Ko mungachitetani kuti mumbaphindule mokwana mukambalewenga Baibolo?

Ko panabasa yomwe munkufuna kuphata koma munkuzeza pakuwona kuti ni yoshupa? Kuti ileke kukushupani, mungafunike kuigawa nkumbaiphata pang’onopang’ono. Mungachitembo chibodzibodzi na kulewenga Baibolo. Koma panango mungadzibvunze kuti: ‘Manje ningaiyambire paponi?’ Mu pfunziro ino, tikambirane njira zosashupa zomwe mungatewedze kuti mumbakomedzewe pakulewenga na kupfunzira Baibolo.

1. Ndawa chani tichadekana kumbalewenga Baibolo nthawe zose?

Munthu yemwe nthawe zose achalewenga Baibolo panango kuti ‘chilamulo cha Yahova,’ adzakhale wokondwa ndipo vinthu vidzamufambire bwino. (Lewengani Salimo 1:1-3.) Kuti muyambe kulewenga Baibolo, mungachite bwino kumbailewenga maminutu yochepa ntsiku iliyose. Mukambakonda Mawu ya Mulungu, kulewenga Baibolo kudzakukomedzeni.

2. Nchani chingakuthandizeni kuti mumbaphindule mukambalewenga Baibolo?

Kuti muphindule mokwana na kulewenga Baibolo, muchadekana kuyima nkumbaganizira vamwalewenga. Tichadekana kulewenga na ‘kuviganizira.’ (Yoswa 1:8) Mukambalewenga, mumbadzibvunze mibvunzo aya: ‘Ko vimwevi vinkunipfunzisa chani va Yahova Mulungu? Ko ningaviphatise tani basa pamoyo wangu? Ningaphatise tani basa mavesi mwaya pakuthandiza anango?’

3. Ko mungaigumane tani nthawe yolewenga Baibolo?

Ko imwepo vikushupani kuti mugumane nthawe yolewenga Baibolo? Dziwani kuti ndimwelini mwekha. Yesesani ‘kuphatisa basa nthawe yanu mwanzeru.’ (Aefeso 5:16) Kuti mukwanise mungachite bwino kuchita kuikhiratu nthawe yolewengera Baibolo ntsiku iliyose. Wanthu anango achalewenga Baibolo machibesebese. Anango achalewenga masikati akandomaliza kudya midiya. Ndipo anango achalewenga Baibolo usiku akanati kugona. Ko imwepo munkuwona kuti nthawe yabwino kwa imwepo ni iponi?

PFUNZIRANI VIZINJI

4. Pfunzirani mwamungakondwere na kulewenga Baibolo

Ni shuwadi kuti ni voshupa kuyamba kulewenga Baibolo. Koma ‘mungazolowere’ ninge mwamungayambire kukonda chakudya chomwe nkuyamba kudyako. Lewengani 1 Petulo 2:2, patsogolo pake kambiranani mbvunzo uyu:

• Ko munkuwona kuti mukambalewenga Baibolo nthawe zose, mungadzayambe kukomedzewa nkumbandofuna kuti muilewenge?

Wonesani VIDIYO kuti muwone momwe anango adayambira kukonda kulewenga Baibolo. Patsogolo pake kambiranani mibvunzo aya.

VIDIYO: Alumbwana adapfunzira kukonda Mawu ya Mulungu (5:33)

• Ko alumbwana wamwawona muvidiyo adagwebana na mabvuto yaponi?

• Nchani chidawathandiza kuti apitirize kumbalewenga Baibolo nthawe zose?

• Nchani chadachita kuti kulewenga Baibolo kumbawakomedze maninge?

Vamungachite kuti muyambe:

• Sankhulani Baibolo ya chiseweredwe chomwe mungabve. Yesani kulewenga Baibulo la Dziko Latsopano peno ilimo muchiseweredwe chanu panango chiseweredwe chilichose chamungabve bwino.

• Yambani na kulewenga mbali yamunayo shungu maninge. Kuti muwoneko mbali zinango, wonani kambali kakuti “Yambani kulewenga Baibolo.”

• Mbachongani vomwe mudalewenga kale. Phatisani basa mbali yakuti “Mbachongani mukalewenga Baibolo” mubukhu mwaino.

• Phatisirani basa aplikativo ya JW Library^®. Na aplikativo mweyi, imwepo mungalewenge na kubvesera Baibolo pakuphatisa basa foni ya thachi olo chipangizo chinango chachizungu.

• Phatisirani basa vakumapeto mu Baibulo la Dziko Latsopano. Ku vakumapeto mungagumaneko mapa, ndandanda ya nthawe na mathandauzo ya mawu yanango yomwe yangakuthandizeni kuti mumbakomedzewe na kulewenga Baibolo.

5. Mumbakonzekere pfunziro yanu ya Baibolo

Lewengani Salimo 119:34, patsogolo pake kambiranani mbvunzo uyu:

• Ndawa chani ni vabwino kuyamba mwapemphera mukanati kuwerenga Baibolo panango kukonzekera pfunziro ya Baibolo?

Ko mungachite tani kuti mumbaphindule mokwana na pfunziro iliyose ya m’vigawo? Mukambakonzekera pfunziro iliyose, yesani kuchita ivi:

1. Lewengani ndime zoyambirira zapfunziro.

2. Unguzani malemba, kuyalewenga na kuwona momwe yankubveranirana na nkhani mweyo.

3. Zindikirani mawu panango mizera yomwe yakudawira mbvunzo uliwose. Mukachita teno mudzakwanise kukambirana bwino na yemwe ankukupfunzisani.

Ko munkudziwa?

Ise wa Mboni za Yahova tichaphatisa basa ma Baibolo yosiyanasiyana. Podiya viri tene, tichakomedzewa maninge na Baibulo la Dziko Latsopano la Malemba Opatulika ndawa ni yotewedza, yobveka bwino ndipo inadzina ya Mulungu.—Wonani nkhani ya pa intaneti yakuti “Kodi a Mboni za Yehova Ali Ndi Baibulo Lawolawo?”

CHIGWATO

Kuti mumbaphindule mokwana na Baibolo, khalani na ndandanda ya kuilewenga, pempherani kuti mubvese vomwe munkulewenga na kukonzekera pfunziro ya Baibolo.

Kubwerezera

• Ko nchani chingakuthandizeni kuti muphindule mwakukwana na Baibolo?

• Ko mungagumane mpata pa nthawe iponi kuti mumbalewenge na kupfunzira Baibolo?

• Ndawa chani ni vabwino kumbakonzekera pfunziro yanu ya Baibolo?

KUTI MUDZIWE VIZINJI

Bwerezerani mpfundo zinango zomwe zingakuthandizeni kuti mumbabvese bwino pakulewenga Baibolo.

‘Vomwe mungachite kuti mumbaphindule mukambalewenga Baibolo’ (Nsanja ya Olonda Na. 1 2017)

Pfunzirani njira zitatu zolewengera Baibolo.

‘Ko Baibolo inganithandize tani?—Mbali 1: Idziweni bwino Baibolo yanu’ (Nkhani ya pa intaneti)

Dziwani momwe mungakhalire wokondwa pakuwerenga Baibolo.

‘Ko Baibolo inganithandize tani?—Mbali 2: Chitisani kuti kuwerenga Baibolo kukhale kokomedza’ (Nkhani ya pa intaneti)

Dziwani njira zinango zowerengera Baibolo kuchokera kwa wanthu womwe aiwerenga kwa magole yazinji.

Mbachitani khama pakupfunzira pamwekha (2:06)