Pitirizani kukulisa chikondi chanu

1. Ko ni vinthu viponi vomwe mudakondwa navo pomwe mudayamba kupfunzira Baibolo?

PANANGO imwepo munkukumbukira nthawe yomwe mudayamba kupfunzira Baibolo, imwepo mudadabwa pakudziwa kuti Mulungu ana dzina. Ndipo mudakhala womasuka pakudziwa kuti iye awotchalini wanthu kumoto. Vimwevi vinkuoneseratu kuti imwepo mudakondwa kupfunzira kuti mudzawone pomwe abale wanu womwe adamwalira na kukhala nawo mu paradaiso pa dziko yapasi.

2. Kuingizira pa vomwe mwapfunzira m’Baibolo, ko ni mbali zinango ziponi zomwe imwepo mwakula mwauzimu? (Aefeso 5:1, 2)

² Pomwe imwepo mudayamba kupfunzira mawu ya Mulungu, ni pomwe chikondi chanu kwa Yahova chidayamba kukula. Ni chikondi chimwechi chomwe chimbakulimbikisani kuphatisa basa vomwe mumbapfunzira. Ndipo imwepo mudayamba kusalula vinthu mwa nzeru. Mobverana na vipfunziso va m’Baibolo imwepo mudayamba kuchinja makhalidwe yanu na maganizo yanu ndipo mumbafuna kukondweresa Mulungu. Ninge momwe mwana achatewedzerera ababa wake wachikondi, imwepo mudatewedzera Ababa wanu wakudzulu.—Lewengani Aefeso 5:1, 2.

3. Ko ni mibvunzo yaponi yomwe tingadzibvunze?

³ Mungadzibvunze kuti: ‘Ko chikondi changu kwa Yahova ni cholimba manjeuno kuposha nthawe yomwe nidakhala Nkhrisitu? Ko kaganizidwe kangu na momwe nichachitira vinthu kalingana na ka Yahova kundochokera pa nthawe yomwe nidabatiziwa? Ko ninkupitiriza kuonesa chikondi kwa abale na alongo wathu?’ Peno mwanjira inango ‘chikondi chomwe mwenze nacho poyamba chidazizira’ ayi kukwinyirira. Vinthu ninge vimwevi vidachitikirambo Akhrisitu oyambirira, Yesu alibe kuwasiya ndipo adzatisiyembolini isepano. (Chiv. 2:4, 7) Iye ankudziwa kuti tingakwanise kugakisapomwe chikondi chetenze nacho kundochokera pomwe tidapfunzira chonadi.

4. Ko tipfunzire chani mu nkhani ino?

⁴ Nkhani ino ifotokoze momwe tingapitirizire kukula mu chikondi kwa Yahova na kwanzathu. Tionepomwe madaliso yomwe tidzagumane tikapitiriza kukulisa chikondi kwa Yahova na kwanzathu.

INGIZIRANI CHIKONDI CHANU KWA YAHOVA

5-6. Ko ni mabvuto yaponi yomwe Paulo adagumana nayo pa utumiki wake, ndipo nchani chomwe chidamuthandiza kutumikira Yahova?

⁵ Mtumi Paulo ambakonda maninge kutumikira Yahova koma ni nthawe zoselini pomwe wenze wokondwa. Iye ambadekana kuyenda m’madera yataliyatali koma kuchita ulendo kwenze koshupa pa nthawe mwaile. Pamaulendo yake Paulo ‘ambagumana na mabvuto yapanyanza.’ Nthawe zinango ‘ambagumana na mbava’ ndipo nthawe zinango iye ambamenyewa. (2 Akor. 11:23-27) Ndipo ninthawelini zose pomwe abale ambalemekeza khama yomwe wachita pakuwathandiza.—2 Akor. 10:10; Afil. 4:15.

⁶ Ko nchani chomwe chidathandiza Paulo kupitiriza kutumikira Yahova? Iye adapfunzira vizinji pa kuphatisira basa Malemba. Pa vinthu vomwe vidamuchitikra iye adalimbikisiwa pa kudziwa kuti Yahova Mulungu amukonda. (Aro. 8:38, 39; Aef. 2:4, 5) Ndipo adayamba kukonda maninge Yahova. Paulo adaonesa chikondi chake kwa Yahova ‘pa kutumikira wochena na kupitiriza kuwatumikira.’—Aheb. 6:10.

7. Ko tingaingizire tani chikondi chathu kwa Yahova?

⁷ Isepano tingaingizire chikondi chathu kwa Mulungu, tikambapfunzira mosamala maninge mawu yake. Mukambalewenga Baibolo yesani kuganizira vomwe nkhani iliyose inkutipfunzisa va Yahova. Dzibvunzeni kuti: ‘Ko nkhani mweyi inkunionesa tani kuti Yahova anikonda? Ko nkhani mweyi inkunichitisa tani kuti nimbakonde maninge Yahova?’

8. Ko ninjira inango iponi yomwe tingaingizirire chikondi chathu kwa Mulungu?

⁸ Njira inango yomwe tingaingizirire chikondi chathu kwa Yahova ni kumuuza va muntima mwathu nthawe zose m’pemphero. (Sal. 25:4, 5) Ndipo Yahova adawira mapemphero yathu. (1 Yoh. 3:21, 22) Mulongo munango waku Ásia, dzina yake Khanh, adalewa kuti: “Pakuyamba nimbandokonda Yahova ndawa ya vomwe nidapfunzira va iye. Koma patsogolo pake pomwe nidaona Yahova ankudawira mapemphero yangu nidayamba kumukonda maninge. Vimwevi vidanichitisa kuti nimbachite vinthu vomukondweresa.”b

KULISANI CHIKONDI CHANU KWA ANANGO

9. Ko tinkudziwa tani kuti Timoteyo ambakonda maninge abale?

⁹ Magole pang’ono pomwe Paulo adakhala Nkhrisitu, iye adadziwana na mulumbwana munango wachitsanzo chabwino dzina yake Timoteyo. Timoteyo ambakonda maninge Yahova komasoti wanthu. Paulo adauza Akhrisitu waku Filipi kuti: ‘Pakuti nilibe munango wa ntima ninge [wake] yemwe angakusamalirenidi imwepo mokoma ntima.’ (Afil. 2:20) Paulo pamwapa ambalewalini va buya ya Timoteyo ninge wonyang’anira panango buya yopfunzisa bwino, kunena shuwa Paulo ambachita chidwi na chikondi chomwe Timoteyo ambachionesa kwa abale na alongo. Mosakaika mipingu yomwe Timoteyo ambafambira yambakhala yokonzeka kumutambira.—1 Akor. 4:17.

10. Ko Anna na mwamuna wake adaonesa tani chikondi kwa abale?

¹⁰ Isepanombo tinyang’ana njira zinango kuti tithandizembo abale wathu. (Aheb. 13:16) Onani vomwe vidachitikira Anna, yemwe adatomolewa mu nkhani yapita ire. Pambuyo pachimphepo chikulu iye na mwamuna wake adazungira banja inango ya Mboni za Yahova ndipo adaona kuti denga ya nyumba yawo yenze idadzongeka. Ndawa ya vimwevi banja mweyi yenze ilibe vovala vochena. Anna adati: “Isepano tidatenga vovala vawo nkuyenda kukaviwatcha kuvitchisa na kuvifunya nkuyenda kukavipereka. Kwa isepano vimwevi venze ving’ono maninge, ndawa ya vomwe tidawachitila manjeuno na azishamwali wathu wapa moyo.” Chikondi chomwe Anna na mwamuna wake anacho chidawathandiza kuchita vinthu vabwino kwa anango.—1 Yoh. 3:17, 18.

11. (a) Ko anango adzibva tani tikawaonesa chikondi? (b) Mobverana na Miyambo 19:17, ko Yahova awona tani tikambaonesa chikondi?

¹¹ Tikakhala okoma ntima na wachikondi kwa anango, iwo akwanisa kuona kuti tinkutewedzera Yahova. Koma nthawe zinango tidziwalini momwe wanthu ankutitembejera pa vomwe tachita. Khanh, mulongo yemwe tamutomola kumayambiriro kule, iye akumbukira mwachikondi wanthu womwe adamuthandiza. Iye adati: “Ine nitembeja maninge alongo omwe ambanitenga kuyenda nane mu umboni. Iwo ambanichemerera kumuyi kwawo ku chakudya cha masikati ndipo ambakanisiya pomwe kumuyi bwinobwino. Manje ninkubvesa kuti enze basa ikulu kwa iwo ndipo ambachita vose ndawa ya chikondi.” Nishuwadi kuti ni wanthulini wose omwe angatitembeje ndawa ya vomwe tawachitira. Pakulewa va wanthu omwe adamuthandiza, Khanh adati: “Inepano ninkufuna kubwezera vose vomwe adanichitira koma ninkudziwalini kuti ankukhala kuponi. Koma Yahova ankudziwa kuti ine nipemphera kuti iye awachitire vinthu vomwe inepano ningakwaniselini kuwachitira.” Khanh ankulewa chaivo. Yahova akhala tcheru kuona vose vomwe tichachita olo pa vinthu ving’onong’ono. Iye awona khama yose yomwe tichachita ndipo ayitenga ninge chikwerete chakuti adzatipagali.—Lewengani Miyambo 19:17.

12. Ko abale angaonese tani chikondi mu mpingu? (Onani pomwe foto.)

¹² Peno imwepo ndimwe m’bale, ko mungaonese tani chikondi anzanu ndipo mungawathandize tani? Mulumbwana munango Jordan adabvunza akulu momwe iye angathandizire mu mpingu. Akulu adamutembeja ndawa yopita kwake patsogolo mwauzimu ndipo adamupasa malangizo yanango ya momwe angachitire vizinji mu mpingu. Mwakulinganiza, iwo adamuuza kuti ambafike kamangu pamisonkhano kuti ambakwanise kumusana na bale na alongo, kuingizira mwapa iye ambafunika kumbapereka ndemanga pamisonkhano, kulalikira mwakhama na kunyang’ana njira yothandizira abale na alongo. Jordan adatewedza malangizo mwaya, ndawa ya vimwevi kuingizira pa kupfunzira maluso yanyowani iye adaingizira pomwe chikondi chake kwa abale na alongo. Jordan adapfunzira chinthu chinango kuti pomwe m’bale wakhala pa udindo mu mpingu ndipolini pomwe achadekana kuyamba kuthandiza anango koma ndipo achadekana kupitiriza kuthandiza anango.—1 Tim. 3:8-10, 13.

13. Ko chikondi chidathandiza tani m’bale munango dzina yake Christian kuti ayambe pomwe kutumikira ninge nkulu?

¹³ Manje tani peno imwepo mudatumikirako kale ninge nkulu panango ntumiki wonthandiza? Yahova akumbukira basa zose zomwe imwepo mudachita, chikondi ndicho chomwe chimbakuchitisani kuchita vimwevi. (1 Akor. 15:58) Iye awona pomwe chikondi chomwe munkupitiriza kuchionesa. M’bale munango dzina yake Christian adakhumudwa pomwe adasiya kutumikira ninge nkulu. Olo viri teno, iye adati: “Inepano natsimikiza kuti nichite chilichose chaningakwanise kuti nitumikire Yahova na kumuonesa kuti nimukonda pomwe ni na maudindo panango pomwe nilibe maudindo.” Kuyenda kwa nthawe Christian adayamba pomwe kutumikira ninge nkulu, iye adati: “Inepano nenze na mantha kuti niyambe pomwe kutumikira ninge nkulu koma nidatsimikiza kuti peno Yahova ankufuna kuti nitumikire ninge nkulu, vimwevi ndivo vomwe nichadekana kuchita. Ndawa ya chikondi changu kwa Yahova na abale na alongo.”

14. Ko tingapfunzire chani pa chitsanzo cha Elena waku Georgia?

¹⁴ Atumiki wa Yahova nawombo awonesa chikondi kwa anzawo. (Mat. 22:37-39) Mwakulinganiza, mulongo munango waku Georgia dzina yake Elena, adati: “Pakuyamba chinthu chibodzi chomwe chimbanilimbikisa kuti nimbalalikire ni chikondi changu kwa Yahova. Koma pomwe chikondi changu kwa Yahova chidayamba kukula chikondi changu kwa wanthu chimbakula pomwe. Niyesesa kuganizira mabvuto yomwe wanthu ankugumana nayo nkuona kuti ni nkhani iponi yomwe ingawafike pa ntima. Nikakhala kuti ninkuganizira wanthu mwa njira mweyi ndipo pomwe nikhala na chifuno chakuti niwathandize.”—Aro. 10:13-15.

YAHOVA ADZATIDALISE TIKAKHALA KUTI TINKUONESA CHIKONDI KWA ANANGO

15-16. Ninge mwayankuonesera mafoto ko nivinthu viponi vingachitike tikambaonesa chikondi kwa anango?

¹⁵ Tikambaonesa chikondi kwa abale wathu, wanthu anango aphindula. Pomwe matenda ya Koronaviru yadayamba, m’bale munango dzina yake Paolo na nkazi wake adathandiza alongo wachikulire kuphatisa basa vipangizo vamagetsi pakulalikira. Mulongo munango yemwe ambashupika kuphatisa basa vipangizo mwevi adayamba kuviphatisa basa bwinobwino. Ndawa ya vimwevi iye adakwanisa kuchemera azibale wake ku chikumbuso. Azibale wake 60 adagumanika pa chikumbuso. Ndawa ya khama ya Paolo na nkazi wake mulongo moyu na azibale wake adaphindula. Mulongo moyu pakulewa va Paolo adalewa kuti: “Ninkutembeja maninge ndawa munkuthandiza wachikulire mu mpingu inepano nidzayebwelini kuti Yahova ankuyikhira nzeru wanthu wake na khama yose yomwe mudachita.”

¹⁶ Paolo adapfunzirapo chinthu chofunika maninge pa chitsanzo mwechi. Iye adapfunzira kuti chikondi nchodekana maninge kuposha nzeru panango maluso. “Iye ankukumbukira kuti nimbatumikira ninge wonyang’anira dera. Manjeuno ninkuona kuti podiya kuti wanthu angakumbukirelini nkhani zomwe nimbakamba koma iwo ankukumbukira vinthu vomwe nimbachita pakuwanthandiza.”

17. Ko ni mbanipomwe adzaphindule tikambaonesa chikondi?

¹⁷ Tikambaonesa chikondi kwa anango, isepanombo tiphindula mu njira yomwe timbadikhiralini. Jonathan, yemwe akhala ku Nova Zelândia, iye adziwa bwino vimwevi. Nthawe inango pa Satade masikati komwe kwenze dzuwa maninge adaona m’painiya ankulalikira yekha. Iye adaganiza kuti adzalalikire naye pabodzi pa Satade inkubwera masikati, iye ambaganiziralini kuti kukoma ntima kumoku “kungamuchitilembo ubwino iye.” Jonathan adati: “Pa nthawe mweire inepano nimbakondalini kulalikira. Koma kuona momwe m’painiya moule ambapfunzisira na maphindu yangagumana nidayamba kukonda basa yolalikira. Kuingizira mwapo inepano nidagumana shamwali yemwe adanithandiza kukula mwauzimu, kukonda basa yolalikira na kufenderera maninge Yahova.”

18. Ko Yahova ankufuna kuti tichite chani?

¹⁸ Yahova afuna kuti tose isepano tiingizire chikondi chathu kwa iye na kwa anzathu. Ninge momwe taonera mu nkhani ino tingakulise chikondi chathu kwa Yahova tikambalewenga na kuganizira mawu yake na kumbapemphera nthawe zose kwa iye. Tidzaingizirepomwe chikondi chathu kwa abale na alongo pakuchita vinthu vomwe vingawathandize. Chikondi chathu chikambakula tidzamufenderere maninge Yahova na abale wathu wa uzimu. Chikondi chathu kwa Yahova na kwa abale wathu chidzapirize kukula m’paka kalekale!