Pitirizani kulimbisa chidikhiro chanu

1. Ko Yahova watipasa chidikhiro chiponi?

YAHOVA watipolomisa kuti kutsogolo uku adzatipase moyo wosapera. Anango ankudikhira kudzayenda kudzulu nkukakhala kumuku mpakana kalekale na moyo wosafa. (1 Akor. 15:50, 53) Koma wanthu azinji ankudikhira kudzakondwa na moyo wosapera padziko yapasi mpakana kalekale. (Chiv. 21:3, 4) Peno tinkudikhira kudzakhala na moyo wosapera pano padziko yapasi panango kudzayenda kudzulu, tose tinkudikhira vinthu vabwino maninge.

2. Ko ndise otsimikizira chani pa vomwe tinkudikhira, ndipo ndawa chani tinkulewa tene?

² M’Baibolo, mawu yakuti ‘chidikhiro’ yaphatisiwa basa pakulewa va ‘kudikhira vinthu vabwino vomwe vidzachitikedi.’ Vinthu vomwe tinkudikhira kutsogolo ni votsimikizika ndipo vidzachitikedi ndawa yakuti yemwe watipolomisa ni Yahova. (Aro. 15:13) Tinkudziwa kuti iye ndiye watipolomisa ndipo nthawe zose akwanirisa vomwe walewa. (Num. 23:19) Ndise otsimikiza kuti Yahova anamphanvu ndipo anashungu yokwanirisa chilichose chomwe wapolomisa. Ndipomwapa, sikuti vatinkudikhira vandokhala maloto panango shungu yofuna vinthu vabwino basi. Tinkulewa tene ndawa yakuti tinaumboni wakuti vidzachitikedi.

3. Ko tikambirane chani munkhani ino? (Salimo 27:14)

³ Yahova yemwe ni Baba wathu wakudzulu atikonda maninge ndipo afuna kuti timbamuthembe. (Lewengani Salimo 27:14.) Tikambakhulupirira maninge Yahova, tingakhale wokondwa na wolimba mtima olo tigumane na mabvuto yakulu. Naboni manje tikambirane momwe chidikhiro chathu chichatitetezera. Chakuyamba tikambirane momwe chidikhiro chathu chilili cholingana na ndangula na chisote. Patsogolo pake tikambirane momwe tingalimbisire chidikhiro chathu.

CHIDIKHIRO CHATHU CHILI NINGE NDANGULA

4. Ko chidikhiro chathu chinkulingana tani na ndangula? (Aheberi 6:19)

⁴ Mu kalata yomwe mtumi Paulo adanembera Aheberi, adalinganiza chidikhiro chathu na ndangula. (Lewengani Aheberi 6:19.) Paulo adachita maulendo yazinji yapanyanja, ndipomwapa ambadziwa bwino kuti ndangula iphatisiwa basa kuti barko osati igwesewe na chimphepo. Nthawe inango iye pewenze paulendo m’barko, kudabwera chimphepo champhanvu. Chimphepo mwicho pachimbawindula madzi, mtumi Paulo adawona ofambisa barko ankuthusa ndangula zawo kuchitira kuti barko ingakamenye viminyala. (Mac. 27:29, 39-41) Chidikhiro chathu chitithandizambo kuti tipitirize kutumikira Yahova podiya kuti tinkugumana na mabvuto yazinji. Chidikhiro chathu cholimba chitithandiza kuti tipirire mabvuto ndawa yotsimikiza kuti manjemanje vinthu vidzakhale bwino. Kumbukirani kuti Yesu adaleweratu kuti tidzadzudziwe. (Yoh. 15:20) Ndipomwapa, kuganizira vomwe Yahova watipolomisa kungatithandize kuti tipitirize kumutumikira.

5. Ko chidikhiro chidathandiza tani Yesu kukhala wolimba podiya kuti ambadziwiratu kuti aphewe?

⁵ Ndoganizani momwe chidikhiro cholimba chidathandizira Yesu podiya kuti angadziwa kuti manjemanje agumane na voshupa. Mu Pentekosite wa mu 33 EC, mtumi Petulo adaphata ulosi wa m’bukhu ya Salimo pofotokoza momwe Yesu wenzere wodekha podiya kuti angagumana na mabvuto. Iye adati: ‘Ine nidzakhale na chidikhiro ndawa mudzasiyelini moyo wangu m’manda, ndipo mudzabvumelini kuti thupi ya wokhulupirika wanu iwole. . . . Ndipo ndawa ya nkhope yanu, nidzakondwe maninge.’ (Mac. 2:25-28; Sal. 16:8-11) Podiya kuti Yesu ambadziwiratu kuti aphewe, iye wenze na chidikhiro cholimba ndawa yodziwa kuti Mulungu adzamumukise ndipo adzabwerere pomwe kudzulu nkukakhala na Ababa wake nkupitiriza kukhala wokondwa.—Aheb. 12:2, 3.

6. Ko m’bale munango adalewa chani pankhani ya chidikhiro?

⁶ Vomwe Akhrisitu ise tinkudikhira vathandiza abale na alongo wathu azinji kupirira mabvuto. Ndoganizani vomwe vidachitikira m’bale wathu wokhulupirika Leonard Chinn wa ku Inglaterra. Nkati mwa nkhondo yachiwiri yapadziko yose, iye adamangiwa nkuikhiwa mudjeri ndawa yakuti adalamba kungena usocha. Kwa minyezi yawiri, adaikhiwa mudjeri ya yekhayekha ndipo patsogolo pake adapasiwa basa yowawa maninge. Patsogolo pake iye adanemba kuti: “Vomwe vidanichitikira vidanithandiza kuwona kuti tifunika kukhala na chidikhiro cholimba kuti tikwanise kupirira mabvuto. Tinachitsanzo cha Yesu, cha atumi, cha aneneri na mapolomisi yabwino yogumanika m’Baibolo. Vinthu vose vimwevi vitithandiza kukhala na chidikhiro cholimba na kupirira mabvuto yomwe tinkugumana nayo.” Chidikhiro chenze ninge ndangula kwa m’bale wathu Leonard ndipo chingakhalembo ninge ndangula kwa isepano.

7. Ko mayesero yangatithandize tani kuti tikhale na chidikhiro cholimba? (Aroma 5:3-5; Yakobo 1:12)

⁷ Tikambagumana na mabvuto nkuwona momwe Yahova ankutithandizira, tingatsimikizire kuti iye ankukondwa nase. Vimwivi vichitisa kuti tikhale na chidikhiro cholimba. (Lewengani Aroma 5:3-5; Yakobo 1:12.) Vikakhala teno, chidikhiro chathu chikhala cholimba maninge kuposha panthawe yomwe tingayamba kupfunzira Baibolo. Satana atibweresera mayesero mwaya pofuna kutifokesa. Koma na thandizo ya Yahova tingakwanise kupirira mayesero yaliyose.

CHIDIKHIRO CHATHU CHILI NINGE CHISOTE

8. Ko chidikhiro chathu chinkulingana tani na chisote? (1 Atesalonika 5:8)

⁸ Baibolo ilinganiza pomwe chidikhiro chathu na chisote. (Lewengani 1 Atesalonika 5:8.) Nsocha avala chisote pofuna kuteteza msolo wake ku vinthu vomwe adani wake ankumuthusira. Pankhondo yathu yauzimu, tichadekana kutetezambo maganizo yathu ku mayesero yomwe Satana ankutibweresera. Iye aphatisira basa vinthu vizinji pofuna kutiyesa nakuti asokoneze kaganizidwe kathu. Ninge momwe chisote chichatetezera msolo wa nsocha, chidikhiro chitetezambo kaganizidwe kathu kuti tipitirize kukhala wokhulupirika kwa Yahova.

9. Ko nchani chinkuchitikira wanthu omwe alibe chidikhiro?

⁹ Chidikhiro chathu cha moyo wosapera chingatithandize kuchita vinthu mwanzeru na moganiza bwino. Koma chidikhiro chathu chikakhala chofoka nkumbabvuma kumbandoganizira vilakolako va thupi yathu, tingakwaniselini kuikhira nzeru pa moyo wosapera watinkudikhira. Ganizirani vomwe vidachitikira Akhrisitu wa kalekale wa ku Korinto. Iwo enze adaleka kukhulupirira kuti wakufa adzamukisiwe. (1 Akor. 15:12) Paulo adanemba kuti iwo ambandochita vofuna vawo ndawa yosatsimikiza kuti wakufa adzamukisiwe. (1 Akor. 15:32) Ntsiku zino, wanthu azinji omwe akhulupiriralini mapolomisi ya Mulungu, andokhalira kufagafaga chuma pakundofuna kuti alemere. Koma ise tinkuikhira nzeru maninge pa vomwe Mulungu watipolomisa kutsogolo. Chidikhiro chathu chili ninge chisote chomwe chititeteza kuti tisambandoganizira vofuna vathu kuchitira kuti ushamwali wathu na Yahova ungadzongeke.—1 Akor. 15:33, 34.

10. Ko chidikhiro chathu chititeteza tani kumabodza?

¹⁰ Chidikhiro chathu chomwe chili ninge chisote, chingatiteteze pomwe ku maganizo yowona kuti palibe chatingachite kuti tikondwerese Yahova. Mwakulinganiza, anango angaganize kuti: ‘Ningakwaniselini kukhala mugulu ya wanthu omwe adzatambire moyo wosapera. Ndine wosayenerera kupasiwa moyo watene. Ningakwaniselini kutewedza mpfundo za Yahova pankhani ya makhalidwe yabwino.’ Kumbukirani kuti Elifazi adamuchitisa Yobu kumbaganizambo tene. Iye adauza Yobu kuti: ‘Ko munthu ni mbani kuti akhale wochena?’ Pakulewa va Mulungu, Elifazi adati: ‘Iye athembalini olo angelo wake chaiwo, ndipo olo kudzulu ni kosachena m’maso mwake.’ (Yobu 15:14, 15) Kumuku nkunama! Kumbukirani kuti Satana ndiye ankufuna kuti mumbaganize tene. Iye adziwa bwino kuti mukambadziwona kuti ndimwe wosafunika, chidikhiro chanu chingakhale chosalimba. Ayi kubvuma kuti akuchitiseni kukhulupirira mabodza mwaya ndipo ikhirani nzeru pa vomwe Yahova ankukupolomisani. Ayi kumbakaikira kuti Yahova ankufuna kuti imwepo mudzatambire moyo wosapera ndipo ni wokonzeka kukuthandizani kuti mudzautambiredi.—1 Tim. 2:3, 4.

PITIRIZANI KULIMBISA CHIDIKHIRO CHANU

11. Ndawa chani tichadekana kukhala odekha podikhira kuti Yahova akwanirise vadatipolomisa?

¹¹ Nthawe zinango vingatishupe kukhala na chidikhiro cholimba. Tingakangire kukhala odekha pomwe tinkudikhira Mulungu. Koma pakuti Yahova wakhalako kundochokera kalekale, awona nthawe mosiyana na isepano. (2 Pet. 3:8, 9) Iye adzakwanirise cholinga chake panthawe yake. Koma panango iye angachitelini vimwevi panthawe yomwe tinkuganizira. Manje nchani chingatithandize kukhala odekha pakudikhira kuti Yahova akwanirise mapolomisi yake?—Yak. 5:7, 8.

12. Mobverana na Aheberi 11:1, 6, ko chikhulupiriro chingatithandize tani kukhala na chidikhiro cholimba?

¹² Kuti tipitirize kukhala na chidikhiro cholimba, tichadekana kukhala paushamwali wabwino na Yahova ndawa yakuti iye ndiye wati adzakwanirise vadapolomisa. Kuti tikwanise kukhala na chidikhiro cholimba, tichadekana kukhulupirira kuti Yahova aliko nakuti ‘adalisa wanthu womufagafaga na moyo wose.’ (Lewengani Aheberi 11:1, 6.) Tikambakhulupirira kuti Yahova alikodi, ndipo patingatsimikizire maninge kuti iye adzakwanirisedi vadatipolomisa. Naboni manje tikambirane vatingachite kuti tikhale paushamwali wolimba na Yahova kuti tilimbise chidikhiro chathu.

13. Ko tingachite tani kuti tikhale pafupi na Mulungu?

¹³ Mbapempherani kwa Yahova na kuwerenga Mawu yake. Podiya kuti tingamuwonelini Yahova, ni vokwanisika kukhala naye pafupi. Tingayankhule naye mpemphero tichimbatsimikiza kuti ankutibvesera. (Yer. 29:11, 12) Kuti tibve Mawu ya Mulungu, tingachite bwino kumbawerenga Baibolo na kuganizira vatapfunzira. Tikambawerenga momwe Yahova adathandizira wanthu wokhulupirika kwa iye kalekale, chidikhiro chathu chikhala cholimba maninge. Vinthu vose vomwe vidanembewa m’Mawu ya Mulungu, ‘vidanembewa kuti vitilangize. Malemba mwaya yatipasa chidikhiro ndawa yatithandiza kupirira ndipo yatilimbikisa.’—Aro. 15:4.

14. Ndawa chani tichadekana kumbaganizira vomwe Yahova adachitira anango?

¹⁴ Mumbaganizire momwe Yahova nthawe zose achakwanirisira mapolomisi yake. Ndoganizirani vomwe Mulungu adachitira Abulahamu na Sara. Iwo adakula mpakana kufika pa nsinkhu wakuti angakwaniselini pomwe kubereka wana. Koma olo kuti venze teno, Mulungu adawapolomisa kuti adzakhale na mwana. (Gen. 18:10) Ko Abulahamu adachita tani padauziwa vimwevi? Baibolo ilewa kuti: ‘Iye adakhulupirira kuti vidzakwanisikedi kukhala baba wa makhaindi yazinji ya wanthu.’ (Aro. 4:18) Podiya kuti m’maso mwa wanthu vimbawoneka ninge vosakwanisika, Abulahamu adapitiriza kukhulupirira kuti Yahova adzakwanirise vomwe wamupolomisa. Ndipo mwamuna wokhulupirika moyu alibe kuphatisiwa pantsi. (Aro. 4:19-21) Nkhani mwiyi inkutipfunzisa kuti nthawe zose Yahova adzakwanirise vomwe adapolomisa podiya viwoneke ninge ni vosakwanisika.

15. Ndawa chani tichadekana kumbaganizira vomwe Mulungu watichitira?

¹⁵ Mbaganizirani vomwe Yahova wakuchitirani pamoyo wanu. Ganizirani momwe imwepo pamwekha mwaphindulira ndawa ya kukwanirisika kwa vinthu vomwe Yahova adapolomisa m’Mawu yake. Mwakulinganiza, Yesu adapolomisa kuti Ababa wake ambatithandize kugumana vosowa pamoyo wathu. (Mat. 6:32, 33) Yesu adakutsimikizirani pomwe kuti Yahova adzakupaseni mphanvu ya mzimu wake mukamupempha. (Luka 11:13) Yahova nthawe zose ankukwanirisadi mapolomisi mwaya. Tinashuwa kuti munkumbukirambo mapolomisi yanango yomwe Yahova adakwanirisa pofuna kukuthandizani. Mwakulinganiza, iye adakupolomisani kuti adzakukhululukireni, kukulimbikisani na kukuthandizani kuti mukhale naye paushamwali wolimba. (Mat. 6:14; 24:45; 2 Akor. 1:3) Mukambaganizira vomwe Mulungu wakuchitirani kale, mungambatsimikize kuti adzakwanirisedi vomwe wapolomisa kutsogolo.

MBAKONDWANI NA CHIDIKHIRO CHAMUNACHO

16. Ndawa chani chidikhiro chatinacho ni mphaso yabwino maninge?

¹⁶ Polomisi ya moyo wosapera ni mphaso yabwino maninge yochokera kwa Mulungu. Ndise otsimikiza kuti vinthu vabwino vatinkudikhira kutsogolo uku vidzachitikedi. Chidikhiro mwichi chili ninge ndangula ndawa chitithandiza kupirira mayesero, peno kukhale kudzudziwa panango kuphewa chaiko. Chidikhiro mwichi chili pomwe ninge chisote ndawa chitithandiza kuti osati timbaganizire vinthu vophonyeka, koma vabwino. Chidikhiro cha m’Baibolo chimwichi chitithandiza kuti tikhale paushamwali na Mulungu ndipo chinkutitsimikizira kuti atikonda maninge. Nthawe zose tiphindula tikambayesesa kulimbisa chidikhiro chathu.

17. Ndawa chani tingakhale wokondwa ndawa ya chidikhiro chathu?

¹⁷ Mukalata yomwe mtumi Paulo adanembera Aroma, adawalimbikisa kuti: ‘Kondwani na chidikhiro chanu.’ (Aro. 12:12) Paulo wenze wokondwa ndawa yodziwa kuti akapitiriza kukhala wokhulupirika, akakhale na moyo wosapera kudzulu. Isembo tingakondwe na chidikhiro chathu ndawa yodziwa kuti Yahova nthawe zose akwanirisa vomwe wapolomisa. Vimwevi vinkubverana maninge na vomwe wamasalimo adanemba kuti: ‘Wodala ni munthu . . . yemwe ankudikhira Yahova Mulungu wake, . . . yemwe ni wokhulupirika nthawe zose.’—Sal. 146:5, 6.