NKHANI YOPFUNZIRA 36
NYIMBO NA. 103 Akulu ni mphaso
Mbakumbirani akulu kuti akuthandizeni
“Achemere akulu wa mpingo.”—YAK. 5:14.
CHOLINGA
Tiwone kufunika kokumbira thandizo kwa akulu pomwe tinkudekana.
1. Ko tidziwa tani kuti nkhosa za Yahova ni zodekana kwa iye?
NKHOSA za Yahova ni zodekana maninge kwa iye. Iye adazigula modula maninge na moyo wa Mwana wake. Iye adayikha pomwe akulu kuti ambanyang’anire nkhosa mwizi. (Mac. 20:28) Yahova ankufuna kuti nkhosa zake zimbanyang’aniriwe mwachikondi. Pakutewedzera mtsogoleri wathu Yesu, akulu alimbikisa abale na alongo, ndipo awateteza ku vinthu vodzonga ushamwali wawo na Yahova.—Yes. 32:1, 2.
2. Mobverana na Ezekieli 34:15, 16 ko Yahova aikhira nzeru maninge mbani?
2 Yahova aikhira nzeru maninge nkhosa zake zose. Koma aganizira maninge wale womwe ushamwali wawo na iye uli pangozi. Anango angambashupike ndawa ya machimo yomwe adachita, koma Yahova aphatisa basa akulu kuti awathandize. (Werengani Ezekieli 34:15, 16.) Yahova ankufuna kuthandiza tose tikadekana thandizo. Pa nthawe ninge mwizi, kuingizira pa kupemphera na ntima wose, tidekana pomwe kunyang’ana thandizo kwa “anyakabusa na apfunzisi” mumpingo.—Aef. 4:11, 12.
3. Ko ndawa chani pfunziro mweyi ni yodekana kwa tose?
3 Mupfunziro mweino, tione momwe Yahova aphatisira basa akulu kuti athandize abale na alongo. Tione pomwe midawiro ya mibvunzo aya: Ni pa nthawe iponi pomwe tingakumbire thandizo ya akulu? Ndawa chani tidekana kuchita vimwevi? Ko iwo atithandiza tani? Olo kuti ushamwali wanu na Yahova ni wolimba, midawiro ya mibvunzo mwaya ithandize tose kuingizira kutembeja kwathu pa momwe Yahova aphatisira basa akulu omwe angapulumuse moyo wathu.
KO NI PA NTHAWE IPONI POMWE TIDEKANA “KUCHEMERA AKULU”?
4. Tinkudziwa tani kuti pa Yakobo 5:14-16, 19, 20 ankunena va kukonza ushamwali wathu na Yahova? (Onani pomwe mafoto.)
4 Yakobo adafotokoza momwe akulu angatithandizire. Iye adanemba kuti: “Ko pali aliyese yemwe ankudwala pagulu yanu? Achemere akulu wa mpingo.” (Werengani Yakobo 5:14-16, 19, 20.) Pamwapa Yakobo ambanena va munthu yemwe ankufunika kukonza ushamwali na Yahova. Tinkunena teno ndawa iye adati munthu muyu afunika kuchemera akulu, osati mfulumero. Yakobo adanena pomwe kuti munthu muyu apola akakhululukiriwa machimo yake. Ndipo nthawe zinango vomwe vichitiwa pakupolesa matenda, vilingana na vomwe vichitiwa pakukonza ushamwali na Yahova. Tikadwala, tiyenda kwa mfulumero nkumufotokozera momwe tinkubvera, ndipo titewedza malangizo yake. Nchibodzibodzimbo, tikachita chimo ticheza na nkulu nkumuuza bvuto yathu ndipo tibverana na malangizo yomwe watipasa kuchokera m’Baibolo.
Tikadwala, tinyang’ana mfulumero. Ndipo ushamwali wathu na Yahova ukasokonezeka, tifagambo akulu (Onani ndime 4)
5. Ko tingadziwe tani kuti ushamwali wathu na Yahova uli pangozi?
5 Pa Yakobo msolo 5, tinkulimbikisiwa kucheza na akulu tikandozindikira kuti ushamwali wathu na Yahova uli pangozi. Koma ni nzeru kunyang’ana thandizo tikanati kuchita chimo yomwe ingadzonge ushamwali wathu na Yahova. Baibolo itichenjeza kuti timbasamale kuti osati timbadzinamize kuti ushamwali wathu na Yahova ulibwino koma virilini teno. (Yak. 1:22) Akhrisitu anango waku Sarde ambadzinamizambo teneretu. Koma Yesu adawauza kuti ushamwali wawo na Yahova udamala kalekale. (Chiv. 3:1, 2) Njira yabwino yatingadziwire peno ushamwali wathu na Yahova uli bwino, ni kulinganiza khama yatinayo na yomwe tenze nayo pakuyamba. (Chiv. 2:4, 5) Tingadzibvunze kuti: ‘Ko khama yangu yowerenga Baibolo na kuganizira vomwe nawerenga yachepa? Ko ninkuluza misonkhano yanango ndipo nikafika pamisonkhano nidzibva kuti ndine wosakonzeka? Ko khama yangu mu umboni inkusiyana na kalekale? Ko manjeuno niikhira nzeru maninge vosangalasa panango kobiri?’ Peno mwadawira kuti inde mbvunzo ubodzi, ndiye kuti vimwevi vinkuwonesa kufoka komwe peno mungakonzelini mwakankulumize, kungaingizirike. Peno tinkukwanisalini kumalisa bvuto mweyi tekha, panango tidachita chinthu chomwe Yahova alibe kubverana nacho, tidekana kukumbira thandizo ya akulu.
6. Ko munthu yemwe wachita chimo ikulu adekana kuchita chani?
6 Machimo yanango ni yakuluyakulu mwakuti peno munthu angalapelini, angachosewe mumpingo. Peno tachita chimo ninge mweyi tidekana kuuza akulu. (1 Akor. 5:11-13) Munthu yemwe wachita chimo ikulu, adekana thandizo kuti akonze pomwe ushamwali wake na Yahova. Iye angakhululukiriwe pokhapokha peno walapadi chaivo. (Mac. 26:20) Ndipo njira ibodzi yatingachitere nikuuza akulu.
7. Ko ni mbani pomwe angadekane thandizo ya akulu?
7 Akulu andothandizalini omwe achita chimo ikulu, koma athandiza pomwe wale omwe ushamwali wawo na Yahova ulilini bwino. (Mac. 20:35) Mwakulinganiza, panango mungakhale na nkhawa nkumbaganiza kuti munkuluza khama yanu pakulimbana na vilakolako voipa. Bvuto mweyi ingakhale ikulu peno pakuyamba mukalibe kupfunzira chonadi mumbaphatisa basa mankhwala yosokoneza msolo, mumbanyang’anira volaula, panango mumbakonda kuchita vinthu va chigololo. Koma mudekanalini kulimbana na bvuto mweyi mwekha. Mungauze nkulu m’bodzi yemwe mumuthemba. Iye adzabvese bvuto yanu nkukupasani malangizo na kukutsimikizirani kuti Yahova ni wokondwa ndawa yakuti munkuchitalini vinthu voipa. (Mla. 4:12) Panango mukhumudwa ndawa yakuti munkupitiriza kulimbana na bvuto mweyi. Koma akulu angakuthandizeni kuona kuti kufaga thandizo, kunkuonesa kuti mufuna kukhala pa ushamwali na Yahova ndipo munkudzidaliralini.—1 Akor. 10:12.
8. Ko tidekana kuyankhula na akulu pa chirichose chomwe tingaphonyese?
8 Sikuti chilichose chomwe tingaphonyese tingafunike kuuza akulu. Mwakulinganiza, ndolinganizani kuti mwayankhula vinthu vokalipisa m’bale panango mulongo. M’malo mothamangira kuuza akulu, mungaphatise basa malangizo ya Yesu yokhazikisa ntendere. (Mat. 5:23, 24) Mungafufuze va nkhani ya kudekha na kudziletsa kuti mudzakwanise kuwonesa makhalidwe mwaya kutsogolo. Koma peno munkukwanisalini kumalisa bvuto mweyo, mungakumbire thandizo ya akulu. Mu kalata yake yoyenda kwa Afilipi, ntumi Paulo adakumbira kuti m’bale munango athandize Eodiya na Suntuke kuti akambirane vinthu vomwe enze adaphonyerana. Nkulu mumpingo angakupasenimbo thandizo ninge mweyi.—Afil. 4:2, 3.
KO NDAWA CHANI TIDEKANA KUCHEMERA AKULU?
9. Ko ndawa chani tidekanalini kubvuma kuti manyazi yatikangise kucheza na akulu? (Miyambo 28:13)
9 Tidekana chikhulupiriro na kulimba ntima kuti tikumbire thandizo tikachita chimo ikulu, panango tikazindikira kuti tinkuluza khama yomwe tenze nayo pakulimbana na chofoka chathu. Ayi kubvuma kuti manyazi yatikangise kucheza na akulu. Ndawa chani? Ndawa Yahova adatipasa akulu kuti atithandize kulimbisa ushamwali wathu na iye. Ndipomwapa, tikakumbira thandizo ya akulu tionesa kuti tinkuthemba momwe Yahova achitira vinthu. Ndipo tionesa pomwe kuti tinkufuna thandizo yake kuti osati tichoke mumpingo, koma tipitirize kuchita vabwino. (Sal. 94:18) Ndipo tikachita chimo, Yahova adzatikomere ntima tikauza akulu vomwe tachita na kuvisiya.—Werengani Miyambo 28:13.
10. Ko nchani chomwe chingachitike peno tingabise chimo yathu?
10 Tikambauza akulu vomwe taphonyesa, tidalisiwa. Koma tikabisa chimo yathu, bvuto ingakulirekulire. Pomwe Davide adayesa kubisa machimo yake, iye adafoka ndipo ambandoshupika na maganizo. (Sal. 32:3-5) Matenda yakula peno palibe mankhwala, nawombo ushamwali wathu na Yahova usokonezeka peno tinkufagalini thandizo. Yahova adziwa vimwevi, ndipomwapa atichemera kuti ‘tikambirane naye va bvuto yathu’ pakuphatisa basa njira zomwe adazikhazikisa kuti tikonze ushamwali wathu na iye.—Yes. 1:5, 6, 18.
11. Ko kubisa chimo kungakhudze tani anango?
11 Tikabisa chimo ikulu yomwe tachita, ingakhudze pomwe wanthu anango. Mzimu uchena ungaphatelini bwino basa mumpingo, ndipo tingaikhe pangozi mbverano wa abale na alongo. (Aef. 4:30) Ndipomwapa, tikadziwa kuti munthu wachita chimo ikulu koma nkubisa chimo ya munthu muyo, ndisembo ophonya ninge iye.a (Lev. 5:1) Koma tidekana kumuuza kuti auze akulu vomwe wachita. Peno iye angachitelini mwevi, isepano tidzawauze akulu ndawa yakuti tikonda maninge Yahova ndipo ndise okhulupirika kwa iye. Mwanjira mweyi, tithandiza mpingo kuti ukhale wochena, ndipo tithandiza munthu muyo kuti akonze ushamwali wake na Yahova.
KO AKULU ATITHANDIZA TANI?
12. Ko akulu athandiza tani wanthu omwe ushamwali wawo na Yahova wasokonezeka?
12 Baibolo inena kuti akulu adekana kuthandiza wanthu omwe ushamwali wawo na Yahova wasokonezeka. (1 Ates. 5:14) Peno mwachita chimo, iwo angakuchiteni mibvunzo na cholinga chakuti aone momwe munkuganizira na momwe munkubvera. (Miy. 20:5) Panango vingakushupeni ndawa ya chikhalidwe chanu, chibadwa panango ndawa ya manyazi na vomwe vachitika. Koma mungawathandize pa kuyankhula mwa sitiriti pa vomwe vachitika. Ndipo ayi kuchita mantha peno vomwe mungayankhule vingaoneke ninge ‘munkuganizalini bwino.’ (Yobu 6:3) Akulu adzathamangirelini kukuweruzani ndawa ya vomwe mwayankhula. Koma adzayesese kubvesera modekha na kukubvesani akanati kukupasani malangizo. (Miy. 18:13) Iwo adziwa kuti kusamalira nkhosa kutenga nthawe, nakuti nthawe zinango vingakwanisikelini paulendo ubodzi kupereka thandizo yofunika.
13. Ko mapemphero ya akulu na malangizo yawo yochokera m’Baibolo yangatithandize tani? (Onani pomwe mafoto.)
13 Akulu afunalini kuingizira mabvuto pa vomwe mwachita. Koma adzakupempherereni. Vingachitike kuti mungadabwe kuwona kuti pemphero yomwe angachite inkuphata basa ‘mwamphanvu maninge.’ Thandizo yawo iphatanidza “kumudzoleka mafuta mu dzina ya Yahova.” (Yak. 5:14-16) “Mafuta” mwaya yankutanthauza chonadi cha m’Mawu ya Mulungu. Akulu adzaphatise basa malemba ya m’Baibolo yomwe yadzakukhazikeni ntima pasi, ndipo yadzakuthandizeni kukonza pomwe ushamwali wanu na Yahova. (Yes. 57:18) Malangizo yawo yochokera m’Baibolo, yangakupaseni mphanvu zodekana kuti mupitirize kuchita vabwino. Pakuphatisa basa akulu, mungakwanise kunva mawu ya Yahova yankunena kuti: ‘Njira ni iyi. Famba momu.’—Yes. 30:21.
Akulu aphatisa basa Baibolo kuti athandize wanthu kuti akonze ushamwali wawo na Yahova (Onani ndime 13-14)
14. Mobverana na Agalatiya 6:1, ko akulu athandiza tani munthu yemwe wayamba “kufamba munjira yophonyeka”? (Onani pomwe mafoto.)
14 Werengani Agalatiya 6:1. Mkhrisitu akayamba “kufamba munjira yophonyeka,” ankufambalini mobverana na mpfundo za chilungamo za Yahova. Kufamba munjira yophonyeka kungatanthauze kusalula chinthu chophonyeka panango kuchita chimo ikulu. Akulu mwachikondi athandiza munthu muyo “mofatsa maninge.” Mawu ya Chiheberi yomwe yatsumbudzuliriwa kuti ‘kuthandiza,’ yangatanthauze kuikha pfupa mchimake kuti munthu achire. Ninge mfulumero yemwe ayesesa kubwezeresa pfupa mchimake koma munthu osabva kuwawa, akulu ayesesambo kupolesa munthu koma mosamukhumudwisa. Baibolo ilimbikisa akulu kukhala ‘osamala.’ Peno ankuthandiza munthu kuti afambe munjira yabwino, adekana kuganizira kuti iwombo ni ochimwa ndipo aphonyesa. Adzionalini kuti ni wapadzulu kuposha anango. Koma achita khama kuti akhale odzichepesa komasoti obvesera.—1 Pet. 3:8.
15. Ko tingachite chani peno tinabvuto?
15 Isepano tithemba akulu. Yahova adawapfunzisa kuti osati ambaulule chintsintsi, ambatenge m’Baibolo malangizo na kumbatithandiza pamabvuto yathu. (Miy. 11:13; Agal. 6:2) Akulu ni osiyanasiyana, aliyese ana makhalidwe yake, anango ni odziwa vizinji kuposha anango. Koma tingamasuke kuyankhula na nkulu aliyese. Nishuwadi kuti tingandobvunzalini nkulu aliyese payekha na cholinga chakuti m’bodzi atiuze vinthu vomwe tinkufuna kubva. Kuchita mwevi kuli ninge kunyang’ana ‘vomwe vingatikomedze,’ m’malo ‘mopfunzisiwa chaivo’ vochokera m’Mawu ya Mulungu. (2 Tim. 4:3) Akanati kutipasa malangizo, nkulu panango angabvunze peno tayankhula kale na nkulu munango, kuti adziwe malangizo yomwe iye watipasa. Ndawa yodzichepesa, panango iye angabvunze nkulu munango va nkhani mweyo.—Miy. 13:10.
UDINDO WATHU
16. Ko ni udindo uponi womwe aliyese anawo?
16 Olo kuti akulu atinyang’anira ndawa ndise nkhosa za Mulungu, atiuzalini vochita. Aliyese ana udindo wochita vinthu mobverana na vadapolomisa pakudzipereka. Ndipo tidzadawire tekha kwa Yahova pa vomwe tichita na kunena. Koma iye angatithandize kuti tikhale wokhulupirika na kusalula vochita mwanzeru. (Aro. 14:12) M’malo mwakuti akulu atiuze vochita, atithandiza kudziwa maganizo ya Yahova. Ndipo asiya kuti tisalule tekha vochita. Tikaganizira malangizo ya m’Baibolo yomwe akulu atipasa, nkuyaphatisa basa, tipfunzisa ‘buya yathu yoganiza,’ kuti tisalule vinthu mwanzeru.—Aheb. 5:14.
17. Ko ndimwe wotsimikiza kuchita chani?
17 Ni mwayi ukulu kukhala nkhosa za Mulungu. Yahova adatumiza “nyakabusa wabwino” Yesu kudzatiwombola kuti tidzagumane moyo wosapera. (Yoh. 10:11) Kuingizira mwapa, Yahova watipasa akulu kuti ambatisamalire ninge mwadapolomisira kuti: ‘Nidzakupaseni anyakabusa omwe achita vinthu mobverana na vofuna vangu. Ndipo adzakuthandizeni kuti mukwanise kudziwa vinthu vizinji, kuti mukhale obvesa vinthu.’ (Yer. 3:15) Tikachita chimo ikulu, tidekana kukumbira thandizo ya akulu. Ndipo tose tidekana kutembeja makonzedwe yomwe Yahova adachita pakutipasa akulu.
NYIMBO NA. 31 Umbafambe na Mulungu
a Peno munthu yemwe wachita chimo alibe kuulula kwa akulu, kukhulupirika kwathu kudekana kutilimbikisa kukauza akulu vomwe vachitika.