NKHANI YOPFUNZIRA 26
Khalani wokonzeka pakudikhira ntsiku ya Yahova
‘Ntsiku ya Yahova idzabwere ndendende ninge m’bava usiku.’—1 ATES. 5:2.
NYIMBO NA. 143 Pitirizani Kugwira Ntchito, Kukhala Maso ndi Kudikira
VOMWE TIPFUNZIREa
1. Ko tichadekana kuchita chani kuti tidzapulumuke pa ntsiku ya Yahova?
BAIBOLO ikambanena va ‘ntsiku ya Yahova,’ itanthauza nthawe yomwe Yahova adzadzonge azondi wake nakupulumusa wanthu wake. Nthawe zinango kalekale Yahova ambapereka viweruzo. (Yes. 13:1, 6; Ezek. 13:5; Zef. 1:8) Ntsiku zathu zino ‘ntsiku ya Yahova’ inkuyamba na kudzongewa kwa Babulo Nkulu mpaka pa ntsiku ya Arumagedo. Kuti tidzapulumuke pa ‘ntsiku’ mweyo, tichadekana kuyamba kukonzeka manjeuno. Yesu atipfunzisa kuti ayi kuti tindokonzekera ‘chisautso chikulu’ koma ‘tipitirize kukonzekera.’—Mat. 24:21; Luka 12:40.
2. Ndawa chani tingaphindule na bukhu ya Atesalonika woyamba?
2 Mukalata yake yoyamba youziriwa kwa Atesalonika, Paulo adaphatisa basa vitsanzo vizinji kuti athandize Akhrisitu kukonzekera ntsiku ikulu ya chiweruzo cha Yahova. Paulo ambadziwa kuti ntsiku ya Yahova ifikelini mu nthawe mweyo. (2 Ates. 2:1-3) Olo venze teno iye adachenjeza abale kuti akonzekere ntsiku mweyo ninge kuti yafika kale. Isembo tingaphatise basa malangizo mwaya. Naboni tikambirane pa vomwe iye adafotokoza munjira izi: (1) momwe ntsiku ya Yahova idzafikire, (2) womwe adzapulumukelini pa ntsiku mweyi, ndipo (3) momwe tingakonzekerere kuti tidzapulumuke pa ntsiku mweyi.
KO NTSIKU YA YAHOVA IDZAFIKE TANI?
Pakunemba Atesalonika wakuyamba Paulo adaphatisa basa vitsanzo vomwe vingatiphindulise (Onani ndime 3)
3. Ko ntsiku ya Yahova idzafike tani ninge m’bava usiku? (Onani pomwe foto.)
3 ‘Ninge m’bava usiku.’ (1 Ates. 5:2) Imweyi ni njira yoyamba panjira zitatu zokufotokoza va kufika kwa ntsiku ya Yahova. Kazinji-kazinji m’bava zichita vinthu mwakankulumize ndipo zibwera usiku kuti zidzagumane wanthu ali osakonzeka. Ntsiku ya Yahova idzafikembo modzidzimusa ndipo wanthu azinji adzadabwe. Mpakana Akhrisitu chaiwo angadabwe kuona momwe vinthu vinkuchitikira mwakankulumize. Koma mosiyana na wanthu oipa ise tidzadzongewelini.
4. Ko ntsiku ya Yahova inkulingana tani na vowawa va pobereka?
4 ‘Ninge vowawa va pobereka va nkazi wamimba.’ (1 Ates. 5:3) Ninge nkazi wamimba adziwalini nthawe chaiyo yomwe adzabereke. Iye akayikiralini kuti vimwevi vidzachitike. Ndipo vimwevi vikachitika basa yobereka ichitika mowawa ndipo iyimisiwalini. Molingana na vimwevi tidziwalini olo ntsiku panango nthawe yomwe ntsiku ya Yahova idzayambe. Podiya viriteno tinkutsimikiza kuti ntsiku ya Mulungu yopereka chiweruzo kwa wanthu oipa idzafike modzidzimusa ndipo idzapewekelini.
5. Ko pali kubverana kuponi pakati pa chisautso chikulu na pomwe kunkuchena?
5 Ninge kunkuchena. Muchitsanzo chake chachitatu Paulo afotokoza za m’bava zomwe zichaba usiku. Koma Paulo ankuchinja maganizo yake kulinganiza ntsiku ya Yahova ninge kunkuchena. (1 Ates. 5:4) Ninge m’bava zomwe zibwera usiku zikhala zotangwanika ndipo zikwanisalini kudziwa nthawe. Kuchena kwa ntsiku kungazigunane ndipo mosadikhirika zingaphatiwe. Chisautso chikulu chidzaulule pomwe wale omwe alimudima omwe ankupitiriza kuchita basa zomwe zikondweresani Mulungu. Mosiyana na amwawa tingakhale utsimikiza kulamba kuchita vinthu vomwe vikondweresalini Yahova nakuchita virivose ‘vabwino, vachilungano na chonadi.’ (Aef. 5:8-12) Patsogolo pake Paulo ankufotokoza vitsanzo viwiri vofotokoza wale omwe adzapulumukelini.
MBANI ADZAPULUMUKELINI PA NTSIKU YA YAHOVA?
6. Ko wanthu azinji ankugona munjira iponi? (1 Atesalonika 5:6, 7)
6 ‘Omwe ankugona.’ (Lewengani 1 Atesalonika 5:6, 7.) Paulo adalinganiza wale omwe adzapulumukelini pa ntsiku ya Yahova ninge wanthu omwe ankugona. Iwo azindikiralini vomwe vinkuchitika na nthawe yomwe tinkukhala. Ndipo mwapa iwo akukwanisalini kuzindikira vinthu vofunika vomwe vinkuchinja ndipo ankuchitapolini kanthu. Wanthu azinji ntsiku zino ankugona mwauzimu. (Aro. 11:8) Iwo alibenavo basa vakuti tinkukhala mu ‘ntsiku zomalizira’ nakuti manjamanje chisautso chikulu chifike. Vochitika vikuluvikulu va dziko iyi vingachitise kuti anango amuke kutulo twawo twauzimu nkuonesako pang’ono kubvera va ntontholo wathu wa Ufumu. Koma kanthawe kang’onong’ono azinji ayamba pomwe kugona m’malo mwakuti akhale tcheru. Podiya wale omwe akhulupirira va ntsiku ya chiweruzo aganiza kuti ntsiku mweyi ilikutali maninge. (2 Pet. 3:3, 4) Olo nteno tizindikira kuti malangizo youziriwa yolewa vantsiku yachiweruzo yapitiriza kukhala yofunika ntsiku na ntsiku.
7. Ndawa chani wale omwe ankulimbana na ukali wa Mulungu ali ninge vidakwa?
7 ‘Vidakwa.’ Paulo adalinganiza wale omwe ankulimbana na ukali wa Mulungu ninge vidakwa. Wanthu omwe nividakwa achebwa kuzindikira vinthu vomwe vinkuchitika ndipo asalula vinthu mophonyeka. Nchibodzibodzimbo wanthu oipa iwo azindikiralini machenjezo ya Mulungu, iwo asalula njira yomwe iwayendesa kuchionongeko. Koma Akhrisitu ankuchenjezewa kuti achadeka kukhala maso komasoti oganiza bwino. (1 Ates. 5:6) Munthu munango woona va mipukutu ya m’Baibolo adati: “Kukhala oganiza bwino kutanthauza kukhala wosagunduzika, nakufagafaga bwinobwino kuti tikwanise kusalula pankhani inango.” Ndawa chani tichadekana kukhala wosagunduzika komasoti olimba? Kuti tileke kusokonezewa na vinthu mudziko iyi. Kuyesewa kuti tikhale kusaidi yadziko kupitirize makamaka pomwe ntsiku ya Yahova ilipafupi. Tichadekanalini kukhala nankhawa koma kukonzekera momwe tingapilirire. Mzimu wa Mulungu ungatithandize kuti tikhale osagunduzika, ochena mumaganizo komasoti kuti timbasalule vinthu mwanzeru.—Luka 12:11, 12.
NCHANI CHOMWE TINGACHITE KUTI TIKONZEKERE NTSIKU YA YAHOVA?
Pomwe wanthu ankupitiriza kukhala osakodzeka, isepano tinkupitiriza kukhala okodzeka pakubwera kwa ntsiku ya Yahova. Pakuvala chotetezera pachifuwa chomwe ni chikhulupiriro nachikondi na heti yachidikhiro (Onani ndime 8, 12)
8. Ko lemba ya 1 Atesalonika 5:8 inkufotokoza tani makhalidwe yomwe yangatithandize kupitiriza kukhala maso? (Onani pomwe foto.)
8 ‘Valani chodzitetezera pachifuwa . . . na . . . heti.’ Paulo ankutilinganiza namasocha yomwe yalikonzekere kuti yamenye nkhondo. (Lewengani 1 Atesalonika 5:8.) Koma nthawe zose nsocha angafunike kukhala aliwokonzeka kuti palipose angamenye nkhondo. Tingakonzekere ntsiku ya Yahova tikakhala kuti tavala chodzitetezera pachifuwa chachikhulupiriro nachikondi. Makhalidwe mwaya yangatithandize maninge.
9. Ko chikhulupiriro chititeteza tani?
9 Chotetezera pachifuwa chimbatetezera ntima wa nsocha. Chikhulupiriro na chikondi chiteteza ntima wathu wophiphirisa. Ivo vidzatithandize kupitiriza kutumikira Mulungu nakutewedzera Yesu. Chikhulupiriro chititsimikizira kuti Yahova adzatidalise tikapitiriza kumufagafaga na ntima wose. (Aheb. 11:6) Vimwevi vitilimbikisa kuti tipitirize kukhala okhulupirika kwa ntsogoleri wanthu Yesu olo kuti tinkulimbana na mabvuto. Tingalimbise chikhulupiriro chathu kuti tilimbane na mabvuto yapamoyo tikambaganizira vitsanzo va abale na alongo ntsiku zino, omwe ankupitiriza kukhala okhulupirika podiya kuti ankugumana namabvuto yakuluyakulu. Tingapewe nsampha wofuna chuma tikatewedzera wale omwe akhala moyo wosafuna vizinji pakufuna kuikha Ufumu wa Mulungu pamalo yoyamba.b
10. Ko kukonda Mulungu na adzathu kungatithandize tani kupirira mabvuto?
10 Chikondi chingatithandize kuti tikhale maso komasoti oganiza bwino. (Mat. 22:37-39) Chikondi chathu kwa Mulungu chingatithandize kuti tipirire mu umboni olo kuti kuchita vimwevi kungatibweresere mabvuto. (2 Tim. 1:7, 8) Taona kuti chikondi chathu chifikira olo wale omwe alibe chikhulupiriro, tipitiriza kuphata basa yolalikira mugawo yathu olo pakuphatisa basa mafoni panango makalata. Tikhala nachitsimikizo chakuti ntsiku inango wale omwe tikhala nano pafupi adzachinje nkuyamba kuchita vinthu vabwino.—Ezek. 18:27, 28.
11. Ko chikondi kwa abale wathu chitithandiza tani? (1 Atesalonika 5:11)
11 Chikondi chathu kwamwanzathu chiphatanidzapo Akhrisitu anango. ‘Tionesa chikondi chimwechi tikabalimbikisana.’ (Lewengani 1 Atesalonika 5:11.) Ninge masocha yankumenya nkhondo motetezana, isepano tilimbikisana. Nishuwadi kuti nsocha angamulase mwanzake kunkhondo koma iye achitiralini utowa vimwevi. Molingana na vimwevi, isepano shipo tidzakhumudwiselini abale na alongo wathu mwautowa panango kubwezera choipa pachoipa. (1 Ates. 5:13, 15) Komasoti tiwonesapomwe chikondi chathu tikambalemekeza abale omwe ankutsogolera mumpingu. (1 Ates. 5:12) Pomwe Paulo angalembera kalata mweyi mpingu wa Atesalonika, wenze udandokhazikisiwa kwa gole ibodzi. Abale omwe enze adasaluliwa kuti anyang’anire mpingu moyu wenze osadziwa vizinji. Ndipo vingachitike kuti wenze adaphonyesako vinthu vinango. Olo venzeteno iwo angadekana kupasiwa ulemu. Pomwe chisautso chikulu chinkufendera panango tingafunike kuthemba akulu kuti atipase malangizo kuposha momwe tinkuchitira ntsiku zino. Vingachitike kuti tingakwaniselini kuyankhula na likulu yathu panango ofesi yanthambi. Ndipomwapa tifunika kupfunzira manjeuno kubvera akulu. Viribe basa vinthu vomwe vingachitike ayi kuti timbabvere vophonya vawo. Koma timbaganizire kuti Yahova pakuphatisa basa Yesu Khrisitu ankutsogolera amuna okhulupirika mwawa.
12. Ko chidikhiro chiteteza tani maganizo yathu?
12 Ninge momwe heti ichatetezera msolo wa nsocha, chidikhiro chathu chakuti tidzapulumusiwe chiteteza maganizo yathu. Nachidikhiro, tikwanisa kuwona kuti vomwe dziko ichapereka viribe basa. (Afil. 3:8) Chidikhiro chathu chitithandiza kuti tikhale wosagunduzika na olimba. Vimwevi ndivo vidachitikira Wallace na Laurinda, omwe ankutumikira ku África. Nkati mwamasondo yatatu ose awiri adaluza azibereki wawo muipfa, ndawa ya koronaviru iwo alibe kukwanisa kuti ayende akagumane na azibale wawo. Wallace adati: “Chidikhiro chakumukisiwa chinithandiza kuti nimbawakumbukire, osati momwe vinthu venzere kwaiwo m’masiku yomaliza ya moyo wawo mu dziko ino, koma momwe vinthu vidzakhalire vokomedza akadzakhala mudziko inyowani. Nikakhala kuti nikukumbukira va ipfa yawo, chidikhiro chinithandiza kukhala wosagunduzika.”
13. Nchani chitingachite kuti titambire mzimu uchena?
13 ‘Ayi kudzimwisa moto wa mzimu.’ (1 Ates. 5:19) Paulo adalinganiza mzimu uchena ninge moto womwe uli nkati mwaisepano. Tikakhala kuti tina mzimu wa Mulungu tikhala wodzipereka komasoti wakhama pabasa ya Yahova. (Aro. 12:11) Ko nchani chomwe tingachite kuti titambire mzimu uchena? Tingambapemphere kukumbira mzimu umoyu, kupfunzira mawu ya Mulungu komasoti kuchita vinthu mobverana na gulu yake yotsogolerewa na mzimu moyu. Vimwevi vidzatichitise kuti tikulise ‘vipatso va mzimu uchena.’—Agal. 5:22, 23.
Dzibvunzeni kuti ‘ko vochita vangu vinkuonesa kuti ninkufuna kupitiriza kutambira mzimu wa Mulungu?’ (Onani ndime 14)
14. Ko tichadekana kusamala na chani kuti tipitirize kutambira mzimu uchena wa Mulungu? (Onani pomwe foto.)
14 Mulungu akatipasa mzimu uchena, tifunika kukhala osamala kuti ‘tileke kudzimwisa moto wa mzimu umoyu.’ Mulungu achasiya kuti mzimu wake uphate basa kwawale omwe anamaganizo yochena namakhalidwe yochena. Iye angatipaselini mzimu wake uchena peno tinamaganizo yoipa panango tinkuchita vinthu voipa. (1 Ates. 4:7, 8) Kuti tipitirize kutambira mzimu uchena ‘tifunikalini kumbanyozera maulosi ya m’Baibolo.’ (1 Ates. 5:20) ‘Maulosi’ mwaya yankutanthauza mawu yokonzewa na mzimu uchena wa Mulungu, komasoti yofotokoza va ntsiku ya Yahova na ntsiku zomwe tinkukhala zino. Ayi kumbakumbuka kuti Armagedo ichitikelini inepano nidakanamoyo. M’malo mwake, mumbakumbukile vantsiku mweyi muli namaganizo yabwino, komasoti munkuchita khama pa basa zowonesa kuti ndimwe odzipereka kwa Mulungu ntsiku iliyose.—2 Pet. 3:11, 12.
‘GANIZIRANI VINTHU VOSE’
15. Ko tingapewe tani kunamiziwa na mawu yaviwanda panango nkhani zabodza? (1 Atesalonika 5:21)
15 Manjemanjepa, azondi wa Mulungu adzanause kuti: ‘Bata na ntendere!’ (1 Ates. 5:3) Mawu yowuziriwa na viwanda yadzadzale padziko ndipo wanthu azinji adzanamiziwe nayo. (Chiv. 16:13, 14) Manje tani kwaise? Tidzanamiziwelini tikakhala kuti ‘tinkuganizira na kutsimikizira vinthu vose.’ (Lewengani 1 Atesalonika 5:21.) Mawu ya Chigiriki yotsumbudzuliriwa kuti ‘kutsimikizira’ yambaphatisiwa basa pakuyesa vitsulo vodula maninge. Ndipomwapa tifuna kutsimikizira kuti vomwe tinkubvesera panango kulewenga nivabodzalini. Vimwevi venze vodekana maninge kwa Atesalonika ndipo nivodekana pomwe kwa isepano pomwe chisautso chikulu chinkufendera. M’malo mwakundokhulupirira virivose vomwe wanthu ankunena, tichadekana kuphatisira basa mphanvu yakuganiza kuti tione peno vomwe tinkulewenga panango kubvesera vikubverana na Baibolo panango vomwe gulu ya Mulungu inkunena. Tikachita vimwevi tidzanamiziwelini na mawu yaliyose ya viwanda.—Miy. 14:15; 1 Tim. 4:1.
16. Ko nichidikhiro chotsimikizika chiponi chomwe tinacho, ndipo vitichitisa kuchita chiyani?
16 Ninge gulu, wanthu wa Mulungu adzapulumuke pa chisautso chikulu. Koma olo viriteno, tidziwalini vomwe vichitike mangwana. (Yak. 4:14) Ndipomwapa, viribe basa peno tidzakhale na moyo chisautso chikulu chikadzafika panango neye. Tidzatambire moyo wosapera tikapitiriza kukhala wokhulupirika. Akhrisitu odzodzewa adzakhale pabodzi na Yesu kudzulu. Wankhosa zinango adzakondwe na paradaiso padziko yapasi. Ndipomwapa aliyese waise ambaganizire vachidikhiro chake uku tiri wokonzeka pakudikhira ntsiku ikulu ya Yahova!
NYIMBO NA. 150 Bwerani kwa Mulungu Kuti Mupulumuke
a Mu msolo 5 walemba ya Atesalonika woyamba, adalinganiza vinthu vinango komasoti kupereka vitsanzo vomwe vitipfunzisa va ntsiku ya Yahova kutsogolo. Ko ‘ntsiku’ mweyi ni chani ndipo idzafike tani? Mbani adzapulumuke? Ndipo ni mbani omwe adzapulumukelini? Ko tingadzikonzekerese tani? Naboni tiwone mawu ya mtumi Paulo nakudawira mibvunzo mwaya.
b Onani pa nkhani yakuti “Anadzipereka ndi Mtima Wonse.”