Mbiri 16:36.

7. Khalani na nthawe yopemphera

Nthawe zinango tichakhala wopanikizika mpakana kuyebwa kupemphera. Ko kupemphera kwenze kodekana kwa Yesu? Lewengani Mateyu 14:23 na Maliko 1:35, ndipo patsogolo pake kambiranani mibvunzo aya:

Ndawa chani Yesu angapatula nthawe yopemphera?
Ko imwepo muchachita tani kuti mupatule nthawe yopemphera?

Mafoto: Nkazi ankupemphera masikati. 1. Machibese. 2. Na mwana wake. 3. Kubasa. 4. Akanati wadya.

WANTHU ANANGO ACHATI: ‘Pemphero ichandothandiza kuti munthu abveko bwino, koma palibe na basa.’

Imwepo muchawona tani?

CHIGWATO

Mapemphero yochokera pasi pamoyo yachatifendereresa pafupi na Mulungu, yachatipasa ntendere wa m’maganizo, kutipasa mphanvu kuti tikwanise kukondweresa Mulungu.